,
2023 წლის 30-31 ივლისის შეჯამება უკრაინაში:
- The Wall Street Journal სატელიტურ ფოტოს აქვეყნებს ტოკმაკის ირგვლივ, ზაპორიჟიას ოლქში და აღნიშნავს, რომ მთელი ფრონტის ხაზი მაქსიმალურადაა ფორტიფიცირებული. პრაქტიკულად, ყოველ რამდენიმე კილომეტრში რამდენიმე შრიანი თავდაცვის ზღუდეები, სანგრები, დანაღმული ველებია გაშლილი. საინტერესოა ისიც, რომ ჟურნალის ინფორმაციით, ფორტიფიკაციული ნაგებობები ბევრია თავად რუსეთშიც, ისევე როგორც ყირიმისაკენ მიმავალ გზაზე და უშუალოდ ყირიმშიც კი. ზოგადად, რუსულ არმიას ყველაზე კარგად სამხრეთის, ზაპორიჟიასა და ხერსონის ოლქების ოკუპირებული ნაწილები აქვს გამაგრებული. სწორედ ამიტომაა, რომ იქ შეტევა და წინააღმდეგობის გადალახვა საკმაოდ რთული ამოცანაა.
- ბოლო ორი დღეა პერიოდულად იბომბება რუსეთი,, ბრიანსკის ოლქი, სადაც ლოჯისტიკური მომარაგების ხაზებისა და სამხედრო კოლონების გარდა იბომბება საარტილერიო პოზიციებიც. უკრაინელები ყოფილ ჰაერსაწინააღმდეგო მოდიფიცირებულ რაკეტებს იყენებენ.
- მოსკოვის ოლქში და უშალოდ მოსკოვში დრონები აღარავის უკვირს. მაგრამ საინტერესო ტენდენციაა - ომის შემსწავლელი ინსტიტუტი (ISW) აღნიშნავს, რომ რუსი სამხედრო მიმომხილველები აღარ წერენ ნეგატიურ ინფორმაციას და მხოლოდ ჩამოგდებულ უკრაინულ რაკეტებსა და დრონებზე ამახვილებენ ყურადღებას. ანუ მაგალითად შეიძლება თქვან, რომ 24 უკრაინული დრონი იქნა ჩამოგდებული, მაგრამ არ აღნიშნავენ, რომ 26 დრონი იქნა გაშვებული და აქედან 2 ვერ ჩამოგადეს. ანუ რა გამოვა? იმ 2 დრონზე აღარავინ აღარ ისაუბრებს. საინტერესოა კიდევ ერთი ტენდენცია: თუკი რაიმე რუსებს თავად შეეშალათ ან თავად მოუვიდათ აუცილებლად აბრალებენ უკრაინელებს. მარტივია ასე და იმიტომ. თუმცა, როდესაც პრობლემის წყარო არ იცი და თავს იტყუებ მხოლოდ საკუთარ თავს აზარალებ.
მეტიც, ხშირად ომის მიმოხილვა უბრალოდ შავ ტყუილზეა აგებული - მაგალითად ჩონჰარის სარკინიგზო ხიდის დაბომბვისას (ხერსონი-ყირიმი) რუსული პროპაგანდა ამბობდა, რომ არაფერი სერიოზული არ ხდება მაშინ, როდესაც ირკვევა რომ რკინიგზა და ელექტრონული ხაზები ამ მიმართულებით ძლიერ დაზიანდა.
- მარიუპოლში პარტიზანები მოქმედებენ, რომელთაც რუსების მიერ ოკუპირებული სამხედრო დანიშნულების საწარმო ააფეთქეს, რომელშიც რუსი სამხედროებიც იმყოფებოდნენ.
- ბახმუტის სამხრეთით, კლიშჩიივკაში შეტაკებები გრძელდება. უკრაინელებს დასახლების ნახევარი უკავითა და ყოველი სახლის გაწმენდა მიმდინარეობს. არის ვერსია, რომ რეალურად, რუსების ცენტრალურმა დანაყოფებმა დასახლება დატოვეს, მაგრამ ისეთ პოზიციებზე არიან განთავსებული, რომ ვერც უკრაინელები ახერხებენ კლიშჩიივკას მთელს პერიმეტრზე შესვლას, რადგან რუსების სამიზნედ შეიძლება იქცნენ. ამასთან, დასახლებაში რუსული დივერსიული ჯგუფები კვლავ არიან და სწრაფად გადაადგილდებიან, რაც მისთვის ბრძოლას ართულებს. ასეა თუ ისე, საკმაოდ ბუნდოვანი სურათია კლიშჩიივკადან და უნდა ითქვას ისიც, რომ როგორც ჩანს რუსები იმაზე დიდ მნიშვნელობას ანიჭებენ მას, ვიდრე სამხედრო თვალსაზრისით შეიძლება ჰქონდეს. ამის მიზეზი კი ისაა, რომ კლიშჩიივკაზე ბახმუტისაკენ მიმავალი რკინიგზის ხაზი გადის, რომლის აღმოსავლეთითაც რუსებს ბევრი ფორტიფიკაცია აღარ აქვთ.
