,
თუ ნაწილობრივი კონსენსუსი მაინც არ იქნა, პროექტის დაინიცირებას საერთოდ არ აქვს აზრი, - ამის შესახებ საპარლამენტო უმრავლესობის ლიდერმა მამუკა მდინარაძემ საარჩევო სისტემის ახალ მოდელთან დაკავშირებით ჟურნალისტებს განუცხადა. მისი თქმით, თუ მმართველი გუნდის მიერ შეთავაზებულ მოდელს ოპოზიციის ნაწილი მაინც არ დაეთანხმა, საკონსტიტუციო კანონის პროექტის ინიცირებას აზრი არ აქვს.
„თუ პარტიების ნაწილი მაინც არ დაეთანხმა, ცვლილებების წარდგენას აზრი არ ექნება. თუ ნაწილობრივი კონსენსუსი მაინც იქნა, მაშინ კი ბატონო. თუ იმაზეა საუბარი, რა დათმობაზე მივდივართ ჩვენ, შემიძლია გარანტია მოგცეთ, რომ სულ რაღაც 3-4 დღეში ყველა ის პირობა იქნება დაწერილი, რაზეც ჩვენ ზეპირად ვლაპარაკობთ. გარანტიას გაძლევთ, რომ ამ პროექტში ჩადებულ დამზღვევ მექანიზმებთან დაკავშირებით ერთი სიტყვაც კი ვერ იქნება ობიექტურად კრიტიკულად მიმართული,"- განაცხადა მდინარაძემ.
ჟურნალისტების კითხვაზე, შესაძლოა თუ არა კანონპროექტში ჩაიდოს 1%-იანი ბარიერი, მდინარაძემ უპასუხა, რომ მმართველი გუნდი მზად არის, იმდენ პროცენტიანი ბარიერის დასაწესებლად, რამდენსაც ოპოზიცია შესთავაზებს.
„ბარიერთან მიმართებაში ვაცხადებთ - რამდენიც მათ ნებავთ. შეთანხმდნენ და მოიტანონ საკუთარი ვერსია. ამასთან დაკავშირებით იმდენად არ გვაქვს პრობლემა, რომ ჩავუწერთ, რაზეც შეთანხმდებიან.
ასევე სულერთია 110/40 ზე იქნება თუ 100/50ზე, მაგრამ აქ არის ერთადერთი მოტივი, რომ 40-ს ქვევით არ შეიძლება ჩამოსვლა, რადგან უკვე დამახინჯებული სისტემა შემოდის. ასევე შემიძლია გარანტია მოგცეთ იმაზე, რომ მაჟორიტარების ნებისმიერი რაოდენობა მეორეხარისხოვანი ხდება იმ შემთხვევაში, როდესაც ე.წ. დამზღვევი მექანიზმები იქნება კანონმდებლობაში ჩადებული,"- განაცხადა მდინარაძემ.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
