როგორც ცნობილი გახდა მმართველი პარტია ახალ ოფისს თბილისში დიდი ხეივნის 3 ნომერში იშენებს.
პროექტის მიხედვით, K2 კოეფიციენტის 8 383 კვ.მ შენობა 34.95 მეტრის სიმაღლის იქნება. განმარტებითი ბარათის მიხედვით კი, 4953.0 კვ.მ. მიწის ნაკვეთს ჩრდილოეთიდან ესაზღვრება ვლადიმერ წითლანაძის ქუჩა, სამხრეთ-დასავლეთიდან ვახტანგ გორგასლის ქუჩა, ხოლო სამხრეთ აღმოსავლეთიდან საქართველოს იუსტიციის სამინისტროს საჯარო რეესტრის ეროვნული სააგენტოს შენობა.
მმართველი პარტიის განმარტებით, ოფისის მშენებლობას ,,ქართული ოცნება" არ აფინანსებს და მშენებარე ოფისი იჯარა-გამოსყიდვის ან იჯარის ხელშეკრულებით უნდა იქირაოს პარტიამ. რის შესახებაც მიმდინარეობს მოლაპარაკებები და ხელშეკრულების გაფორმებისთანავე, ინფორმაცია გასაჯაროვდება.
შენობას 2021 წელს რეგისტრირებული შპს ნიუ ოფისი აშენებს, რომლის წილის 100% დავით ანდღულაძე ფლობს, რომელმაც დიდი ხეივნის 3 ნომერში ნაგებობის აშენების უფლება გასული წლის 7 დეკემბერს მიიღო.
პროექტის მთავარი არქიტექტორი გიორგი ჭყონიაა. საპროექტო შენობა რვა სართულიანია. შენობის შუაგულში გათვალისწინებულია ბირთვი, რომელიც მოიცავს ორ კიბის უჯრედს, სამ ლიფტს თავისი ჰოლით და საზოგადოებრივი სარგებლობის სან. კვანძებს.
