,
ინფრასტრუქტურის მინისტრი რევაზ სოხაძე, საავტომობილო გზების დეპარტამენტის წარმომადგენლებთან ერთად, ლანდშაფტის არქიტექტურისა და ურბანული დაგეგმარების სფეროში მომუშავე კომპანიების წარმომადგენლებს შეხვდა.
შეხვედრაზე განხილული იყო თანამშრომლობის პერსპექტივები საერთაშორისო მნიშვნელობის ავტომაგისტრალების პროექტებში ლანდშაფტური და ურბანული კომპონენტების ინტეგრირების მიმართულებით. აღინიშნა, რომ თანამედროვე საგზაო ინფრასტრუქტურის განვითარება გულისხმობს არა მხოლოდ გადაადგილების გაუმჯობესებას, არამედ ეკოლოგიური, სოციალური და ვიზუალური ფაქტორების გათვალისწინებასაც.
აღინიშნა გზის მიმდებარე ტერიტორიების გამწვანების მნიშვნელობა, რაც ამცირებს მტვერსა და ხმაურს, აუმჯობესებს ეკოლოგიურ მდგრადობას და ვიზუალურ გარემოს. გამწვანებული ზონები ქმნის კეთილმოწყობილ სივრცეს როგორც მგზავრებისთვის, ისე გზის მიმდებარე დასახლებების მოსახლეობისთვის.
რევაზ სოხაძემ შეხვედრის მონაწილეებს გააცნო სამინისტროს ინიციატივა – ჩატარდეს ავტომაგისტრალების მიმდებარედ ლანდშაფტის აღდგენა-გაუმჯობესების პოტენციური ადგილების პროექტირება, რომელიც მოიცავს საერთაშორისო მნიშვნელობის მაგისტრალურ გზებს თბილისი-ბათუმის მიმართულებით და კახეთის ჩქაროსნული ავტომაგისტრალის მონაკვეთს.
შეხვედრაში მონაწილეობდნენ ინფრასტრუქტურის მინისტრის მოადგილე მზია გიორგობიანი, საავტომობილო გზების დეპარტამენტის თავმჯდომარე ლევან დარახველიძე და დეპარტამენტის სხვა წარმომადგენლები.
აშშ-მა ვენესუელური Cartel de los Soles-ი უცხოურ ტერორისტულ ორგანიზაციად გამოაცხადა, - ინფორმაციას The Hill-ი აშშ-ის ფედერალურ რეესტრზე დაყრდნობით ავრცელებს.
აშშ-ის სახელმწიფო დეპარტამენტმა ვენესუელის პრეზიდენტთან, ნიკოლას მადუროსთან დაკავშირებული Cartel de los Soles-ისთვის უცხოური ტერორისტული ორგანიზაციის სტატუსის მინიჭების შესახებ ოფიციალურად გამოაცხადა.
გამოცემის ცნობით, Cartel de los Soles-ის უცხოურ ტერორისტულ ორგანიზაციად გამოცხადება დონალდ ტრამპის ადმინისტრაციას ნიკოლას მადუროს წინააღმდეგ მოქმედებისთვის დამატებით შესაძლებლობას ანიჭებს.
„გადაწყვეტილება თეთრ სახლს უფრო ფართო უფლებამოსილებას მისცემს, რათა სანქციები დააწესოს და მადუროს აქტივებზე ზეწოლა განახორციელოს“, - წერს გამოცემა.
აშშ-ის სახელმწიფო დეპარტამენტის გადაწყვეტილებას ვენესუელის საგარეო საქმეთა მინისტრი, ივან გილი გამოეხმაურა და განაცხადა, რომ „მიზანი ვენესუელის წინააღმდეგ უკანონო ინტერვენციაა“.
„ვენესუელა კატეგორიულად უარყოფს აშშ-ის სახელმწიფო მდივნის, მარკო რუბიოს ახალ და აბსურდულ გამოგონებას. ამ ნაბიჯის მიზანი ვენესუელის წინააღმდეგ უკანონო ინტერვენციის გამართლებაა, აშშ-ის კლასიკური რეჟიმის შეცვლის ფორმატით. ამ მანევრსაც იგივე ელის, რაც ჩვენი ქვეყნის წინააღმდეგ განხორციელებულ ყველა აგრესიას: წარუმატებლობა“, - აღნიშნა ვენესუელის საგარეო საქმეთა მინისტრმა.