- ლუგანსკის ოლქში, სვატოვეს მიმართულებით უკრაინელები არიან ახლა კონტრშეტევაზე. რუსებმა რა ტერიტორიებიც ბოლო ერთ თვეში დაიკავეს, უკრაინელებმა მათი ნაწილი უკან დაიბრუნეს. შეტაკებები ახლაც გრძელდება. სავარაუდოა, რომ რუსებს რეზერვების მიშველება მოუწევთ ამ მიმართულებით უკრაინელთა კონტრშეტევის შესაჩერებლად და ინიციატივის დასაბრუნებლად, რადგან სხვა შემთხვევაში კონტრშეტევა საკმაოდ საშიშია ხოლმე.
- კვლავ აფეთქებებია ყირიმში. ამჯერად ეპიცენტრი ცენტრალური ქალაქი სიმფეროპოლია.
- რუსეთის ხელისუფლება ჩრდილოეთ კორეასთან აქტიურ მოლაპარაკებას აწარმოებს თვითმავალი არტილერიის შესაძენად. იმ ფონზე, რომ ჩრდილოეთ კორეა არტილერიის მსოფლიოში ერთ-ერთი ყველაზე აქტიური მწარმოებელია, კრემლის მხრიდან ფხენიანის კარზე ყოფნა უცნაური სულაც არ არის. მაგრამ საინტერესო ისაა, თუ რას მოითხოვს ჩრდილოეთ კორეა მოსკოვისაგან. ამის მხოლოდ სპეკულაცია შეგვიძლია.
- რუსეთ-აფრიკის სამიტზე გადაწყდა, რომ რუსეთი აფრიკულ ქვეყნებს 23 მილიარდ ვალს ჩამოუწერს. რატომაა ეს მნიშვნელოვანი? რუსეთისათვის ახლა ფული მნიშვნელოვანია, მაგრამ პოლიტიკური ზეგავლენების მოპოვება კიდევ უფრო მნიშვნელოვანი. რას მოითხოვს სანაცვლოდ მოსკოვი? ცხადია პოლიტიკურ მხარდაჭერას, მაგრამ ამის გარდა შესაძლოა მოხალისე მეომრები, რესურსები, სამხედრო ბაზების განთავსება და ნებისმიერი სხვა რამ. რეალურად, სუბ-საჰარის აფრიკაში დღეს მთავარ მოთამაშეებად ჩინეთი და რუსეთი გვევლინება. საინტერესო ისაა, ჩინეთისა და რუსეთის ინტერესები ხომ არ გადაიკვეთება რეგიონში? უკვე ვნახეთ, რუსეთის დასუსტების ფონზე თუ როგორ ითვისებს შუა აზიას ჩინეთი.
- უკრაინასა და ხორვატიას შორის შეთანხმებები შედგა, რომლის მიხედვითაც უკრაინა ხორვატიის პორტებს გამოიყენებს ხორბლის გადასატანად. იქამდე კი დუნაის გავლით მოხვდება თუ სახმელეთო გზით არაა ცნობილი.
მიყევით ბმულს - გიორგი კობერიძე
ბრიტანულ გაზეთ „ფაინენშელ თაიმსში“ (Financial Times) დაბეჭდილია სტატია სათაურით „მსოფლიოში არასტაბილურობა სუფევს, ამიტომ ევროპა უნდა შეიარაღდეს“, რომლის ავტორები არიან ფრიდრიხ მერცი (გერმანიის კანცლერი) და ემანუელ მაკრონი (საფრანგეთის პრეზიდენტი).
გთავაზობთ სტატიის შინაარსს:
„ჰააგაში ნატოს სამიტის ფონზე მსოფლიოში ქაოსური მოვლენები სუფევს: ბობოქრობენ ომები, ჩვეული ქცევის წესები და ნორმები ინგრევა, ხოლო დიდი ხნით განმტკიცებული რწმენები ეჭვის ქვეშ დგება. ამ ეპოქალური გამოცდის ჟამს გერმანია და საფრანგეთი - თავიანთ ევროპელ და ატლანტის ოკეანის გაღმა ნაპირზე მყოფ მეგობრებთან და მოკავშირეებთან ერთად ერთიანი და მტკიცე ფრონტით გამოდიან, რათა დაიცვან ჩვენი საერთო ფასეულობები, ჩვენი მოქალაქეების თავისუფლება და უსაფრთხოება“, - ნათქვამია სტატიის დასაწყისში.
ავტორთა აზრით, „ევროპაში არასტაბილურობის ძირითად წყაროს რუსეთი და მისი იმპერიალისტური ომები წარმოადგენს: „2008 წელს რუსეთი თავს დაესხა საქართველოს, შემდეგ, 2014 წელს - მოახდინა ყირიმისა და დონბასის ოკუპაცია, 2022 წელს კი კრემლის ჯარები უკრაინის დანარჩენ ტერიტორიაზე შეიჭრნენ. ვლადიმერ პუტინის მიზანია ძირი გამოუთხაროს ევროპულ უსაფრთხოებას, მეზობლებს თავს მოახვიოს უკანონო მეურვეობა, ისინი შიგნიდან გატეხოს და თავის ორბიტაზე გადაიყვანოს, საერთაშორისო მართლწესრიგს საფუძველი შეურყიოს. ეს ყველაფერი რუსეთის სტრატეგიულ ინტერესებს წარმოადგენს. ჩვენ არ შეგვიძლია ამ ყველაფერს შევურიგდეთ, ჩვენს კონტინენტზე მშვიდობა უნდა დავიცვათ“.
