4 წლის ასაკიდან ვიცოდი, რომ თეატრის მხატვარი გავხდებოდი. რაც თავი მახსოვს, ვხატავ. თეატრისადმი გატაცება ოჯახური ტრადიციებით იყო განპირობებული. თბილისის სამხატვრო აკადემიის დასრულების შემდეგ სწავლა ასპირანტურაში განვაგრძე, კინომხატვრობის განხრით. სწავლის პარალელურად, წამყვან თეატრებში, შოუ დადგმებზე და კონცერტებზე ვმუშაობდი. ეს გამოცდილება ძალიან დამეხმარა უცხოეთშიც.
იტალიაში 2002 წელს ჩამოვედი. ფლორენციაში დახელოვნების კურსი გავიარე ვირტუალურ სცენოგრაფიაში. ჩემი მოღვაწეობა წარმატებით დაიწყო. ფლორენციის ოპერის თეატრის კონკურსი მოვიგე, რის შედეგად გავაფორმე სპექტაკლი თანამედროვე კომპოზიტორის, ფრანჩესკო ტრავერსის ოპერა „ორესტე“, რომელიც ცნობილი ფესტივალის Maggio Musicale Fiorentino-ს ფარგლებში განხორციელდა (რეჟისორი მასიმო მატიოლი).
ამის შემდეგ მოვიგე ოქროს მედალი მულტიმედიურ სცენოგრაფიაში კიდევ ერთ პრესტიჟულ კონკურსზე - Premio Firenze, ეს იყო ფლორენციის მუნიციპალიტეტის მიერ ორგანიზებული პროექტი. ჩემი საკონკურსო ნამუშევარი გამოიფინა Palazzo Vecchio-ს Salone dei Cinquecento-ში. მახსოვს, რომ ძალიან ბედნიერი და ამაყი ვიყავი პრესტიჟული ჯილდოთი და ექსპოზიციით. უდიდესი ემოცია იყო ჩემთვის ამ ისტორიულ ადგილში გამოფენა.წლების მანძილზე უამრავი პროექტი განვახორციელე არა მხოლოდ თეატრალური სცენოგრაფიის მიმართულებით, არამედ როგორც საერთაშორისო გამოფენების არტ დირექტორ - დიზაინერმა. ვთანამშრომლობდი როგორც ღონისძიების დიზაინერი Vogue Italia-სთან და Condé Nast-ის ჯგუფ Alta Moda-ასთან Luxury Event - ების სფეროში.
ამჟამად აქტიურად ვარ ჩართული საერთაშორისო პროექტებში. ორ პროექტზე ვმუშაობ. ერთია Oxford Opera Society-ს პროექტი სეზარ კუის ოპერა „ნადიმი დიდი ჭირიანობისას,“ რომლის ლიბრეტოც ეფუძნება პუშკინის ერთ-ერთ “პატარა ტრაგედიას”, პრემიერა ივნისშია დანიშნული (რეჟისორი ტონი შარლი). მეორე არის ასტანა ოპერის პროდუქცია-დომენიკო ჩიმაროზას “საიდუმლო ქორწინება”. ასტანის ოპერაში პირველად 2019 წელს მიმიწვიეს დამდგმელ მხატვრად, ჯოაკინო როსინის ოპერის - “აბრეშუმის კიბის” გასაფორმებლად, ხოლო ჩემი მეორე კოლაბორაცია ამ თეატრთან გასულ წელს შედგა, როდესაც დონიცეტის “დონ პასკუალე” დაიდგა. ამ სპექტაკლზე მუშაობა შარშან გაზაფხულზე დაიწყო. კოვიდის პირველი ტალღის დროს ბევრი სიძნელე წარმოიშვა, მაგრამ საბოლოოდ პრემიერამ ტრიუმფალურად ჩაიარა. ეს არის ნათელი მაგალითი იმისა, რომ მიზანდასახულობა და ძალისხმევა ნებისმიერ სიტუაციაში თავის შედეგს იძლევა. სამომავლოდ რამდენიმე სეზონი მაქვს დაგეგმილი. ბედნიერი ვარ, რომ მსოფლიოს სხვადასხვა თეატრში ცხოვრება არ ჩერდება და მეც ამ პროცესის ნაწილი ვარ. ასევე აქტიურად ვთანამშრომლობ საქართველოსთან, პერმანენტულად ვმოღვაწეობ კიდევ ერთ სფეროში- ეს არის საგამოფენო დიზაინი.
ნებისმიერი მხატვრისთვის და ხელოვანისთვის ძალიან მნიშვნელოვანია არა მხოლოდ პროფესიული განათლების მყარი ბაზა, არამედ თეორიული ცოდნის პრაქტიკაში გამოყენების უნარი; გამოფენებში და ფესტივალებზე მონაწილეობა, პროფესიონალური კონტაქტების დამყარება და გამოცდილების გაზიარება. ასევე სასიცოცხლოდ აუცილებელია ინფორმაციის მიღება, თუ რა ხდება მსოფლიოში და როგორ მუშაობენ ჩვენი კოლეგები ან კონკურენტები. ჩვენს ეპოქაში ინფორმაცია აბსოლუტური დომინანტია, ძალიან სწრაფად ვითარდება და ამ განვითარების რიტმს არ უნდა ჩამოვრჩეთ.