ინფექციური საავადმყოფოს ბოქსირებული განყოფილების უფროსის მარინა ენდელაძის განცხადებით, კორონავირუსის 3072 აქტიური შემთხვევიდან კრიტიკულად მძიმეა 28 პაციენტის ჯანმრთელობის მდგომარეობა, აქედან 26 მართვით სუნთქვაზე.
მისივე თქმით, 8 პაციენტი აფხაზეთიდან არის გადმოყვანილი.
„ახალი გამოვლენილი შემთხვევებიდან, აჭარაში ისევ მაღალია ინფიცირებულთა ოდენობა - 235 პაციენტი. შემდეგ მოდის იმერეთი - 38 პაციენტი, შემდეგ თბილისი - 30 პაციენტი. სამეგრელო- ზემო სვანეთში 14 ახალი შემთხვევაა, გურიაში - 6, კახეთში, მცხეთა-მთიანეთსა და სამცხე-ჯავახეთში არის თითო-თითო ახალი შემთხვევა“, - განაცხადა ენდელაძემ.
მარინა ენდელაძის ინფორმაციით, ბოლო 24 საათში 800-მდე პაციენტი გამოჯანმრთელდა.
ენდელაძემ დღეს ჟურნალისტებთან განმარტა, რომ კორონავირუსისგან გამოჯანმრთელებულთა რაოდენობის პროცენტი გაზრდილია და ის მთლიან დადასტურებულ შემთხვევათა 50%-ს აღემატება.
მისივე თქმით, გუშინ დამატებით 796 პაციენტი გამოჯანმრთელდა.