„თუ კრემლის ამჟამინდელი პოლიტიკის ტრაექტორია არ შეიცვლება, რუსეთი საფრანგეთისა და გერმანიის ურყევ და მტკიცე პოზიციის წინაშე აღმოჩნდება. ამჟამად სასწორზე დევს ევროპული სტაბილურობის ბედი ათწლეულების განმავლობაში.
ნატოს სამიტზე საფრანგეთი და გერმანია დაადასტურებენ თავიანთ მხარდაჭერას იმ ძალისხმევისადმი, რასაც აშშ მიმართავს კონფლიქტების შეწყვეტისათვის და მტკიცე მშვიდობის მისაღწევად. საფრანგეთი და გერმანია მხარს დაუჭერენ უკრაინის სუვერენიტეტს, ცეცხლის შეწყვეტის წინადადებას და გააძლიერებენ რუსეთზე ზეწოლას, მათ შორის სანქციების მეშვეობით“, - აღნიშნავენ სტატიის ავტორები, - „ჩვენ ვუზრუნველყოფთ, რომ უკრაინა კონფლიქტიდან გამოსვლის შემდეგ აყვავებული, ძლიერი და უსაფრთხო ქვეყანა გახდეს“.
როგორც სტატიაშია ნათქვამი, ამ მხრივ უკვე ბევრი რამ არის გაკეთებული - ევროკავშირი უკრაინას 130 მილიარდი ევროთი დაეხმარა. გარდა ამისა, ევროკავშირმა დაგმო კრემლის აგრესიული პოლიტიკა, რისთვისაც რუსეთს მკაცრი სანქციები აქვს დაწესებული. „მაგრამ ეს კიდევ ცოტაა. ამიტომ ჩვენ, დიდ ბრიტანეთთან ერთად, ხელს შევუწყობთ უკრაინის არმიის გაძლიერებას, განვაახლებთ უკრაინის თავდაცვით მრეწველობას იმ მიზნით, რომ სამომავლოდ მას რუსეთის სავარაუდო აგრესიის წარმატებით მოგერიება შეძლოს.
„რა თქმა უნდა, ჩვენი გეგმები მხოლოდ უკრაინას არ ეხება. როგორც ჩანს, ახლო მომავალში კონფლიქტურ გარემოში ცხოვრება მოგვიწევს - იმ მსოფლიოში, სადაც ჩვენი მოკავშირეების წინაშე ახალი დილემები და პრიორიტეტები დადგება. რუსეთის გარდა, ჩვენ, ალბათ, კიდევ ბევრი გამოწვევის მოწმენი გავხდებით. ამისათვის ახლავე უნდა ვიზრუნოთ“, - აღნიშნავენ ავტორები და იქვე მიუთითებენ: აუცილებელია ნატოს გაძლიერება - თავდაცვის სფეროს ალიანსის წევრების საერთო ბიუჯეტის 3,5% უნდა მოხმარდეს, 2%-ის ნაცვლად. დამატებითი ხარჯები აუცილებელია. მათი მეშვეობით ჩვენ იმ ბზარს ამოვავსებთ, რომელიც ნატოს სამხედრო პოტენციალს გაუჩნდა რევანშისტული რუსეთის პირისპირ“, - ხაზს უსვამენ ავტორები.
„ალიანსის უსაფრთხოების ქვაკუთხედად ბირთვული შეკავება რჩება: საფრანგეთს აქვს თავისი დამოუკიდებელი სტრატეგიული ბირთვული ძალები, რომლებსაც მნიშვნელოვანი წვლილი შეაქვთ ნატოს საერთო უსაფრთხოების დაცვაში. გერმანიას უფლება აქვს მონაწილეობა მიიღოს ნატოს ბირთვული იარაღის ერთობლივ გამოყენებაში. გარდა ამისა, ერთობლივად ვიმუშავებთ შესყიდვების სისტემის რეფორმირებაში, რომელიც გამოიხატება უნიფიკაციაში, გამარტივებასა და გაზრდაში“, - ნათქვამია სტატიაში.
პუბლიკაციის დასასრულს, ავტორები აღნიშნავენ, რომ ნატო გააგრძელებს მჭიდრო თანამშრომლობას ევროკავშირთან, რათა უკეთ იქნას გამოყენებული ევროპის ტექნოლოგიური უპირატესობა [რუსეთის წინააღმდეგ]. „ჩვენ ვადასტურებთ სამოკავშირეო ერთიანობას, სოლიდარობას და ერთგულებას ჩვენი კონტინენტის თავისუფლების, მშვიდობისა და უსაფრთხოებისათვის“.
