,
მეტრო „გოცირიძეზე“ სარეაბილიტაციო სამუშაოების შემსრულებელი კომპანია „მამისონი“, სამუშაოების შესრულების 4-5 თვით დაგვიანების გამო 600 000 ლარით დაჯარიმდა. დღესვე, თბილისის მერმა, "მამისონს" და სხვა ბევრ სამშენებლო კომპანიას, უპასუხისმგებლო უწოდა, დაგვიანებულად განხორციელებული პროექტების გამო.
კომპანია “მამისონის” მეწილე ნიკოლოზ ჭკადუა აცხადებს, რომ კომპანიამ სამუშაოების გახანგრძლივება მხოლოდ 60 დღით ითხოვა, რის გამოც დაჯარიმდა. მისი თქმით, მეტროსადგურ “გოცირიძის” სარეაბილიტაციო სამუშაოების ვადების გახანგრძლივება მათგან დამოუკიდებელ მიზეზებს უკავშირდებოდა.
“ჩვენს კომპანიას მოუხდა დაახლოებით 60 დღით აღნიშნული პროექტის ვადის გაგრძელება. ჩვენ ვართ ჩვეულებრივი სამშენებლო კომპანია, კომპანიას არ ძალუძს ისეთი ბიუროკრატიული საკითხების გადაწყვეტა, როგორებიცაა სანებართვო პირობები, ექსპერტიზა და ა.შ. ეკონომიკის სამინისტროსთან კონკრეტული პროცედურების გავლა სამჯერ მოგვიწია, რამაც გამოიწვია ვადების დარღვევა”, - აცხადებს კომპანია “მამისონის” მეწილე ნიკოლოს ჭკადუა.
ის არ გამორიცხავს, რომ გამოწერილი ჯარიმა სასამართლოში გაასაჩივროს. ჭკადუას თქმით, კომპანია 2 თვეში 600 000 ლარის ოდენობით დაჯარიმებას არ ეთანხმება.
“ძალიან დიდი ოდენობის ჯარიმაა 2 თვის დაგვიანებაზე გამოწერილი, რაც გაურკვეველია. ალბათ ჩვენ წარვდგებით სასამართლოში სარჩელით. ეს ჯარიმა ჩვენთვისაც მოულოდნელია, რასაც არ ვეთანხმებით, იმიტომ რომ ცხადია, ვადების დარღვევაში მხოლოდ ჩვენი ბრალეულობა არ იყო. ნებისმიერ პროექტს ახლავს პრობლემები, განსაკუთრებით კი მეტროსადგურებს”, - ამბობს კომპანია “მამისონის” მეწილე.
ცნობისთვის, მეტროსადგური "გოცირიძის" რეაბილიტაცია 2021 წლის თებერვალში დაიწყო, მეტროსადგური მხოლოდ 3 თვით უნდა გაჩერებულიყო, თუმცა კონტრაქტორმა ვერ შეძლო სამუშაოების დროულად დასრულება და მასთან ხელშეკრულებას შეწყდა.
მეტრო "გოცირიძის" სარეაბილიტაციო სამუშაოები ვადებში ვერც მეორე კონტრაქტორმა კომპანია "მამისონმა" დაასრულა. ახალ კონტრაქტორთან ხელშეკრულების გაფორმებამ სამუშაოები თბილისის ბიუჯეტს გაუძვირა, 3,7 მლნ-ს ნაცვლად სადგურის რეაბილიტაცია 4.7 მლნ ლარი ჯდება.
შპს "მამისონს", რომელიც დღეს გოცირიძის მეტროსადგურის რეაბილიტაციაზეა პასუხისმგებელი ადგილზე სამუშაოები 7 თვეში უნდა დაესრულებინა, კომპანიასთან გამარტრივებული შესყიდვის გავლით ხელშეკრულება 2021 წლის 11 ნოემბერს გაფორმდა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
