,
Forbes Georgia პროექტ 30 UNDER 30-ის ფარგლებში საქართველოში 30 წლამდე ასაკის ლიდერები უკვე მეხუთედ შეარჩია. 2023 წლის სიაში ახალგაზრდებმა ადგილი თავიანთი მიღწევების, რეპუტაციის, ლიდერობის უნარებისა და საკუთარ დარგში წარმატების პოტენციალის საფუძველზე დაიკავეს.
Forbes-ის 30-წლამდელთა სიის მიზანია, გამოავლინოს ნიჭიერი და უნიკალური ხედვის მქონე ახალგაზრდა ლიდერები, რომლებიც წარუშლელ კვალს ტოვებენ საქართველოში. ისინი წარმოგვიდგენენ მიღწევებისა და ძალისხმევის მრავალფეროვან დიაპაზონს, რაც მედეგობითა და წარმატებული საქმიანობით მნიშვნელოვან გავლენას ახდენს სხვადასხვა სფეროზე.
სიის რჩეულ ახალგაზრდებს ერთი რამ აერთიანებთ – მათ ენთუზიაზმსა და გამორჩეულ ხედვას არა მხოლოდ ინდივიდუალური მოგება მოაქვს, არამედ საზოგადოების წინსვლასაც ემსახურება.
მიმდინარე წელს 30 Under 30-ზე 400-ზე მეტი აპლიკაცია დარეგისტრირდა. აპლიკაციების შეფასების შემდეგ, Forbes Georgia-ს სარედაქციო ჯგუფმა თითოეული კატეგორიისთვის მოკლე სია შეადგინა. დამოუკიდებელი ჟიურის დახმარებითა და Forbes-ის გლობალური მეთოდოლოგიის შესაბამისად, მოკლე სიებიდან 37 ახალგაზრდა ლიდერი შემდეგ 7 კატეგორიაშია იქნა შერჩეული:
კულტურისა და სტილის კატეგორია აერთიანებს მუსიკას, ფერწერას, ლიტერატურას, თეატრს, კინოს, არქიტექტურას, დიზაინს, მოდასა და გართობას. კატეგორიის ჟიურიში წელს გავაერთიანეთ სხვადასხვა დარგში აღიარებული პროფესიონალები – სწორედ მათ შეარჩიეს ახალგაზრდა კოლეგები, ვინც უკვე თუ არა, ძალიან მალე იმავე მასშტაბის წარმატების პოტენციალს წარმოაჩენს.
ჟიური: ლევან სონღულაშვილი, თეონა ჯორბენაძე, ქეთი ჩხიკვაძე, ტატო ახალკაციშვილი, ირინა პოპიაშვილი
მედიისა და მარკეტინგის კატეგორიის აპლიკაციები კომუნიკაციების, მარკეტინგისა და მედიის პროფესიონალებმა შეაფასეს. სწორედ მათი დახმარებით გამოვავლინეთ ინდუსტრიის ის ახალგაზრდა ლიდერები, რომლებიც მსოფლიოში მიმდინარე ტრენდებს ეხმიანებიან და საქართველოში შესაფერისი სტანდარტების შექმნაში მონაწილეობენ.
ჟიური: ლინდა პერეირა, ნინო ეგაძე, მარინა ვაშაყმაძე, თინა სტამბოლიშვილი, ოსმან თურანი
Forbes-ის დაჯილდოება წარმოუდგენელია ტექნოლოგიების კატეგორიის გარეშე. ფინტექი, გეიმინგი, საინფორმაციო ტექნოლოგიები, ტექ-სტარტაპები – წელს ამ კატეგორიის გამარჯვებულები წარმატებული ტექნოლოგიური კომპანიებისა თუ პროდუქტების ავტორებმა და სტარტაპეკოსისტემის განვითარების გულმხურვალე მხარდამჭერებმა გამოავლინეს.
ჟიური: ქეით ბუნინა, გივი სართანია, ავთანდილ კასრაძე, რუსკა ქურდოვანიძე
.jpg)
მეცნიერების როლი საზოგადოებრივ განვითარებაში მუდმივად მზარდია. ისინი ცდილობენ, სამყაროში გაჩენილ ყველა კითხვას უპასუხონ და კაცობრიობას ახალი ცოდნა დაუქვემდებარონ – სწორედ მაღალი სამეცნიერო პოტენციალის მქონე ახალგაზრდების გამოვლენაზე იყო წელს კატეგორიის ჟიური ორიენტირებული.
ჟიური: სოსო ბერიკაშვილი, რატი ღოლიჯაშვილი, სანდრო თარხან-მოურავი, ნინო ენუქიძე, ნანა დიხამინჯია
ანტრეპრენიორებისა და მეწარმეების კერძო ინიციატივას, ენთუზიაზმსა და გამორჩეულ ხედვას არა მხოლოდ ინდივიდუალური მოგება მოაქვს, არამედ საზოგადოების წინსვლასაც ემსახურება. აღნიშნული კატეგორიის გამარჯვებულების გამოვლენა წარმატებულ მეწარმეებს, ანტრეპრენიორებსა და გამორჩეულ ბიზნესებს მივანდეთ.
ჟიური: მიხეილ ხიდურელი, ნენსი ჯი ალენი, კრეიგ კრამერი, ვანო ნაკაიძე, ზაზა ფაჩულია
ფინანსების კატეგორიაში წარმოვაჩენთ იმ ახალგაზრდებს, რომელთა საქმიანობაც ორიენტირებულია როგორც ტრადიციული საფინანსო ინსტრუმენტების, ისე ციფრული და კრიპტოსერვისების განვითარებაზე. კატეგორიის ლიდერების შერჩევაში წელს საქართველოს წამყვანი საინვესტიციო და საბანკო ინსტიტუტების ხელმძღვანელები დაგვეხმარნენ.
ჟიური: ოთარ შარიქაძე, ნიკა ქურდიანი, ალექსანდრე ძნელაძე
Forbes-ის რჩეულები ის ახალგაზრდები გახდნენ, ვინც გამოცემის რედაქტორების ყურადღება წარმატებისკენ სწრაფვის დიდი სურვილით მიიპყრო და ისეთ სტარტაპებს ან კორპორაციებს წარმოადგენენ, რომელთა გავლენაც ბიზნესსექტორზე მნიშვნელოვანია.
2023 წლის სიის წევრები საზოგადოებას Forbes-მა დღეს, 2 ივნისს წარუდგინა. აღნიშნული ინიციატივა კიდევ ერთხელ ადასტურებს ბიზნესგამოცემის ურყევ ხედვას, ვაღიაროთ და გავაძლიეროთ ახალგაზრდა ლიდერები, ვინც განსაკუთრებულ წარმატებას მიაღწია თავის სფეროში. მათი მიღწევების აღიარებითა და მათ წარმატებაზე საუბრით, Forbes საქართველო მიზნად ისახავს, შთააგონოს ახალგაზრდები და გააძლიეროს ინოვაციისა და მუდმივი განვითარების კულტურა.
პროექტის მთავარი პარტნიორი – თიბისი ბანკი
პროექტის პარტნიორი – Gulf Georgia
პროექტის ორგანიზატორი – კონსიერჟ თბილისი
წყარო:https://forbes.ge
