,
ევროპარლამენტარი „მწვანეთა ალიანსიდან“, მარკეტა გრეგოროვა აცხადებს, რომ საქართველო, როგორც ასოცირების შეთანხმების ხელმომწერი, ევროკავშირის მნიშვნელოვანი პარტნიორია თავისი უნიკალური ადგილით ევროპულ სამეზობლოში. მან ამის შესახებ განაცხადა ევროპარლამენტის საგარეო საქმეთა კომიტეტის სხდომაზე, რომელზეც საქართველოს მიერ ევროკავშირთან გაფორმებული ასოცირების შეთანხმების შესრულებაზე მსჯელობენ.
„მე ამაყი ვარ, რომ ვმუშაობ და მეტიც, ვაფართოებ ამ ურთიერთობას. მინდა, ასევე მივულოცო ყველა ქართულ პარტიას 2020 წლის 8 მარტის ურთიერთგაგების მემორანდუმი და ერთობლივი განცხადება, რაც წარმოადგენს გადამწყვეტ ნაბიჯს საქართველოში პოლიტიკური გარემოს დეპოლარიზაციისა და ნორმალიზებისკენ. განსაკუთრებით კი, 2020 წლის საპარლამენტო არჩევნების წინ. დამატებით, მე ვიმედოვნებ და მოვუწოდებ დაინტერესებულ მხარეებს, რომ დაპირებული ზომები განხორციელდეს და ეს იქნება ნაბიჯი დემოკრატიული, ადმინისტრაციული და სასამართლო რეფორმებისკენ. საქართველოს წინსვლისთვის, მე მოვუწოდებდი, ჩაეტარებინათ სრული გამოძიება აღმასრულებელი ხელისუფლების ძალადობასთან დაკავშირებით, საპროტესტო აქციის მონაწილეებისა და ოპოზიციონერი პოლიტიკოსების მიმართ. მოვუწოდებ კომისიას, სრულად დაუჭირონ მხარი ევროკავშირთან თავისუფალ ვაჭრობას კოორდინირებული დახმარებით, რათა წავახალისოთ მდგრადი ეკონომიკური განვითარება და ეკონომიკურ სისტემაში სტრუქტურული რეფორმები. მათ შორის ბაზრის პრინციპებისა და სამართლიანი ბიზნეს გარემოს წახალისებით, კერძოდ კი, მცირე, საშუალო და რეგიონული ბიზნესისთვის.
მიუკერძოებელი, გამჭვირვალე და დამოუკიდებელი სასამართლო სისტემა დემოკრატიული საზოგადოების საფუძველია. ამასთან, მოსამართლეთა შერჩევისა და დანიშვნის პროცედურა უნდა აკმაყოფილებდეს უმაღლეს პროფესიულ და რეპუტაციის სტანდარტს. აუცილებელია მთავარი მიზნების კონსოლიდაცია, რათა დაცული იყოს კანონის უზენაესობა და პოლიტიკური გავლენის დასაძლევად“, – აცხადებს გრეგოროვა.
მან ევროკომისიასა და ევროპულ საბჭოს მოუწოდა, მხარი დაუჭირონ სამოქალაქო საზოგადოების ძალისხმევას პოლიტიკურად, ტექნიკურად და ფინანსურად.
