2023 წლის 30 სექტემბერი - 1 ოქტომბრის შეჯამება უკრაინაში:
- ბოლო 72 საათია აქტიური სარაკეტო იერიშები მიმდინარეობს უკრაინის მიმართულებით. აქტიურად იყენებენ დრონებსაც. აქტიურად იბომბება ოდესის, ხერსონის, მიკოლაივისა და ზაპორიჟიას ოლქების სტრატეგიული ინფრასტრუქტურა. მიუხედავად იმისა, რომ უკრაინული ჰაერსაწინააღმდეგო სისტემები აქტიურად მუშაობენ და საშუალო წარმატების მაჩვენებელი 93% აქვთ, მაგრამ იმ ფონზე, რომ რუსები აქცენტს ინტენსივობაზე აკეთებენ ყველაფრის განეიტრალება ვერ ხდება. ამ ფონზე დაიბომბა ივანო ფრანკოვსკიც, დასავლეთ უკრაინაში. რუსები ბოლო თვეები აქტიურად აგროვებდნენ ფრთოსან რაკეტებსა და დრონებს და ახლა მასირებულ იერიშებს ახორციელებენ. მოსკოვს იარაღის აქტიურ მიმწოდებლად ირანი და ჩრდილოეთ კორეა ჰყავს.
- რუსებმა საარტილერიო იერიშები მიიტანეს ქალაქ ხერსონსა და მის მომიჯნავე ტერიტორიაზე. საარტილერიო დარტყმები გრძელდება მდინარე დნეპრის აღმოსავლეთ სანაპიროზეც, სადაც უკრაინელები კოზაჩი ლაჰერის სიახლოვეს მცირე პლაცდარმს ინარჩუნებენ. ვარაუდობენ, რომ რუსებმა ქვეითი დანაყოფების გადასროლაც მოახდინეს ამ მიმართულებაზე.
- რუსეთში დამატებით 130 ათასი ახალი სამხედროს მობილიზაცია და გადასროლა მოხდება ფრონტის ხაზზე. ამჟამად უკრაინაში დაახლოებით 400 ათასი რუსი სამხედრო იმყოფება.
- უკრაინელებმა დღეს რუსეთის ქალაქი სმოლენსკის საავიაციო ინფრასტრუქტურა დრონების გამოყენებით დაბომბეს.
- უკრაინელების მიერ ფრთოსანი რაკეტების გამოყენებით დაიბომბა ოკუპირებული ყირიმის ჯანკოის აეროპორტის მიმართულებაც.
- დრონებით იერიში იქნა მიტანილი სოჭის აეროპორტისა და პორტის მიმართულებით. მას შემდეგ რაც აფეთქების სერია რამდენიმე მონაკვეთზე განხორციელდა, ქალაქიდან ფრენები დროებით შეწყდა.
- დაიბომბა ადლერის სიახლოვეს მდებარე სამხედრო შვეულმფრენების პარკი, საქართველოს საზღვრიდან 7 კილომეტრში.
- რუსებმა კონტრშეტევა წამოიწყეს რობოტინეს სექტორში. მოცემულ მომენტში ცნობილი მხოლოდ ისაა, რომ ტოკმაკი-ორიხივის გზაზე რუსული სამხედრო კოლონა უკრაინელებმა დაბომბეს.
- კუპიანსკის მიმართულებაზე რუსული შეტევა სრულად იქნა შეჩერებული. ახლა ტენდენცია შეიცვალა: საარტილერიო დარტყმებს უკრაინელები ახორციელებენ რუსული პოზიციების მიმართულებით.
- ბოლო დღეებია ფრონტის ხაზზე აქტიურად მუშაობს HIMARS. ზაპორიჟიას ოლქში აქტიურად იბომბება რუსული იარაღის საწყობები. ერთ-ერთი მასირებული იერიში კოპანის მიმართულებით იქნა მიტანილი.
- აშშ-ს გაერთიანებულ შტაბს ახალი სამხედრო ხელმძღვანელი ჰყავს - საჰაერო ძალების გენერალი ჩარლზ ბრაუნი. ის ჯერ კიდევ 2020 წელს მსოფლიოს 100 ყველაზე გავლენიან ადამიანად იქნა დასახელებული. მისი როლი მიმდინარე პოლიტიკის შემუშავებასა და დახმარების პოლიტიკის დადგენაში ძალიან დიდი იქნება.
- Telegraph-ის ცნობით ბრიტანეთის თავდაცვის მდივანი გეგმის დონეზე განიხილავს უკრაინაში საჯარისო ფორმირებების გადასროლასა და მარცვლეულის დაცვას, თუმცა პრემიერმა სუნაკმა უარყო ეს და აღნიშნა, რომ ამ ეტაპზე ეს ნაბიჯი არ იქნება გადადგმული.
