თბილისის მერის მოადგილის, მაია ბითაძის განცხადებით, საზოგადოებრივ ტრანსპორტს, რომელსაც ჭავჭავაძის გამზირზე გადასაადგილებლად 20-25 წუთი სჭირდებოდა, დღეს 8 წუთი სჭირდება.

როგორც ბითაძე აცხადებს, ეს არის მნიშვნელოვანი ნაბიჯი ქალაქის ეკოლოგიური მდგომარეობის გაუმჯობესებისკენ, საცობების მართვისკენ და ეს ღონისძიებები მთელ თბილისში გატარდება.

„ჭავჭავაძის ქუჩის რეაბილიტაციის შემდეგ, სატრანსპორტო სქემის შეცვლის პირველ დღეს, ბუნებრივია, იყო გარკვეული პრობლემები, რომელიც დაკავშირებული იყო ავტომობილების მძღოლების ახალ მარშრუტთან ადაპტაციით. მთელი შაბათ-კვირა მიმდინარეობდა ფაზების გადაწყობა ახალ მარშრუტთან მიმართებით. აბსოლუტურად გამართლდა ჩვენი მოლოდინები, რომელიც დაფუძნებულია სატრანსპორტო მოდელის კვლევებსა და ნაკადების დათვლაზე. ნაკადების დათვლა 2 წლის განმავლობაში მიმდინარეობდა და არა მარტო ჭავჭავაძის გამზირის ნაკადებია დათვლილი, არამედ, მთელი თბილისის მასშტაბით. სამარშრუტო სქემები, რომელსაც მერია განახორციელებს, დაფუძნებული იქნება სწორედ ამ კვლევებზე და ელექტრონულ-პროგრამულ-ციფრულ მოდელებზე. ყველაზე მნიშვნელოვანი არის ის, რომ ეს არის საქართველოში პირველი ნაბიჯი, როდესაც თანამედროვე მეთოდებზე დამყარებით უზრუნველყოფს იმას, რომ თბილისში საცობები ეტაპობრივად აღმოიფხვრება. ეს მოხდება იქედან გამომდინარე, რომ საზოგადოებრივ ტრანსპორტს, რომელსაც ჭავჭავაძის გამზირზე გადასაადგილებლად 20-25 წუთი სჭირდებოდა, დღეს 8 წუთი სჭირდება. ეს არის მნიშვნელოვანი ნაბიჯი ქალაქის ეკოლოგიური მდგომარეობის გაუმჯობესებისკენ, საცობების მართვისკენ და ეს ღონისძიებები მთელ თბილისში გატარდება“, - განაცხადა ბითაძემ.

თბილისის მერის მოადგილემ ოპონენტებს ურჩია ევროპის ქვეყნების გამოცდილებას გაეცნონ.

„დაახლოებით, 15-18 წლის წინ ევროპის დიდ ქალაქებში - პარიზში, მილანში, ამსტერდამში ზუსტად იგივე პრობლემებს აწყდებოდნენ და ზუსტად სატრანსპორტო მოდელების და სქემების გამოყენებით მართულია ამ ქალაქებში საცობები. ყველაზე მნიშვნელოვანია ის, რომ მოსახლეობამ კარგად უნდა გაიგოს - ჭავჭავაძეზე ერთი ხელის მოსმით არ ყოფილა გადაწყვეტილება მიღებული, ეს დაფუძნებული იყო სატრანსპორტო კვლევებზე, ნაკადებზე და ამაში გვეხმარებიან ჩვენი უცხოელი კოლეგები. ნაკადები ჭავჭავაძეზე 50/50-ზე გადანაწილდა. საათში ამ გამზირზე გადაადგილდებოდა 3000-მდე მანქანა, აქედან 50% იყენებდა ზედა ქუჩებს. ის 50%- რომელთ დანიშნულების ადგილი იყო არა ჭავჭავაძის გამზირი, არამედ ზედა ვაკე, ისარგებლებს ახალი სამარშრუტო სქემით. ამ სქემით ისინი ბოლო ერთი წლის განმავლობაშიც სარგებლობდნენ ჭავჭავაძის რეაბილიტაციის პროცესში.

ვარწმუნებ მოსახლეობას, რომ ჩვენ ნაკადები დათვლილი გვაქვს პიკის საათებში 20%-იანი მატებით. არც სექტემბრის გვეშინია და არც იმის, რომ რაღაც ისეთი მოხდება, რასაც ქართველი მძღოლები ვერ დაემორჩილებიან. სატრანსპორტო სქემაზე ადაპტაციას ერთი-ორი დღე სჭირდება, თუმცა, ნაკადებზე დაკვირვებას მუდმივ რეჟიმში ვახორციელებთ. მთავარია ის, რომ მოლოდინის დრო მგზავრებისთვის საგრძნობლად არის შემცირებული“, - განაცხადა ბითაძემ და დასძინა, რომ თუ დღეს საზოგადოებრივ ტრანსპორტს 50 ათასი ადამიანი გადაჰყავს, ახალი სქემების ამოქმედების შემდეგ 90 ათასი მგზავრის გადაყვანა იქნება შესაძლებელი.

ასევე, მერის მოადგილის თქმით, დედაქალაქის ყველა იმ უბანში, სადაც დღეს საზოგადოებრივი ტრანსპორტი საერთოდ დადის, ავტობუსები ივლის.

„მერწმუნეთ, 7-8 წლის შემდგომ ჩვენი მენტალიტეტისთვის ბევრად ბუნებრივი იქნება 18-მეტრიანი ავტობუსით გადაადგილება ძალიან მოკლე დროში, ვიდრე კერძო ავტომობილით გადაადგილება და საწვავში დიდი თანხების გადახდა. იმის გათვალისწინებით,. რომ საზოგადოებრივ ტრანსპორტში ფასის გაზრდას მერია არ გეგმავს და კვლავ სუბსიდირებას ვაგრძელებთ“, - განაცხადა ბითაძემ.