,
პარლამენტი დაჩქარებული წესით განხილავს ფინანსთა სამინისტროს მიერ მომზადებულ საკანონმდებლო ცვლილებას, რომელიც აზარტული თამაშების სექტორის რეგულირებას ამკაცრებს. კერძოდ, ცვლილება შეეხება საქართველოდან უცხოეთში აზარტული თამაშების სერვისების მიწოდებას, რომელიც ამჟამად რეგულირების მიღმა ექცევა. თუკი ამჟამად მსგავსი სერვისის მიმწოდებელი კომპანიები ნებართვის აღებას არ საჭიროებენ და არც შესაბამის სალიცენზიო გადასახადს იხდიან, კანონის ცვლილების შემდეგ ისინიც დაიბეგრებიან.
როგორც ფინანსთა მინისტრის მოადგილე მიხეილ დუნდუა აცხადებს, ახალი კანონის მიღების შემდეგ ამ კომპანიებს არამხოლოდ ლიცენზიის მოსაკრებლის გადახდა, არამედ მარეგულირებლებისთვის საკუთარი სერვერების გახსნაც მოუწევთ, ხოლო თუ რომელიმე ფირმა ამ ვალდებულებაზე უარს იტყვის და ქვეყნიდან წავა, “ის მართლაც წასასვლელი ყოფილა”.
“ჩვენ მათ სერვერებზე დაერთება და მათი გაკონტროლება გვინდა, თუკი რომელიმე კომპანია შეიკავებს ამისგან თავს, ეს უკვე ეჭვებს აღძრავს. კონტროლის მიღმა არ შეიძლება დარჩეს ეს სფერო. მე არ მგონია, რომელიმე კომპანია წავიდეს საქართველოდან. მაგრამ, თუკი რომელიმე კომპანია წავიდა საქართველოდან იმის გამო, რომ ქართულმა სახელმწიფომ და ფინანსთა სამინისტრომ მისი გაკონტროლება და ინფორმაციის წამოღება გადაწყვიტა და ამის გამო წავიდა, ესეიგი ის მართლა წასასვლელი ყოფილა. მაგრამ არამგონი ასეთი რამ მოხდეს, პირიქით, დარწმუნებული ვარ უფრო მეტი ორგანიზაცია შემოვა და კონკურენცია გაიზრდება. 100,000 ლარი მოსატანიც კი არაა, როგორც რამე ტვირთი ამ სექტორისთვის, რომელსაც მილიარდობით ლარის ბრუნვა აქვს,” - განაცხადა მიხეილ დუნდუამ.
პარლამენტში გამართულ მოსმენაზე ფინანსთა მინისტრის მოადგილემ განაცხადა, რომ ეს ცვლილება ეხება ისეთ კომპანიას, როგორიცაა "ევოლუშენ გეიმინგი", რომელიც საქართველოში არსებული ოფისიდან აზარტული თამაშების სერვისებს უცხოურ კომპანიებს აწვდის. კანონპროექტის განმარტებითი ბარათის მიხედვით, ამჟამად ქვეყანაში ამ სფეროში 13 კომპანია საქმიანობს.
პარლამენტის დარგობრივი ეკონომიკის კომიტეტის თავმჯდომარე დავით სონღულაშვილმა მიხეილ დუნდუას ჰკითხა თუ აქვს სამინისტროს მომზადებული წინასწარი შეფასება თუ რა მოყვება ამ კანონპროექტის მიღებას. ასევე თუ ჰქონიათ მათ კერძო სექტორთან კომუნიკაცია. რაზეც დუნდუამ განაცხადა, რომ სამინისტრო არ ეთანხმება სერვისის მიმწოდებელი ფირმების პოზიციას რომ ისინი აზარტულ თამაშებში ჩართულ კომპანიებს არ წარმოადგენენ.
“შარშან საკანონმდებლო ცვლილებაში განსხვაზღვრეთ თუ რას წარმოადგენს აზარტული თამაშის მიწოდება. ამაში შედის როგორც თამაში ასევე შიდა არსებითი სერვისიც. ამ საქმიანობის ქვეყნის შიგნით განხორციელება და სერვისის მიწოდება ექვემდებარება ლიცენზიას და ქვეყანაში ვინც საქმიანობს ჩვეულებრივად იხდის ლიცენზიას. ორგანიზაცია, რომელიც ქვეყნის გარეთ აწოდებდა ამ სერვისს რჩებოდა კონტროლს მიღმა, ამიტომაც ეს იყო უსამართლო იმ ორგანიზაციებთან მიმართებით, რომლებიც ქვეყნის შიგნით საქმიანობენ და უწევთ რეგულაციების ქვეშ ყოფნა, ხოლო არიან სხვა კომპანიები, რომლებიც ქვეყნის გარეთ ახდენენ საქმიანობის მიწოდებას, მაგრამ არ რეგულირდებიან.
რაც შეეხება დარგთან კომუნიკაციას, როდესაც ის კომპანია ამბობს, რომ ის არ არის სათამაშო ბიზნესი, ჩვენი თვალთახედვით ის სცდება,” - განაცხადა დუნდუამ.
როგორც ირკვევა, ფინანსთა სამინისტრო კანონის მიღების შემდეგ კომპანიების მონიტორინგს თავად არ განახორციელებს და ამისთვის ის გამოიყენებს კომპანია “რენდომ სისტემს ჯორჯიას” სერვისს, რომელსაც უწყება ამ ფირმების მონიტორინგს დაუკვეთავს
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
