ფლორიდის უნივერსიტეტში 2008 წელს ჩავირიცხე სადოქტორო პროგრამაზე, ექსპერიმენტალური ნაწილაკების ფიზიკის მიმართულებით. ამ ჯგუფს დიდი წვლილი მიუძღვის ჰადრონული ამაჩქარებლის ( Large Hadron Collider), კერძოდ Compact Muon Solenoid (CMS) ექსპერიმენტის მშენებლობასა და შემდეგ ექსპლუატაციაში. პროგრამა მოიცავდა ამერიკაში სწავლას და შვეიცარიაში სამწლიან კვლევას, სადაც მნიშვნელოვანი გამოცდილება მივიღე.
ჩემი სადოქტორო კვლევა ეხებოდა ახალი ტიპის ნაწილაკების აღმოჩენას და შესწავლას ( ე.წ. სუპერ- სიმეტრიული მოდელის გათვალისწინებით). სადოქტოროს დამთავრების შემდეგ, კვლევითი მეცნიერის პოზიციაზე გავაგრძელე საქმიანობა კანზასის უნივერსიტეტში, სადაც ჩემი წვლილი შევიტანე ახალი ტიპის ნაწილაკების ანალიზის შექმნაში, ასევე სხვადასხვა უნივერსიტეტთან თანამშრომლობაში. ვმუშაობდი CMS ექსპერიმენტისთვის ახალი ტექნოლოგიების განვითარების და შემდგომ აღჭურვის მიმართულებით. მაშინ ძალიან დავინტერესდი მონაცემთა მეცნიერებით და გადავწყვიტე, ამ სფეროში მემუშავა და კარგად გავრკვეულიყავი.
ამჟამად Samsung America-ში ვმუშაობ, big data and artificial inteligence-ს ჯგუფში. ჩვენი საქმიანობა მოიცავს ორგანიზაციის სხვადასხვა დეპარტამენტთან ურთიერთობას, ბიზნეს პრობლემის დადგენას, არსებული ინფომაციის დამუშავებას და შესაბამისი მოდელების შექმნას, რაც ეხმარება ბიზნესს სწორი გადაწყვეტილების მიღებაში. როგორც მენტორი, გაწევრიანებული ვარ სან-ფრანცისკოში საგანმანათლებლო ორგანიზაციაში, რომლის მიზანია მოტივირებულ ადამიანებს დაეხმაროს მონაცემთა მეცნიერებაში განათლებისა და გამოცდილების მიღებაში. ბოლო რამდენიმე წელია ეს სფერო ყველაზე მიმზიდველ და საინტერესო სამუშაოდ ითვლება აშშ-ში. როგორც ვიცი, საქართველოშიც მიმდინარეობს მისი ათვისება. სამწუხაროდ, არ ვარ იქ ჩართული, თუმცა ჩემი დიდი სურვილია, დავეხმარო ახალგაზრდებს ამ მიმართულების არჩევაში და შემდგომ ორგანიზაციებთან ურთიერთობაში.
