,
მოსკოვში, „ლუჟნიკების“ სტადიონზე, 1965 წლის 4 ივლისს გამართულ მატჩს სსრკ-ს და ბრაზილიის ნაკრებებს შორის, 102 ათასი მაყურებელი დაესწრო. პელემ და მისმა თანაგუნდელებმა საბჭოეთის ნაკრებს მასტერკლასი ჩაუტარეს და 3:0 დაამარცხეს.
აწ გარდაცვლილმა „ფეხბურთის მეფემ“ პირველ ტაიმში მეკარე ვიქტორ ბანიკოვს გაუტანა, მეორეში კი ანზორ კავაზაშვილს. ერთი ბურთიც შუალედში ფლავიოს აქტივში ჩაიწერა. შეხვედრის დასრულების შემდეგ (ბანკეტზე), რომელშიც 5 ქართველი მონაწილეობდა (ანზორ კავაზაშვილი, ვლადიმერ ბარქაია, გიორგი სიჭინავა, სლავა მეტრეველი და მიხეილ მესხი), პელემ მოულოდნელი საჩუქარი გაუკეთა გიორგი სიჭინავას, რომელსაც მისი მეურვეობა ჰქონდა მწვრთნელებისგან დავალებული.
გიორგი სიჭინავა იხსენებდა შემდგომში: „ბანკეტზე, უცებ პელემ შემომხედა და თქვა: აი ვის მინდა ჩემი მაისური გადავცე. ეს სიჭინავაა“ - იხსენებდა ვეტერანი ქართველი ფეხბურთელი. „ჩემი გვარი პირდაპირ დაასახელა. მოულოდნელობისგან კინაღამ იატაკზე დავეცი. ყველას გაუკვირდა, ფიქრობდნენ, რომ მან მარტო იაშინის გვარი იცოდა. შესაძლოა ვორონინისაც. ვიღაცამ იკითხა ნახევრად ჩურჩულით: „რატომ სიჭინავას ?“, პელემ კი ასე უპასუხა: „ის ისეთივე შავია, როგორც მე. მე მართლაც ძალიან ვიყავი გარუჯული“.
