კანადაში 2007 წელს ჩამოვედი. დედა ცხოვრობდა აქ და მან წამოგვიყვანა მე და ჩემი ძმა. ჩამოსვლიდან რამდენიმე დღეში დავიწყე მუშაობა დიდ საცხობში, სადაც ასობით ადამიანი იყო დასაქმებული. ეს ერთ-ერთი ყველაზე რთული სამსახური იყო, სადაც მიმუშავია.
ასევე, ვმუშაობდი მშენებლობაზე, მაღაზიებში, დალაგებაზე... მოლოდინი საერთოდ სხვა იყო და რეალობა სხვა. მხოლოდ იმიტომ, რომ ქვეყანა არის განვითარებული, არ ნიშნავს იმას, რომ დიდი შრომის გარეშე შეძლებ რამეს მიაღწიო. ადაპტაციისთვის რამდენიმე წელი დამჭირდა, რაც ნამდვილად არ იყო ადვილი, უფრო მენტალურად გამიჭირდა, ვიდრე ფიზიკურად.
ამ ყველაფრის პარალელურად , ონლაინ ვმუშაობდი საქართველოში სხვადასხვა ვებ პროექტზე, რაც ფინანსურად ძალიან მეხმარებოდა კანადაში. 17 წლის ვიყავი, როდესაც შევქმენი მინი თამაშების პორტალი yoo.ge , რომელიც ყოველ თვე $1800-ს გამოიმუშავებდა. იმ პერიოდში ეს ძალიან დიდი თანხა იყო. კარგი გამოცდილება მივიღე ასევე live.ge-ზე მუშაობისას, ბევრი მომხმარებელი ჰყავდა მაშინ ახალი ამბების აგრიგატორს.
2012 წელს შევქმენი hot.ge, სადაც შოუ-ბიზნესის სიახლეები ქვეყნდებოდა. ეს პროექტი ძალიან სახალისო იყო და თან ძვირი სიამოვნება, რადგან ბევრი შარი და ვალი დამიგროვდა, თუმცა გამოცდილებაც მივიღე. კანადაში გავაკეთე დალაგების კომპანიის ავტომატიზირებული სისტემა Cleaning Bees. ხანდახან საქმე ადვილი გეჩვენება და რეალობაში კი ბევრად რთულია. ეს პროექტიც ზუსტად ასეთი იყო. რაც მეტი კლიენტი გვემატებოდა, მით უფრო რთულდებოდა საქმე. ჩემი მიზანი იყო ბევრი ტექნოლოგია და ცოტა თანამშრომელი. ამ ბიზნესს კი ბევრი თანამშრომელი სჭირდებოდა. იყო შესაძლებლობა, რომ ტექნოლოგიით მოგვეგვარებინა პრობლემების უმეტესობა, თუმცა მოგვარება არ ღირდა შრომად.
2014 წელს მზადება დავიწყეთ ახალი კომპანიის შესაქმნელად, რომ გაგვეყიდა ნახმარი და ახალი საოფისე ავეჯი. დღეს 100%-ახალ ავეჯს ვყიდით და თან ჩვენი დიზაინით შექმნილს. ორი დიდი შოურუმი გვაქვს ტორონტოში და კომპანიას წელიწადში რამდენიმე მილიონიანი ბრუნვა აქვს. ოთხწლიანი დეველოპმენთის შემდეგ, ორი თვის წინ ახალი სისტემა ჩავუშვით, რაც გვაძლევს საშუალებას, რომ ჩვენი ბიზნესი გავზარდოთ სწრაფად და მარტივად მთელი მსოფლიოს მასშტაბით.
თანამედროვე ტექნოლოგიების დახმარებით ყოველდღიურად უფრო და უფრო მეტი ტრანზაქციები სრულდება. პროგრამირება მნიშვნელოვან როლს თამაშობს ისეთი სფეროების განვითარებაში, როგორიც არის უსაფრთხოება , მედიცინა და ა.შ. რაც შეეხება საქართველოს, ის ყოველთვის იყო და იქნება ჩემი ფუძე, რამაც დღემდე მომიყვანა. თუმცა, იქ არც ბიზნესის და არც ცხოვრების სურვილი არ მაქვს. რთულია პატივი სცე იმ ადამიანთა კატეგორიას, ვინც თავად არ სცემენ პატივს საკუთარ თავს. მიმაჩნია, რომ არ აქვს მნიშვნელობა სად ხარ, მთავარია იცოდე ვინ ხარ. დაივიწყე მორცხვობა და თავშეკავება. როცა საქმე ეხება მიზნის მიღწევას, ყველაფერი არის შესაძლებელი!