,
2023 წლის 28-29 ივლისის შეჯამება უკრაინაში:
- სამხრეთის მიმართულებით, დონეცკისა და ზაპორიჟიას ოლქების სიახლოვეს, უკრაინულ არმია უროჟაინეს უტევს. მეორე ნაწილი კი სტარომაიორსკედან სამხრეთით ცდილობს გადაადგილებას. უროჟაინე სტარომაიორსკეს მომიჯნავედ, მდინარის გადაღმა მდებარეობს. უკრაინელებს საკმაოდ მეთოდური და კარგად ორგანიზებული შეტევის ფონზე რუსები თავს ეფექტურად ვერ ართმევენ უკრაინელთა დაწოლას. ივნისიდან მოყოლებული ამ მიმართულებით 6 დასახლება გაათავისუფლეს უკრაინელებმა. თან ყველა მათგანში რუსებს ძლიერი შემტევი ნაწილები ჰყავდათ განლაგებული. მიუხედავად ამ დინამიური წინსვლისა რუსული მთავარი საფორტიფიკაციო ნაგებობები უფრო სამხრეთითაა მოქცეული, ხოლო ერთ-ერთი მნიშვნელოვანი სამეთაურო პუნქტი სტარომლინივკაში ჯერ კიდევ ასაღებია.
ფრონტის ხაზზე ეს მონაკვეთი საკვანძოდ მნიშვნელოვანია. აქედან გზა მარიუპოლისაკენ მიდის, თუმცა რუსული ფორტიფიკაციების გადალახვის შემთხვევაში ბევრი სხვა მანევრის განხორციელებაც შეეძლებათ როგორც ზაპორიჟიას ოლქის მიმართულებით ისე დონეცკის ოლქში.
- ზაპორიჟიას ოლქში, ორიხივი-ტოკმაკის მონაკვეთზე უკრაინელები არამხოლოდ აგრძელებენ რობოტინოზე შეტევას, არამედ უფრო სამხრეთ-დასავლეთით 6 კილომეტრში, ვერბოვეს სიახლოვეს, რუსულ თავდაცვის ძირითად ხაზს უტევენ. უკრაინული ჯავშანტექნიკა უკვე გამოჩნდა ე.წ. "დრაკონის კბილებთან" და ტანკსაწინააღმდეგო თხილებთან. საკმაოდ გრძელია ფორტიფიცირებული ნაგებობები და მისი გადალახვა არ იქნება ადვილი, მაგრამ რობოტინოს მიღმა უკრაინული დაწოლა ვერბოვეზე რომ გაძლიერდა ეს მხოლოდ იმედისმომცემია, მით უფრო რომ უკრაინელები დასავლურ ტექნიკას არ ზოგავენ გადაადგილებისათვის. CNN-ი ზაპორიჟიას მიმართულების ამ მონაკვეთის შეფასებისას აღნიშნავს, რომ მიმდინარეობს მასშტაბური გამოფიტვის პროცესი.
- რუსული წყაროები იტყობინებიან, რომ კიდევ ერთხელ დაიბომბა ყირიმიდან გამოსასვლელი ჩონგარის ხიდი, რომელიც ნახევარკუნძულს ხერსონის ოლქს აკავშირებს. ამჯერად დარტყმა არამხოლოდ საგზაო არამედ სარკინიგზო ინფრასტრუქტურაზეც მოხდა. რუსები წერენ რომ გამოყენებული იყო Storm Shadow ტიპის ფრთოსანი რაკეტები.
- ბახმუტის სამხრეთით კლიშჩიივკაში სიტუაცია საკმაოდ ბუნდოვანია. დასახლების ნახევარი უკრაინელთა ხელშია. რუსული რეზერვის ჩართვის შემდეგ უკრაინელებმა მცირედით უკან დაიხიეს და შემდეგ კონტრშეტევა წამოიწყეს. საბრძოლო მოქმედებები ისევ დასახლებაში მიმდინარეობს. ზოგადად, სიტუაცია ბახმუტის ირგვლივ ანუ ზუსტად ვინ რას აკონტროლებს - არ არის ნათელი და ცვალებადია. ამასთან, უკრაინელები ინტენსიურად ბომბავენ ქალაქ ბახმუტში მყოფ რუსულ დანაყოფებს. ბახმუტი რუსებმა თავიანთი პროპაგანდის მეშვეობით მეორე მარიუპოლად აქციეს. სწორედ ამიტომაა, რომ მის შემოგარენში ასეთი დიდი რაოდენობით აგზავნიან რუსები რეზერვებს.
