,
დღეიდან, ისრაელი კორონავირუსის ახალი შტამის გამო, საგანგებო მდგომარეობას აწესებს. ინფორმაცია ადგილობრივ მედიაზე დაყრდნობით ვრცელდება.
პრემიერ-მინისტრ ბენიამინ ნეთანიაჰუს განცხადებით, შეზღუდვები თებერვლის ბოლომდე გაგრძელდება. ნეთანიაჰუ აღნიშნავს, რომ კორონავირუსის პრევენციას ვაქცინაციასთან ერთად საგანგებო მდგომარეობაც დაეხმარება. მისი ვარაუდით, ეკონომიკის აღდგენა თებერვლის ბოლოდან შესაძლებელი იქნება.
აღსანიშნავია, რომ ისრაელში კორონავირუსის საწინააღმდეგო ვაქცინით მოსახლეობის ვაქცინაცია ყველაზე სწრაფი ტემპით მიმდინარეობს.
„ჩვენი მიზანია, უახლოეს მომავალში 5.5 მილიონი სრულად ვაქცინირებული მოქალაქე გვყავდეს“, - განაცხადა ისრაელის ჯანდაცვის მინისტრის მოადგილე იოავ კიშიჩმა.
ქვეყნის ჯანდაცვის სამინისტროს მონაცემებით, ამ ეტაპზე ქვეყანაში 1.3 მილიონი ადამიანია ვაქცინირებული; მათგან ყველას მიღებული აქვთ ვაქცინის პირველი დოზა, ხოლო ნაწილი ვაქცინის მეორე დოზის მიღებას მომდევნო კვირების განმავლობაში ელოდება
შეგახსენებთ, რომ პანდემიის გავრცელებიდან დღემდე ქვეყანაში კორონავირუსის 643 435 დადასტურებული შემთხვევაა გამოვლენილი, დაღუპულია 4 796 ადამიანი.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
