როგორი ეკონომიკური ზრდაა აზერბაიჯანში, სომხეთსა და თურქეთში, რეგიონის ქვეყნების ეკონომიკების სტატისტიკები:

სომხეთი:

სომხეთის სტატისტიკის ეროვნულმა სამსახურის მიერ გამოქვეყნებული ანგარიშის თანახმად, 2024 წლის მაისში ქვეყნის ეკონომიკა წინა წლის ანალოგიურ პერიოდთან შედარებით 5.2%-ით გაიზარდა. სტატისტიკის თანახმად, ეკონომიკურ ზრდაზე დადებითი გავლენა მოახდინა 57%-ით გაზრდილმა ექსპორტმა, რამაც მაისში 957 მილიონი დოლარი შეადგინა.

აზერბაიჯანი:

აზერბაიჯანის სტატისტიკის ეროვნულ კომიტეტს სომხეთისგან განსხვავებით, ივნისის ეკონომიკური ზრდის მაჩვენებლებიც აქვს გამოქვეყნებული, რომლის მიხედვითაც 2024 წლის პირველ 6 თვეში აზერბაიჯანის ეკონომიკა 4.3%-ით გაიზარდა. მათ შორის, სტატისტიკის მიხედვით, ეკონომიკის ზრდის მთავარი მამოძრავებელი ამჟამად არასანავთობო სექტორია, რომელშიც ზრდა 6.9%-ს შეადგენდა.

მთლიანობაში 2024 წლის პირველ 6 თვეში აზერბაიჯანის ეკონომიკის ზომამ 59.5 მილიარდი მანათი შეადგინა.

თურქეთი:

თურქეთი ეკონომიკური ზრდის შედეგებს ყოველთვიურ ჭრილში არ აქვეყნებს, თურქეთის სტატისტიკის სამსახური ზრდას ითვლის კვარტალურ ჭრილში, შესაბამისად ამჟამად ხელმისაწვდომია მხოლოდ 2024 წლის პირველი კვარტალის შედეგი, რაც 5.7%-იან რეალურ ეკონომიკურ ზრდას ასახავდა.

სტატისტიკის სამსახურის თანახმად, 2024 წლის მაისში თურქეთმა უცხოეთში 24.7 მილიარდი დოლარის ღირებულების საქონლის ექსპორტი განახორციელა, რაც წინა წელთან შედარებით 11.3%-ით მეტი იყო, ხოლო იმპორტმა 30.6 მილიარდი დოლარი შეადგინა, რაც წინა წელთან შედარებით 10.4%-ით ნაკლები იყო.

ამასთან, თურქეთში მაღალი ინფლაციის მაჩვენებელი ნარჩუნდება, რამაც 2024 წლის ივნისში 71.6% შეადგინა.

საქართველო:

2024 წლის პირველ 5 თვეში საქართველოს ეკონომიკა 9.3%-ით გაიზარდა, ზრდაზე დადებითი გავლენა მოახდინა IT სექტორის ბრუნვის, ასევე საფინანსო და სადაზღვევო სექტორებში, მშენებლობასა და ლოგისტიკაში არსებულმა მატებამ.

საქსტატი 2024 წლის ივნისის და მიმდინარე წლის პირველი 6 თვის ეკონომიკური ზრდის ამსახველ ანგარიშს 31 ივლისს გამოაქვეყნებს.

წყარო:https://bm.ge/