ჩინეთის ისტორიაში ყველაზე წარმატებული მეწარმე და ბიზნესმენი, ჯეკ მა საკუთარი ტექნოლოგიური კომპანიის, Ant Group-ის კონტროლს ოფიციალურად თმობს. წილობრივი გადანაწილების სტრუქტურის ცვლილებამდე ჯეკ მა კომპანიის 50.52%-ს ფლობა, ახლა კი მილიარდერის წილი Ant Group-ში სულ რაღაც 6%-მდეა შემცირებული.

Ant Group-ი რეგიონის მასშტაბით უმსხვილეს საფინანსო პლატფორმას Alipay-ს ფლობს, რომლითაც 1.3 მილიარდამდე მომხმარებელი და 80 მილიონამდე ბიზნესი სარგებლობს. ექსპერტების შეფასებით, საფონდო ბირჟაზე განთავსების შემთხვევაში, Ant Group-ის საბაზრო კაპიტალიზაცია $300-მილიარდიან ნიშნულს მიაღწევდა, რაც მას მსოფლიოს ერთ-ერთ ყველაზე ძვირად ღირებულ ფინ-ტექ კომპანიად აქცევდა.

2019-2020 წლებში ჯეკ მა ჩინეთის უმდიდრესი ადამიანი იყო და მისი ქონება $60-მილიარდიან ნიშნულს აღწევდა, თუმცა მმართველ კომუნისტურ მთავრობასთან საჯაროდ დაპირისპირების შემდეგ, მა უმწვავესი პოლიტიკური ზეწოლის წინაშე აღმოჩნდა.

ჯეკ მას მრავალმილიარდიანი ბიზნესიმპერიის დაღმასვლა 2020 წლის 24 ოქტომბერს დაიწყო, როდესაც მან საჯარო კონფერენციაზე ჩინეთის მთავრობა და მარეგულირებელი ორგანო გააკრიტიკა და მათ პოლიტიკას „შემზღუდავი“ უწოდა.

მისი სიტყვით გამოსვლიდან რამდენიმე დღეში Ant Group-ის $37 მილიარდიანი პირველადი საჯარო შეთავაზება (IPO), რომელიც მსოფლიოში ერთ-ერთი უმსხვილესი გარიგება უნდა ყოფილიყო, ჩინეთის მთავრობამ დაბლოკა. ამის შემდეგ, მისი კომპანიების წინააღმდეგ აღიძრა არაერთი საქმე და დაიწყო მრავალწლიანი საგამოძიებო პროცესი, რომლის ფარგლებში მარეგულირებელმა ორგანომ კომპანია Alibaba რეკორდული 2.8 მილიარდი დოლარით დააჯარიმა. გასულ წელს მთავრობამ Ant Group-იც დააჯარიმა, ამ შემთხვევაში კომპანიას $1 მილიარდი გადახდა დაეკისრა.

მთავრობისგან მომავალი მზარდი ზეწოლის ფონზე, სულ უფრო მეტად მცირდება ჯეკ მას ჩართულობა Alibaba-ს მართვის პროცესშიც. 2013 წელს ის კომპანიის გენერალური დირექტორის თანამდებობიდან გადადგა, 2019 წელს კი მან საბჭოც დატოვა. ამჟამად ჯეკ მა $272-მილიარდიანი საბაზრო კაპიტალიზაციის მქონე ტექნოლოგიური გიგანტის 5%-იან წილს ფლობს.

Ant Group-ზე კონტროლის დათმობის სიახლე ინვესტორებმა უაღრესად პოზიტიურად მიიღეს: Alibaba-ს აქციების ღირებულება ერთ დღეში 8%-ით გაიზარდა და კომპანიის საბაზრო კაპიტალიზაციამ 285 მილიარდ დოლარს მიაღწია.

როგორც ჩანს, პერსონა ნონ-გრატად გამოცხადებული მილიარდერი მეწარმის ჩამოშორებას და Alibaba-სა თუ Ant Group-ის დღის წესრიგიდან ჯეკ მას გაქრობის სიახლეს ინვესტორები დადებითად იღებენ, რადგან ზემოხსენებული მოცემულობა მნიშვნელოვნად ამცირებს მთავრობის მხრიდან მომავალ რისკებს და კომპანიებს განვითარების საშუალებას აძლევს.