ამ ფონზე, ბახმუტის მიმართულებით უკრაინის პრეზიდენტი ვოლოდიმირ ზელენსკი ჩავიდა და სპეციალური დანაყოფის წევრების შეხვდა.
- ჩრდილოეთ კორეას საარტილერიო ჭურვების ერთ-ერთი ყველაზე დიდი რეზერვი და წარმოება გააჩნია. სწორედ ისაა რუსეთისათვის იარაღის ერთ-ერთი მიმწოდებელი ამ სფეროში. არის ვერსია, რომ უკრაინელებს ჩაუვარდათ ხელში კორეული საარტილერიო ჭურვები მას შემდეგ რაც იარაღით დატვირთული გემი დაუკონკრეტებელ მოკავშირე ქვეყანამ შეიპყრო. საკმაოდ ბევრი დეტალი უცნობია, თუმცა ასეთი რამ სრულიად შესაძლებელია.
- ლუგანსკის ოლქში, სვატოვეს მონაკვეთზე ამ ეტაპზე რუსული შეტევა შეჩერებული და მოგერიებულია. ახლა უკვე უკრაინელებმა წამოიწყეს კონტრშეტევა და ცდილობენ რუსების მიერ თვეზე მეტი ხნის განმავლობაში მოპოვებული ტერიტორიები დაიბრუნონ.
უფრო სამხრეთით კი, კრემინას ტყეში და მის სიახლოვეს, მასშტაბური საბრძოლო მოქმედებები გრძელდება. აქ ორივე მხარე საკმაოდ აქტიურია და შეტაკებებიც ინტენსიურია.
- არის ვერსია, რომ რუსეთის სამარას ნავთობგადამამუშავებელი ქარხნის ტერიტორიაზე უკრაინაში დაბადებულმა თანამშრომელმა ასაფეთქებელი ნივთიერება შეიტანა და სადგური დააზიანა. რეალურია თუ არა ეს ინფორმაცია ნაკლებსავარაუდოა გავიგოთ, მაგრამ ის, რომ უკრაინული აგენტურული ქსელი რუსეთში ნამდვილად ეფექტურად მუშაობს ეს ცხადია.
მიყევით ბმულს - გიორგი კობერიძე
ბრიტანულ გაზეთ „ფაინენშელ თაიმსში“ (Financial Times) დაბეჭდილია სტატია სათაურით „მსოფლიოში არასტაბილურობა სუფევს, ამიტომ ევროპა უნდა შეიარაღდეს“, რომლის ავტორები არიან ფრიდრიხ მერცი (გერმანიის კანცლერი) და ემანუელ მაკრონი (საფრანგეთის პრეზიდენტი).
გთავაზობთ სტატიის შინაარსს:
„ჰააგაში ნატოს სამიტის ფონზე მსოფლიოში ქაოსური მოვლენები სუფევს: ბობოქრობენ ომები, ჩვეული ქცევის წესები და ნორმები ინგრევა, ხოლო დიდი ხნით განმტკიცებული რწმენები ეჭვის ქვეშ დგება. ამ ეპოქალური გამოცდის ჟამს გერმანია და საფრანგეთი - თავიანთ ევროპელ და ატლანტის ოკეანის გაღმა ნაპირზე მყოფ მეგობრებთან და მოკავშირეებთან ერთად ერთიანი და მტკიცე ფრონტით გამოდიან, რათა დაიცვან ჩვენი საერთო ფასეულობები, ჩვენი მოქალაქეების თავისუფლება და უსაფრთხოება“, - ნათქვამია სტატიის დასაწყისში.
ავტორთა აზრით, „ევროპაში არასტაბილურობის ძირითად წყაროს რუსეთი და მისი იმპერიალისტური ომები წარმოადგენს: „2008 წელს რუსეთი თავს დაესხა საქართველოს, შემდეგ, 2014 წელს - მოახდინა ყირიმისა და დონბასის ოკუპაცია, 2022 წელს კი კრემლის ჯარები უკრაინის დანარჩენ ტერიტორიაზე შეიჭრნენ. ვლადიმერ პუტინის მიზანია ძირი გამოუთხაროს ევროპულ უსაფრთხოებას, მეზობლებს თავს მოახვიოს უკანონო მეურვეობა, ისინი შიგნიდან გატეხოს და თავის ორბიტაზე გადაიყვანოს, საერთაშორისო მართლწესრიგს საფუძველი შეურყიოს. ეს ყველაფერი რუსეთის სტრატეგიულ ინტერესებს წარმოადგენს. ჩვენ არ შეგვიძლია ამ ყველაფერს შევურიგდეთ, ჩვენს კონტინენტზე მშვიდობა უნდა დავიცვათ“.
