,
წყარო:https://bm.ge/
საქართველოს ექსპრემიერ ბიძინა ივანიშვილს მისი საინვესტიციო ფონდის, “თანაინვესტირების ფონდის” მიერ “მტკვარი ჰესის” მშენებლობის პროექტთან დაკავშირებით კითხვები აქვს. ორშაბათს ივანიშვილის ადვოკატის, თემურ წიქვაძის მიერ გავრცელებული განცხადებიდან ირკვევა, რომ პროექტის საინვესტიციო ღირებულება $100 მილიონით გაიზარდა და მან $236 მილიონ დოლარს მიაღწია. თანაინვესტირების ფონდის მიერ გამოქვეყნებული განცხადების თანახმად, მათ ჰესის მშენებლობასთან დაკავშირებული დოკუმენტაცია უკვე პროკურატურას მიაწოდეს.
“თანაინვესტირების ფონდი” მტკვარი ჰესის პროექტს 2014 წლიდან ახორციელებს. სადგური სამცხე-ჯავახეთში, ახალციხის მუნიციპალიტეტში მდებარეობს. მისი დადგმული სიმძლავრე 54 მეგავატია, ხოლო საინჟინრო მოწყობით მოდინებითი ტიპისაა და კაშხლის მშენებლობას არ ითვალისწინებს.
პროექტის სათავე ნაბეგობის მეშვეობით, მდინარე მტკვრის წყლის დაახლოებით 10% ჰიდროელექტროსადგურში მოხვდება, გაივლის 9.6 კილომეტრის სიგრძის სადერივაციო გვირაბს, რის შემდეგაც წყალი კვლავ მდინარე მტკვარში ბრუნდება. ჰესის ზედა წერტილი ზღვის დონიდან 1,015 მეტრზე, ხოლო ქვედა წერტილი 909 მეტრზე მდებარეობს.
ჰიდროელექტროსადგური წლის განმავლობაში 259 მილიონ კილოვატ ელექტროენერგიას გამოიმუშავებს. უკანასკნელი მდგომარეობით, მისი გახსნა 2024 წლის დასაწყისში არის დაგეგმილი.
“მტკვარი ჰესის” პროექტს 2009-2014 წლებში სააქციო საზოგადოება “კაუკაზუს ენერჯი ენდ ინფრასთრაქჩა” ახორციელებდა, რომლისგანაც შემდგომში “თანაინვესტირების ფონდმა” სადგურის 100% გამოისყიდა.
როგორც საარქივო ჩანაწერებიდან ირკვევა, ყველაზე რთული მონაკვეთი, რაც პროექტის განხორციელებას უკავშირდებოდა 9.6-კილომეტრიანი და 6 მეტრის დიამეტრის გვირაბის გაყვანა იყო, რომელიც სპეციალური TBM მანქანით გაიყვანეს.
შპს “მტკვარი ჰესს” გამოქვეყნებული აქვს 2021 წლის ფინანსური ანგარიში, საიდანაც ირკვევა, რომ პროექტის განხორცილებაში ჩართულები არიან კომპანიები - ენერგონი, ფერი, Kyivmetrobud-ი, Voith Hydro GmbH-ი, PetroSGEM-ი და IGHolding Rus-ის კონსორციუმი.
თანაინვესტირების ფონდის განცხადება "მტკვარი ჰესთან" დაკავშირებით:
“გვსურს, გამოვეხმაუროთ დღეს დილით ბატონი ბიძინა ივანიშვილის ადვოკატის ბატონი თეიმურაზ წიქვაძის მიერ გავრცელებულ განცხადებას საქართველოს თანაინვესტირების პროექტ "მტკვარი ჰესის" ბიუჯეტის ზრდასთან დაკავშირებით. როგორც განცხადებაში იყო ნათქვამი, დღევანდელი მონაცემებით, პროექტის ექსპლუატაციაში გაშვების მომენტისათვის მისი ღირებულება დაახლოებით $100 მილიონით გადააჭარბებს მის საწყის საპროექტო ღირებულებას.
პროექტის ღირებულების ამგვარმა ზრდამ ბუნებრივია წარმოშვა შეკითხვები ინვესტორის მხრიდან. ამის გამო, თანაინვესტირების ფონდიდან და შპს მტკვარიდან პროკურატურის მიერ შესაბამისი სასამართლო განჩინებების საფუძველზე გამოთხოვილ იქნა მტკვარი ჰესის პროექტთან დაკავშირებული დოკუმენტაცია და მასალები.
