ხელოვნური ინტელექტი XXI საუკუნის ერთ-ერთი ყველაზე მნიშვნელოვანი და სწრაფად მზარდი ტექნოლოგიაა, რომელსაც ადამიანის ცხოვრების გამარტივება და ბიზნესის ეფექტიანობის დრამატულად გაზრდა შეუძლია.

ხელოვნური ინტელექტის გამოყენება 24-საათიან რეჟიმში, უწყვეტადაა შესაძლებელი, თანაც მას არ აქვს არავითარი პროფილური შეზღუდვა, რაც იმას ნიშნავს, რომ AI-ს ისევე კომპეტენტურად შეუძლია სამართლებრივ დოკუმენტზე მუშაობა, როგორც მხატვრული მოთხრობის შეთხზვა და მაკროეკონომიკის ახსნა.

ანალიტიკოსების პროგნოზით, ხელოვნური ინტელექტი 2030 წლამდე გლობალურ ეკონომიკაში დაახლოებით $15 ტრილიონის დამატებით ღირებულებას შექმნის, ანუ მას უაღრესად პოზიტიური გავლენა ექნება მსოფლიოს განვითარებაზე.

TECH INFORM-ში სტუმრობისას, BDO-ს ციფრული საკონსულტაციო მიმართულების ხელმძღვანელმა, ანზორ მეხრიშვილმა ხელოვნური ინტელექტის პრაქტიკულ გამოყენებაზე ისაუბრა და აღნიშნა, რომ AI-ს გამოყენება ფაქტობრივად ნებისმიერ ფიზიკურ პირს და ბიზნესს შეუძლია თავისი ეფექტიანობის გასაზრდელად.

„ამჟამად ბაზარზე ათობით სხვადასხვა ტიპის ხელოვნური ინტელექტია ხელმისაწვდომი, მათი ფასები კი თვიურად 5-დან 60 დოლარამდე დიაპაზონში მერყეობს, რაც არ არის ზედმეტად ძვირი, იმის გათვალისწინებით, რომ AI-ს დახმარებით დამატებითი შემოსავლის მიღება შეგვიძლია.

რაც შეეხება პრაქტიკულ გამოყენებას, ხელოვნურ ინტელექტს შეგვიძლია დავაწერინოთ გრამატიკულად და შინაარსობრივად გამართული ტექსტი; ასევე, მას შეგვიძლია დავავალოთ ფოტოს, ვიდეოს ან კომპანიის ლოგოს შექმნა. გარდა ამისა, AI-ს დახმარებით შეგვიძლია ვებგვერდის დიზაინის, აპლიკაციის ვიზუალური გაფორმების ან სარეკლამო ბანერის შექმნა.

ასევე, თუ მინდა ვიდეოზე ხმის დადება, მაგრამ არ მაქვს სტუდიაში მისვლის და იქ ხმის ჩაწერის საშუალება, შემიძლია დახმარებისთვის AI-ს მივმართო, რომელიც ტექსტს გაახმოვანებს და მზა აუდიომასალას მომცემს, რომელიც განსხვავებული ხმებით და ტემბრით იქნება ჩაწერილი.

ვერ წარმომიდგენია პროცესი, რომელიც ციფრულ სივრცეში შეიძლება გაკეთდეს და მისი გამარტივება ხელოვნურმა ინტელექტმა ვერ შეძლოს,“ - ამბობს ანზორ მეხრიშვილი.