,
ნატალია ხიზანიშვილმა აზიის ბაზარზე გადაინაცვლა და „ვოლტი იაპონიის“ გენერალური მენეჯერი გახდა. წლების განმავლობაში, ნატალია ჯერ საბანკო სფეროში საქმიანობდა. შემდეგ, სფერო შეიცვალა და „ვოლტის“ წარმომადგენლობას გაუძღვა საქართველოს, აზერბაიჯანისა და ყაზახეთის ბაზრებზე. ახლა კი, უკვე ორი თვეა, აზიის აღმოსავლეთ წერტილში გადაინაცვლა, ტოკიოში, სადაც „ვოლტის“ სათაო ოფისი მდებარეობს და საკურიერო კომპანიის იაპონიის ბაზარს ჩაუდგა სათავეში.
M: ნატალია, როგორ მიიღე შეთავაზება და რით არის საინტერესო ახალი პოზიცია ახალ ქვეყანაში?
მოგეხსენებათ, დღემდე ვიყავი ვოლტის რეგიონული მენეჯერი სამ ქვეყანაში – საქართველოში, აზერბაიჯანსა და ყაზახეთში. იაპონიაში ჩემი გადასვლის გადაწყვეტილება ვოლტის სათავო ოფისმა ბიზნესის პრიორიტეტებიდან გამომდინარე მიიღო. ჩემი გამოცდილების გამოყენება ისეთი დიდი პოტენციალის მქონე ქვეყანაში, როგორიც იაპონიაა, ძალიან მნიშვნელოვანი გადაწყვეტილება იყო ვოლტისთვის. მივიღე ეს საინტერესო გამოწვევა და გავხდი ვოლტი იაპონიის გენერალური მენეჯერი. მეორე თვეა, ვარ ტოკიოში და ეს არის ძალიან საინტერესო გამოწვევა. იაპონია დიდ ყურადღებას უთმობს ტრადიციებს და ეს აქტიურად მოქმედებს ბიზნესპროცესებზეც. არსებობს გარკვეული ბარიერები, მათ შორის ენობრივი და კულტურული კუთხით, რაც ჩემთვის სიახლეა და მათ შესახებ ყოველდღიურად ვსწავლობ.
M: როგორია შენი სამუშაო არეალი და ფუნქციები ახლა?
თუ აქამდე ჩემს რეგიონში შედიოდა სამი ქვეყანა და სამივე ქვეყნის მოსახლეობის ჯამური პოტენციალი იყო დაახლოებით 30 მილიონი, იაპონიის მოსახლეობა 126 მილიონს შეადგენს და მილიონზე მეტი რესტორანია. იაპონია მსოფლიოში ერთ-ერთი ყველაზე წამყვანი ეკონომიკაა, შესაბამისად, გაცილებით დიდი მასშტაბის პოტენციალის მქონე ქვეყნის ბაზრის მართვა გაცილებით რთული და კომპლექსური პროცესია. ეს გულისხმობს იმას, რომ განსხვავებული მართვის ტაქტიკებია საჭირო, პარტნიორობის მასშტაბი განსხვავებულია და გრძელვადიან პერსპექტივაში ძალიან დიდი პოტენციალია.
ჩვენი სათავო ოფისი ტოკიოშია. ქვეყნის მასშტაბით სულ 4 ოფისი გვაქვს, სადაც გვყავს დიდი და მოტივირებული გუნდი, რომელიც იაპონიის სხვადასხვა რეგიონში მსხვილ ქალაქებს წარმატებით მართავს. ჩემთვის პატივია, ვუხელმძღვანელო ამ ძლიერ გუნდს, რათა ერთად უზრუნველვყოთ ვოლტის მეტი ზრდა და წარმატება იაპონიის უმსხვილეს ბაზარზე.
M: რით განსხვავდება იაპონური ვოლტის მუშაობის პრინციპი ქართულისგან?
ჩვენი ბიზნესის, ჩვენი ინდუსტრიის მთავარი ამოცანა არის მასშტაბებზე გასვლა და გლობალურად, ჩვენს საქმიანობაში ეს პრინციპი მოქმედებს. რაც შეეხება კონკრეტულად იაპონიის ბაზარს, გარდა იმ ენობრივი და კულტურული ბარიერებისა, რომლებზეც უკვე ვისაუბრე, აქ ბიზნესპროცესების მართვა სხვა თავისებურებებსაც მოიცავს. ცვლილებების დანერგვა სხვა რეჟიმში ხდება და ძალიან ბევრი ბიზნესი ურთიერთობებს ეყრდნობა. ბევრი განსხვავებული პროცესია, რომელიც უნდა გაიარო, რომ შეძლო კონსენსუსამდე მისვლა. ამ ქვეყანაში ძალიან მნიშვნელოვანია ნდობა, რაც ძალიან რთული მოსახვეჭი და ძალიან ადვილი დასაკარგია. თუ არ გაქვს ნდობა და ორმხრივად სასარგებლო ძლიერი პარტნიორული ურთიერთობები, იაპონიაში ძალიან რთულია წარმატების მიღწევა. ყველაფერს მარტო, პარტნიორების გარეშე ვერ გააკეთებ. პარტნიორობა და ბიზნესურთიერთობები კი აქ ნდობას ეფუძნება.
M: მოლოდინებსა და სამუშაო გეგმებზეც გვიამბე…
ჩვენი მთავარი მიზანია, გავზარდოთ ჩვენი მუშაობის ეფექტურობა და წარმატებით განვახორციელოთ ჩვენს მიერ გაწერილი გეგმა, რაც მათ შორის არსებული ბაზრის წილის ზრდას გულისხმობს. ჩვენი წარმატების საზომი ეს შედეგები იქნება. კიდევ ერთხელ ვიმეორებ, ისეთი მასშტაბის ბაზრის მართვა, როგორიც იაპონიაა, საკმაოდ რთული და კომპლექსური პროცესია, მოიცავს პარტნიორობის განსხვავებულ მასშტაბებს და გრძელვადიან პერსპექტივაში უდიდეს პოტენციალს, თუმცა, ეს არის ძალიან საინტერესო გამოწვევა, რომლის დასაძლევად ძალისხმევას არ დავიშურებ.
წყარო:https://www.marketer.ge
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
