,
Eagle Hills-ი გონიოს ჩრდილოეთით, მდინარე ჭოროხის შესართავთან მდებარე 260 ჰექტარის მიწის ნაკვეთზე ხელოვნური ყურეს შექმნას გეგმავს. აღნიშნულ ყურეში ახალი იახტ-კლუბი მოეწყობა, მის გარშემო კი კომპანია მაღალი კლასის სასტუმროებს, მრავალბინიან საცხოვრებელ სახლებს, ვილებს, რესტორნებს, მაღალი კლასის სავაჭრო დაწესებულებებსა და სხვა ობიექტებს განათავსებს. ამის შესახებ კომპანიის მიერ გამოქვეყნებული პრეზენტაციიდან ირკვევა.
აღნიშნული უძრავი ქონება ამჟამად სახელმწიფო საკუთრებაშია და ინვესტორისთვის მისი გადაცემა ჯერ არ მომხდარა. ამასთან, გასული წლების განმავლობაში არაერთხელ განიხილებოდა მისი განვითარების სხვადასხვა შესაძლებლობა, თუმცა საბოლოოდ მისი პრივატიზება ამ დრომდე არ მომხდარა.
მდინარე ჭოროხის შავ ზღვაში შესართავის სამხრეთით აღნიშნულ ტერიტორიაზე წარსულში რუსული სამხედრო ბაზა იყო განთავსებული, რომელიც 2004-2005 წლებში დაიშალა.
დღეს კომპანია Eagle Hills-მა თბილისში ყოფილ კინო რუსთაველის შენობაში გაყიდვების ოფისი გახსნა. არსებული პროექტის თანახმად, კომპანია საქართველოში 6.6 მილიარდი დოლარის ინვესტიციის განხორციელებას გეგმავს. გარდა გონიოსი, კომპანია თბილისის სამხრეთით, კრწანისისა და ფონიჭალის მიმდებარედ 590 ჰექტარზე, მტკვრის მარჯვენა და მარცხენა სანაპიროზე გეგმავს ახალი უბნის განაშენიანებას.
ჯერჯერობით უძრავი ქონების ინვესტორისთვის გადაცემა არ მომხდარა, არც პროექტის გზშ (გარემოზე ზემოქმედების შეფასების) დოკუმენტი არ გამოქვეყნებულა.
