,
2020 წლის განმავლობაში საქართველომ უცხოეთიდან 1.6 მილიარდი კილოვატ საათი ელექტროენერგია შეიძინა. ქვეყანაში დენის მოხმარების 5%-ით შემცირების მიუხედავად, იმპორტის მოცულობა ფაქტობრივად უცვლელი დარჩა, შესაბამისად, გაიზარდა დამოკიდებულება იმპორტულ ელექტროენერგიაზე. 2020 წელს იმპორტზე მთლიანი მოხმარების 13% მოდიოდა და მასში საქართველომ $64.5 მლნ გადაიხადა.
საქართველომ 2020 წელს ელექტროენერგია სამი ქვეყნიდან, - რუსეთიდან, აზერბაიჯანიდან და თურქეთიდან შეიძინა. მათ შორის ელექტროენერგიის მიღების მთავარი წყარო აზერბაიჯანი იყო, საიდანაც ქვეყანაში 726 მილიონი კილოვატ საათი ელექტროენერგია შემოვიდა, რაც მთლიანი იმპორტის 45% იყო.
როგორც ესკოს სტატისტიკიდან ჩანს, ყველაზე ძვირადღირებული სწორედ აზერბაიჯანული ელექტროენერგიაა, რომლის ტარიფიც კილოვატ საათზე 5 ცენტს შეადგენდა. შედარებისთვის, თურქული ელექტროენერგიის ტარიფი შარშან 3 ცენტი, რუსულის კი 4 ცენტი იყო.
ქვეყნების მიხედვით, ელექტროენერგიის მოცულობები და ტარიფები ასე ნაწილდება:
აზერბაიჯანი - 726,300,000 კილოვატ საათი, ფასი $36,397,260 ტარიფი 5 ცენტი;
რუსეთი - 570,600,000 კილოვატ საათი, ფასი $14,553,200 ტარიფი 3 ცენტი;
თურქეთი - 313,100,000 კილოვატ საათი, ფასი $13,564,140 ტარიფი 4 ცენტი;
სულ - 1,610,000,000 კილოვატ საათი, ფასი $64,514,600 ტარიფი 4 ცენტი.
ელექტროენერგიის მაღალი იმპორტი 2021 წელსაც გაგრძელდება, რადგან იანვრიდან 3 თვის ვადით ენგურჰესი სარეაბილიტაციოდ გაჩერდა.
რაც შეეხება ელექტროენერგიის ექსპორტს, მისი მოცულობა გასულ წელს 36%-ით შემცირდა და 154 მილიონი კილოვატ საათი შეადგინა. საქართველოდან ექსპორტირებული ელექტროენერგიის ტარიფი 3.8 ცენტი იყო, შესაბამისად, ქვეყანამ ექსპორტიდან $5.8 მილიონი დოლარი მიიღო, რაც იმპორტთან შედარებით 11-ჯერ ნაკლები იყო.
2020 წელს საქართველოს მიერ კონტროლირებად ტერიტორიაზე ელექტროენერგიის მოხმარება ჯამურად 10%-ით შემცირდა, ოკუპირებულ აფხაზეთში კი ელექტროენერგიის მოხმარების უკონტროლო ზრდა გაგრძელდა, სადაც მატება 24%-ს შეადგენდა. შედეგად, აფხაზეთმა თითქმის იმდენივე ელექტროენერგია მოიხმარა, რამდენიც 1,1 მილიონიანმა თბილისმა.
ამ ელექტროენერგიას აფხაზეთი საქართველოდან უსასყიდლოდ იღებს, გასულ წელს რეგიონის მიერ მოხმარებული 2.55 მილიარდი კილოვატ საათის საბაზრო ღირებულება $80 მილიონზე მეტი იყო.
წყარო:https://bm.ge/