სრულად ვთანამშრომლობთ პროკურატურასთან, ჩვენი განზრახვა და ინტერესია ხელი შევუწყოთ ობიექტურ გამოძიებას".
ამერიკის შეერთებული შტატები “მშვიდობის საბჭოს” პირველი ოფიციალური სამიტისთვის ემზადება. პრეზიდენტ ტრამპის მიერ შექმნილი ახალი საერთაშორისო ორგანიზაციის პირველ სხდომას ვაშინგტონში მდებარე, ტრამპისვე სახელობის მშვიდობის ინსტიტუტი უმასპინძლებს.
არსებული ინფორმაციით, მას წევრი ქვეყნების უდიდესი ნაწილი, 20-ზე მეტი სახელმწიფოს ლიდერი დაესწრება. მათ შორის იქნებიან საუდის არაბეთის, თურქეთის, ეგვიპტის, კატარისა და ინდონეზიის წარმომადგენლები. ასევე სომხეთისა და აზერბაიჯანის მმართველები.
როგორც ირკვევა, პირველ სამიტზე პრეზიდენტი დონალდ ტრამპი ღაზას რეკონსტრუქციისთვის ფონდის შექმნას დააანონსებს და გამოაცხადებს, თუ როგორ დაკომპლექტდება ის “საერთაშორისო სტაბილიზაციის სამხედრო ძალა”, რომელიც ღაზას სექტორის საზღვარზე განლაგდება და უზრუნველყოფს, რომ ისრაელსა და ჰამასს შორის სამხედრო მოქმედებები აღარ განახლდეს.
ჯერჯერობით, უცნობია, ზუსტად რა რაოდენობის სამშვიდობოებს გაგზავნიან სახელმწიფოები, თუმცა ცნობილია, რომ ინდონეზიის კონტრიბუცია ამ მხრივ 8,000 ჯარისკაცი იქნება. რაც შეეხება ფინანსებს, პრეზიდენტი ტრამპი მოელის, რომ ღაზას სექტორის ხელახლა აღდგენისთვის წევრი სახელმწიფოებისაგან მილიარდობით დოლარს მოიზიდავს. შეგახსენებთ, “მშვიდობის საბჭოს” წევრობის საწევროს გადასახადი ერთ ქვეყანაზე $1 მილიარდია, თუმცა განსაზღვრული არ არის, ეს თანხა უნდა ჩაირიცხოს ერთიანად, თუ სხვადასხვა პროექტების ფარგლებში, მთელი წლის განმავლობაში. შესაბამისად, სავარაუდოა, რომ შტატების ლიდერი კოლეგებს ფონდში პირველადი ფინანსური კონტრიბუციის შეტანას სწორედ $1-მილიარდიანი ვალდებულების ფარგლებში სთხოვს.
რაც შეეხება ჰამასს, რომლის განიარაღებისა და ძალაუფლების ჩამორთმევის გარეშეც “მშვიდობის საბჭო” ღაზას სექტორის რეკონსტრუქციასა და ახალი ადმინისტრაციის სრულფასოვან მმართველობას ვერ უზრუნველჰყოფს, არსებული ინფორმაციით, მის ტერორისტებს საშუალება ექნებათ, სამშვიდობო ძალებს საკუთარი ნებით ჩააბარონ იარაღი და როგორც პალესტინის მშვიდობიანმა მცხოვრებლებმა, ისე განაგრძონ ცხოვრება. მათთვის, ვისაც ასეთ რეალობაში დარჩენა არ ენდომება, “მშვიდობის საბჭო” პარტნიორი ქვეყნების მეშვეობით ღაზას სექტორიდან გასვლაში დაეხმარება. შეგახსენებთ, ამჟამად ჰამასის ხელმძღვანელობის პოზიციაა, რომ ახალ ღაზაში დარჩენა და ჯარისკაცების საპოლიციო ძალებში გაწევრიანება სურთ, რათა იმ ბრძოლამ, რაც წლების განმავლობაში სექტორის დაცვისთვის გასწიეს, უკვალოდ არ ჩაიაროს. თუმცა როგორც ტრამპის ადმინისტრაცია, ისე ისრაელი ამ ფორმით ჰამასის ღაზაში დარჩენას კატეგორიულად ეწინააღმდეგებიან. სავარაუდოა, რომ შუამავალი სახელმწიფოები, რომლებიც “მშვიდობის საბჭოშიც” არიან წარმოდგენილი, 19 თებერვალს ამ საკითხზე აქტიურად იმსჯელებენ.
