USD 2.7384
EUR 2.8548
RUB 2.6619
Тбилиси
რა მდგომარეობაა ამ დროისთვის უკრაინაში
дата:  272
2023 წლის 17-18 აპრილის შეჯამება უკრაინაში:
- რუსეთის, ბელგოროდის რაიონს დენი შეფერხებით მიეწოდება. პერიოდული აფეთქებებია როგორც ოლქის ელექტროგადამცემი ხაზების ისე სადგურების მიმართულებით. რადგანაც რუსული მხარე ხშირ შემთხვევაში თავს იკავებს კომენტარებისაგან ან მესამე მხარის ჩარევას გამორიცხავს მომხდარში ხოლმე, ზუსტად არ ვიცით თუ რა მოხდა ელექტროსადგურზე - იყო ეს დრონების გამოყენება, დივერსია თუ რაიმე სხვა. მაგრამ საინტერესო ის არის, რომ ბელგოროდის ოლქი პრაქტიკულად საბრძოლო მოქმედებების ნაწილადაა ქცეული.
ამასთან, ბოლო რამდენიმე კვირის განმავლობაში თითქმის ყოველდღიურად ვხვდებით აფეთქებებს უშუალოდ საზღვრის სიახლოვეს, სადაც უკრაინული არტილერია რუსული მომარაგებისა და დაზვერვის ერთ-ერთ ძირითად ხაზს ურტყამს და სასაზღვრო პერიმეტრზე ცდილობს სათვალთვალო კოშკურები და კამერები გამოიყვანოს მწყობრიდან.
ყველაფერს ემატება ისიც, რომ ფსიქოლოგიური ზეწოლა რუსეთზე იზრდება: სრულიად უცნობი ადამიანები არ გამორიცხავენ უკრაინელთა პირდაპირ იერიშს ბელგოროდის მიმართულებით, რისი ალბათობაც მინიმალური და ნაკლებ რეალურია, მაგრამ ფსიქოლოგიური წნეხის გარდა აიძულებს რუსულ სამხედრო ძალებს დარჩნენ ოლქის დასაცავად და თხარონ სანგრები და ააგონ ფორტიფიკაციები. ეს კი უკვე შესრულებული მიზანიც კი შეიძლება იყოს.
- აშშ-ში დაიწყო იმ დამნაშავეთა გამოვლენა, რომლებიც Twitter-სა და სხვადასხვა სოციალურ ქსელში პრო-რუსულ პროპაგანდასა და დეზინფორმაციის გავრცელებაში იყვნენ ჩაბმულები. სამწუხარო არის ის, რომ ინფორმაციის გაჟონვაში ბრალდებულის გარდა კიდევ ერთი ადამიანი, რომელიც რუსულ პროპაგანდას "დონბასელი გოგონას" სახელით მიზანმიმართულად ავრცელებდა ფეისბუქზე და ამაში იღებდა გასამრჯელოს - ყოფილი სამხედრო ქალია. როგორც ჩანს რუსებმა ჯაშუშური ქსელის შექმნას საკმაოდ დიდი დრო დაუთმეს თვით უშუალოდ აშშ-ს ძალოვან ორგანოებში.
- ბრაზილიის პრეზიდენტი ლუის ინასიუ ლულა პრო-რუსული და პრო-ჩინური პოზიციებით ადრეც გამოირჩეოდა, მაგრამ მას შემდეგ რაც იგი გამოვიდა ინიციატივით, რომ ყირიმი გადასცენ რუსეთს და სანაცვლოდ კრემლმა ომი შეწყვიტოს, ახლა დაამატა განცხადებაც, რომ თითქოს აშშ აქეზებს ომს. ეს კი ძალიან მოეწონა რუსეთის საგარეო საქმეთა სამინისტროს, რის შემდეგაც სერგეი ლავროვმა პერსონალური მადლობაც კი გადაუხადა ბრაზილიის პრეზიდენტს.
ლულა ჩინურ ინვესტიციებზე და ფინანსური ბაზრების ათვისებაზეა ორიენტირებული. ამას ემატება ისიც, რომ იგი საერთაშორისო ფინანსურ მიმოქცევაში დოლარის როლის შემცირებას ემხრობა. საბოლოო ჯამში მისი სოციალისტური საგარეო და საშინაო პოლიტიკა მეტწილად ემთხვევა არამხოლოდ პრო-ჩინურ პოლიტიკას არამედ პრო-რუსულსაც. ამიტომაა რომ მისი დამოკიდებულება დასავლეთისადმი საკმაოდ კრიტიკულია.
ლულას მსგავსი ინიციატივა უკვე დაგმობილ იქნა აშშ-ს მიერ და პროპაგანდის თუთიყუშივით განმეორებას შედარდა მისი კომენტარები.
- პუტინი უკრაინის ოკუპირებულ ტერიტორიებზე ჩავიდა. ოფიციალური ვერსიით იგი ხერსონის ოკუპირებულ ოლქში იმყოფებოდა, ზედ ყირიმის სიახლოვეს.
