,
.jpg)
უნგრეთის პრემიერ-მინისტრის, ვიქტორ ორბანის განცხადებით, ევროკავშირის წევრი ქვეყნების ლიდერებმა დეკემბრის სამიტზე უკრაინის გაწევრიანების საკითხზე არ უნდა იმსჯელონ. ამის შესახებ ის X-ზე წერს.
„ნათელია, რომ ევროკომისიის რეკომენდაცია, დაიწყოს მოლაპარაკებები უკრაინის ევროკავშირში გაწევრიანების საკითხზე დაუსაბუთებელი და ცუდად მომზადებულია. დეკემბრის ევროკავშირის სამიტის დღის წესრიგში ამ საკითხის ადგილი არაა“, - წერს ორბანი.
ვიქტორ ორბანმა ევროპული საბჭოს პრეზიდენტს, შარლ მიშელსაც გაუგზავნა წერილი, სადაც აღნიშნულია, რომ ევროკავშირის დაგეგმილი სამიტის დღის წესრიგიდან უკრაინის ევროკავშირში გაწევრიანებისა და ქვეყნისთვის დახმარების სახით 50 მილიარდი ევროს გამოყოფის საკითხები ამოიღონ, რადგან ისინი მაინც ჩავარდება.
„პატივისცემით მოგიწოდებთ, არ მოიწვიოთ ევროპული საბჭო დეკემბერში, ამ საკითხებზე გადაწყვეტილების მისაღებად, რადგან კონსენსუსის აშკარა არ არსებობა აუცილებლად გამოიწვევს მარცხს“, - აღნიშნულია ორბანის წერილში.
კრიტიკოსები აცხადებენ, რომ ორბანი ამ მუქარით ცდილობს, უნგრეთმა გაყინული დახმარება, 27 მილიარდი ევრო მიიღოს.
აღნიშნული თანხა ბრიუსელმა იმ შეშფოთების გამო გაყინა, რომელიც ბლოკში არსებობს ქვეყანაში კორუფციასა და ევროპული დაფინანსების სავარაუდოდ არასწორად გამოყენების გამო.
ვიქტორ ორბანის მიერ უკრაინის ევროკავშირში გაწევრიანების შესახებ მოლაპარაკებებისა და დახმარების საკითხების დაბლოკვის მუქარის გაჟღერების შემდეგ ევროკომისიამ მიანიშნა, რომ შესაძლოა ბუდაპეშტისთვის გამოყოფილი 10 მილიარდი ევრო განბლოკოს.
გერმანელი ევროპარლამენტარი, დანიელ ფროინდი ევროკავშირს მოუწოდებს, ბუდაპეშტს, საჭირო რეფორმების შესრულებამდე, თანხა არ გადაურიცხოს.
„ორბანის მთავრობამ არ შეასრულა საჭირო რეფორმები. ფული არ უნდა შევიდეს. თუ კომისია სხვაგვარად გადაწყვეტს, ეს მხოლოდ ერთი მიზეზის გამო იქნება: ისინი შეეცდებიან დააშოშმინონ ორბანი, რომელმაც ვეტოს მუქარით ყოველგვარ ზღვარს გადააჭარბა“, - აღნიშნა ევროპარლამენტარმა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