„თუ კრემლის ამჟამინდელი პოლიტიკის ტრაექტორია არ შეიცვლება, რუსეთი საფრანგეთისა და გერმანიის ურყევ და მტკიცე პოზიციის წინაშე აღმოჩნდება. ამჟამად სასწორზე დევს ევროპული სტაბილურობის ბედი ათწლეულების განმავლობაში.
ნატოს სამიტზე საფრანგეთი და გერმანია დაადასტურებენ თავიანთ მხარდაჭერას იმ ძალისხმევისადმი, რასაც აშშ მიმართავს კონფლიქტების შეწყვეტისათვის და მტკიცე მშვიდობის მისაღწევად. საფრანგეთი და გერმანია მხარს დაუჭერენ უკრაინის სუვერენიტეტს, ცეცხლის შეწყვეტის წინადადებას და გააძლიერებენ რუსეთზე ზეწოლას, მათ შორის სანქციების მეშვეობით“, - აღნიშნავენ სტატიის ავტორები, - „ჩვენ ვუზრუნველყოფთ, რომ უკრაინა კონფლიქტიდან გამოსვლის შემდეგ აყვავებული, ძლიერი და უსაფრთხო ქვეყანა გახდეს“.
როგორც სტატიაშია ნათქვამი, ამ მხრივ უკვე ბევრი რამ არის გაკეთებული - ევროკავშირი უკრაინას 130 მილიარდი ევროთი დაეხმარა. გარდა ამისა, ევროკავშირმა დაგმო კრემლის აგრესიული პოლიტიკა, რისთვისაც რუსეთს მკაცრი სანქციები აქვს დაწესებული. „მაგრამ ეს კიდევ ცოტაა. ამიტომ ჩვენ, დიდ ბრიტანეთთან ერთად, ხელს შევუწყობთ უკრაინის არმიის გაძლიერებას, განვაახლებთ უკრაინის თავდაცვით მრეწველობას იმ მიზნით, რომ სამომავლოდ მას რუსეთის სავარაუდო აგრესიის წარმატებით მოგერიება შეძლოს.
„რა თქმა უნდა, ჩვენი გეგმები მხოლოდ უკრაინას არ ეხება. როგორც ჩანს, ახლო მომავალში კონფლიქტურ გარემოში ცხოვრება მოგვიწევს - იმ მსოფლიოში, სადაც ჩვენი მოკავშირეების წინაშე ახალი დილემები და პრიორიტეტები დადგება. რუსეთის გარდა, ჩვენ, ალბათ, კიდევ ბევრი გამოწვევის მოწმენი გავხდებით. ამისათვის ახლავე უნდა ვიზრუნოთ“, - აღნიშნავენ ავტორები და იქვე მიუთითებენ: აუცილებელია ნატოს გაძლიერება - თავდაცვის სფეროს ალიანსის წევრების საერთო ბიუჯეტის 3,5% უნდა მოხმარდეს, 2%-ის ნაცვლად. დამატებითი ხარჯები აუცილებელია. მათი მეშვეობით ჩვენ იმ ბზარს ამოვავსებთ, რომელიც ნატოს სამხედრო პოტენციალს გაუჩნდა რევანშისტული რუსეთის პირისპირ“, - ხაზს უსვამენ ავტორები.
„ალიანსის უსაფრთხოების ქვაკუთხედად ბირთვული შეკავება რჩება: საფრანგეთს აქვს თავისი დამოუკიდებელი სტრატეგიული ბირთვული ძალები, რომლებსაც მნიშვნელოვანი წვლილი შეაქვთ ნატოს საერთო უსაფრთხოების დაცვაში. გერმანიას უფლება აქვს მონაწილეობა მიიღოს ნატოს ბირთვული იარაღის ერთობლივ გამოყენებაში. გარდა ამისა, ერთობლივად ვიმუშავებთ შესყიდვების სისტემის რეფორმირებაში, რომელიც გამოიხატება უნიფიკაციაში, გამარტივებასა და გაზრდაში“, - ნათქვამია სტატიაში.
პუბლიკაციის დასასრულს, ავტორები აღნიშნავენ, რომ ნატო გააგრძელებს მჭიდრო თანამშრომლობას ევროკავშირთან, რათა უკეთ იქნას გამოყენებული ევროპის ტექნოლოგიური უპირატესობა [რუსეთის წინააღმდეგ]. „ჩვენ ვადასტურებთ სამოკავშირეო ერთიანობას, სოლიდარობას და ერთგულებას ჩვენი კონტინენტის თავისუფლების, მშვიდობისა და უსაფრთხოებისათვის“.