- პრეზიდენტი ვოლოდიმირ ზელენსკი კი ერთ-ერთ ყველაზე მძიმე საბრძოლო მოქმედების ცენტრში, ავდიივკაში ჩავიდა, ქალაქი დონეცკის სიახლოვეს. ეს მისი მხრიდან ძალიან გაბედული ნაბიჯია, რადგან ბოლო თვეებია ბახმუტზე არანაკლები ინტენსივობით მიმდინარეობს რუსული შეტევა ავდიივკას მიმართულებით, ხოლო 2022 წლიდან (რეალურად კი 2014 წლიდან) ყოველდღიური იერიშების ერთ-ერთ ეპიცენტრს წარმოადგენდა. ავდიივკა აღმოსავლეთის ფრონტის ერთ-ერთი უმთავრესი საყრდენი პუნქტია.
- რუსები ქალაქ ბახმუტის დასავლეთ ნაწილში ცდილობენ გადაადგილებას. მათი შეტევის მიმართულებად კლავ რჩება ერთის მხრივ რკინიგზის სადგური, ხოლო მეორეს მხრივ უშუალოდ ბახმუტიდან გამავალი კოსტიანტინივკას გზა, რომლის სიახლოვესაც ბოლო ორ დღეში რამდენიმე ასეული მეტრით წაიწიეს წინ.
- ბახმუტის სამხრეთ-დასავლეთით, საკვანძო დასახლება კიშილივკას მიმართულებით უკრაინელებმა კონტრშეტევის შემდეგ შეძლეს 1.5 კილომეტრი ტერიტორიის გათავისუფლება და მოწინააღმდეგის შედარებით სიღრმეში უკუქცევა. ზოგადად, დასახლებული პუნქტების გარეთ რუსების კონტროლი არამყარია და სიტუაცია საკმაოდ სწრაფადაა ცვალებადი და ასეთი კონტრშეტევა მოულოდნელობას არ ქმნის.
- საეჭვოა სინამდვილეში რამდენად კარგადაა გამაგრებული რუსული პოზიციები ყირიმში. ზოგიერთი ვერსიით ესეც კორუფციის ნაწილადაა ქცეული - გაითხარა სანგარი სანაპირო ზოლზე და დაწერა ანგარიში მასიურ ფორტიფიკაციებზე. რეალურად, ამის გადამოწმება ძალიან რთულია მოხდეს, მაგრამ როგორიც არ უნდა იყოს მზადება ყირიმში, გადაულახავი ფორტიფიკაცია არ არსებობს, თუკი მართლაც ყირიმი იქება უკრაინელთა შეტევის ერთ-ერთი სამიზნე. მეორეს მხრივ, ყირიმის დაცვას რუსეთი ძალიან დიდ რესურსებს დაუთმობს. შესაბამისად, იქ სადაც დიდი ფინანსებია სრულიად შესაძლებელია იყოს დიდი კორუფციაც.
- კვიპროსი რუსული ინვესტიციების ერთ-ერთი უმთავრესი გზაგამტარი იყო ევროკავშირში. სწორედ ამიტომ რუსი ბიზნესმენები, რომლებიც კრემლთან იყვნენ დაახლოებულნი ცდილობდნენ სხვადასხვა მასშტაბის ინვესტიციების განხორციელებით (მინიმუმი 2 მილიარდი ევროა) მოეპოვებინათ კვიპროსში ცხოვრების უფლება შემდგომ კი დაეწყოთ მოქალაქეობის ან ორმაგი მოქალაქეობის მიღების პროცესი. ამასთან, კვიპროსის გავლით მათ საშუალება ჰქონდათ დიდ ბრიტანეთთანაც ჰქონოდათ ახლო კავშირები, რომელსაც კვიპროსში არამხოლოდ საკუთარი სამხედრო ბაზები აქვს (აკროტირსა და დეკელიაში), არამედ საკმაოდ ღრმა პოლიტიკური კავშირებიც. რამდენიმე დღის წინ ევროკავშირში ამ თემაზე ღრმა მოკვლევა დაიწყო, რის შედეგადაც კვიპროსის საბანკო სექტორმა დაიწყო რუს კლიენტებთან ურთიერთობის მინიმიზება. შესაძლოა ამას კიდევ უფრო დიდი გავრცელება მოჰყვეს და კვიპროსი, როგორც რუსული ინტერესების გზაგამტარი ევროკავშირში სრულიად ჩაიკეტოს.
- ეგვიპტე, რომელიც რუსეთს საარტილერიო ჭურვების გადაცემას აპირებდა, როგორც ჩანს აშშ-ს მხრიდან საკმარისი პოლიტიკური ზეწოლის ფონზე არათუ უარი განაცხადა აღნიშნული ჭურვების რუსეთისათვის მიწოდებაზე, არამედ აპირებს რომ ეს ჭურვები უკრაინას მიაწოდოს. რუსეთი არასანდო და არასასურველი პარტნიორია მათ შორის ალ-სისის რეჟიმისათვისაც კი.
аналитика
«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება. 

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ,  მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/

 

более
голосование
ვინ გაიმარჯვებს რუსეთ - უკრაინის ომში?
голосование
Кстати