2023 წლის 18-19 სექტემბრის შეჯამება უკრაინაში:
- უკრაინელებმა Storm Shadow-ს გამოყენებით იერიშები მიიტანეს ზაპორიჟიას ოლქის ქალაქებში - ტოკმაკსა და მელიტოპოლში - მდებარე რუსულ სამეთაურო პუნქტებზე. ასეთ პუნქტებზე დარტყმები მაღალი რანგის ოფიცრების განადგურებაზეა ხოლმე გათვლილი.
- უკრაინელების მიერ დაიბომბა დონეცკის სეპარატისტების სამთავრობო-ადმინისტრაციული შენობა.
- დადასტურდა რომ რუსების საჰაერო სადესანტო ძალების 31-ე ბრიგადის პოლკოვნიკი ანდრეი კონდრაშკინი იქნა მოკლული. მისი რანგის და გამოცდილების ოფიცრობა ბევრი არ ჰყავს რუსეთს.
- ხარკივის ოლქში, რუსებმა კუპიანსკი დაბომბეს. მსხვერპლი მხოლოდ სამოქალაქო მოსახლეობაშია. ეს ერთ-ერთი ფუნდამენტური სხვაობაა რუსებსა და უკრაინელებს შორის: უკრაინელები ცდილობენ სამოქალაქო ინფრასტრუქტურის განადგურებისაგან მაქსიმალურად შეიკავონ თავი, მაშინ, როდესაც რუსული გათვლა სამოქალაქოების განადგურება და მოსახლეობაში შიშის ჩანერგვის უშედეგო მცდელობაა. უკრაინელთა მხრიდან ამას პრაგმატული ხასიათიც აქვს: ისინი არ ხარჯავენ თავიანთ შეიარაღებას სამოქალაქო სამიზნეებზე, რომელთა განადგურებასაც არავითარი სამხედრო სარგებლის მოტანა არ შეუძლია და პოლიტიკურად დამაზარალებელი შეიძლება იყოს.
- უკრაინელები სვატოვესთან, ლუგანსკის ოლქში კვლავ აქტიურობენ. ეს საკმაოდ საინტერესო ნიშანია, რადგან ორი დღის წინ რუსული შეტევის ჩავარდნის შემდეგ უკრაინელებმა კონტრშეტევა წამოიწყეს და კვლავაც ცდილობენ აქტიურობას. როგორც ჩანს, სულ რომ არავითარი წარმატება არ იყოს უკრაინელთა დაწოლას რუსების ფოკუსის სვატოვეზე დაბრუნება მაინც იქნება.
- უკრაინელთა განცხადებით წინა კვირაში რუსული სამხედრო-საპატრულო ხომალდი "სერგეი კოტოვის" დაზიანება ან ჩაძირვა დასტურდება. რუსული ფლოტი პრაქტიკულად ეჯაჭვება პორტებს.
- რუსული აუფეთქებელი დრონი აღმოაჩინეს ტიულენოვოში, ბულგარეთის ტერიტორიაზეც. ეს მესამე დრონია, რომელიც ნატოს ტერიტორიაზე აღმოჩნდა. ბულგარელმა სამხედროებმა დრონი ააფეთქეს.
- გაეროს ტრიბუნიდან ზელენსკი მიმართავს შეკრებილ ლიდერებს და უკრაინის დახმარებისაკენ მოუწოდებს, რათა მეორედ ასეთი მასშტაბის აგრესიის განხორციელება აღარავის მოუვიდეს თავში. აშშ-ს პრეზიდენტმა კიდევ ერთხელ მოუწოდა ცივილიზებულ მსოფლიოს მხარი დაუჭირონ უკრაინას, რადგან ეს ყველას უსაფრთხოების პრობლემაა. პრეცედენტი ყოველთვის ყველას უსაფრთხოების პრობლემაა.
