,
,,მინდა საზოგადოებას კიდევ ერთხელ განვუმარტო, თუ რას ნიშნავს ეგრეთ წოდებული თეთრია სია. ეს არის იმ კომპანიების ჩამონათვალი, რომლებიც გარკვეული კრიტერიუმების დაკმაყოფილების შემდეგ მოხვდნენ ამ სიაში და გარკვეული ბენეფიტებით და შეღავათებით სარგებლობენ სახელმწიფოს მხრიდან. თუმცა, ამ კრიტერიუმების სამართლიანობასა და ობიექტურობაზე თავად კერძო სექტორშიც არსებობს გარკვეული კითხვის ნიშნები’’-ამის შესახებ ინფრასტრუქტურის მინისტრმა, რევაზ სოხაძემ საზოგადოებრივი მაუწყებლის გადაცემა ,,ბიზნესპარტნიორში’’ სტუმრობისას განაცხადა.
მინისტრის განმარტებით, „თეთრ სიაში“ მოხვედრილი კომპანიები, სხვა შეღავათებთან ერთად, სარგებლობენ დაწესებული წესებისგან გამონაკლისებით ავანსების გაცემისას, რაც მნიშვნელოვან ფინანსურ რისკს აჩენს სახელმწიფოსთვის. მისი თქმით სწორედ ამიტომ გახდა საჭირო მასში შეტანილი კომპანიებისთვის მოქმედი პრივილეგიების გადახედვა.
„მაგალითად, თუ კომპანიამ კონტრაქტის მიხედვით მიიღო 20%-იანი ავანსი, ამ თანხიდან მხოლოდ ნახევარია უზრუნველყოფილი საბანკო გარანტიით. დანარჩენი 10% პრაქტიკულად ‘ჰაერშია’’, ანუ არ აქვს არანაირი ფინანსური უზრუნველყოფა. ეს კი ნიშნავს, რომ სახელმწიფო მთლიანად იღებს ამ რისკს საკუთარ თავზე’’- აღნიშნა მინისტრმა.
მისივე თქმით, დღეს ქვეყანაში არაერთი კონტრაქტია, სადაც ათეულობით მილიონი ლარია გადახდილი, სამუშაოები კი სრულად არ არის შესრულებული. კონტრაქტის გაწყვეტის შემთხვევაში კი, ბიუჯეტისთვის გადახდილი თანხის დაბრუნება ხშირ შემთხვევაში კითხვის ნიშნის ქვეშ დგება.
„ამ ყველაფრის ფონზე სრულიად ლოგიკურია, რომ მივიღეთ გადაწყვეტილება ე.წ. თეთრი სიის პრინციპის გადახედვის შესახებ. ეს არანაირად არ გულისხმობს ბიზნესის შეზღუდვას -ჩვენი მიზანია, რომ არსებობდეს გამჭვირვალე, სამართლიანი და რისკზე დაფუძნებული მიდგომა, რაც ერთი მხრივ ბიზნესსაც დაეხმარება, ხოლო მეორე მხრივ დაიცავს სახელმწიფოს ფინანსურ ინტერესს,“ - განაცხადა მინისტრმა.
მისივე თქმით, სამინისტრო მომავალშიც გააგრძელებს დიალოგს ბიზნესთან, თუმცა მთავარი პრინციპი უცვლელია -საზოგადოებრივი რესურსის სწორად, გამჭვირვალედ და პასუხისმგებლიანად განკარგვა.
აშშ-მა ვენესუელური Cartel de los Soles-ი უცხოურ ტერორისტულ ორგანიზაციად გამოაცხადა, - ინფორმაციას The Hill-ი აშშ-ის ფედერალურ რეესტრზე დაყრდნობით ავრცელებს.
აშშ-ის სახელმწიფო დეპარტამენტმა ვენესუელის პრეზიდენტთან, ნიკოლას მადუროსთან დაკავშირებული Cartel de los Soles-ისთვის უცხოური ტერორისტული ორგანიზაციის სტატუსის მინიჭების შესახებ ოფიციალურად გამოაცხადა.
გამოცემის ცნობით, Cartel de los Soles-ის უცხოურ ტერორისტულ ორგანიზაციად გამოცხადება დონალდ ტრამპის ადმინისტრაციას ნიკოლას მადუროს წინააღმდეგ მოქმედებისთვის დამატებით შესაძლებლობას ანიჭებს.
„გადაწყვეტილება თეთრ სახლს უფრო ფართო უფლებამოსილებას მისცემს, რათა სანქციები დააწესოს და მადუროს აქტივებზე ზეწოლა განახორციელოს“, - წერს გამოცემა.
აშშ-ის სახელმწიფო დეპარტამენტის გადაწყვეტილებას ვენესუელის საგარეო საქმეთა მინისტრი, ივან გილი გამოეხმაურა და განაცხადა, რომ „მიზანი ვენესუელის წინააღმდეგ უკანონო ინტერვენციაა“.
„ვენესუელა კატეგორიულად უარყოფს აშშ-ის სახელმწიფო მდივნის, მარკო რუბიოს ახალ და აბსურდულ გამოგონებას. ამ ნაბიჯის მიზანი ვენესუელის წინააღმდეგ უკანონო ინტერვენციის გამართლებაა, აშშ-ის კლასიკური რეჟიმის შეცვლის ფორმატით. ამ მანევრსაც იგივე ელის, რაც ჩვენი ქვეყნის წინააღმდეგ განხორციელებულ ყველა აგრესიას: წარუმატებლობა“, - აღნიშნა ვენესუელის საგარეო საქმეთა მინისტრმა.
