,
ჩვენც შეშფოთებული, აღშფოთებული ვართ იმ ფაქტებით, რომ მთელი ამ ხნის განმავლობაში მიმდინარეობს სიცრუის კამპანია - ეს არის ჩვეულებრივი ცრუ კამპანია იმიტომ, რომ ვერანაირი არგუმენტი ვერ წარმოადგინეს რატომ შეიძლება გამჭვირვალობა იყოს ცუდი - ვფიქრობ გამოიძებნება ბევრი ისეთი ადამიანი, ვინც შეაფასებს რეალურ მდგომარეობას, თუნდაც გამჭვირვალობის შესახებ კანონს, - ამის შესახებ „ქართული ოცნების“ გენერალურმა მდივანმა კახა კალაძემ განაცხადა, რითაც აშშ-ს ვიცე-პრეზიდენტის კამალა ჰარისის მიერ სალომე ზურაბიშვილისთვის გაგზავნილ წერილს გამოეხმაურა.
კალაძის განცხადებით, არგუმენტები არ ყოფილა წარმოდგენილი იმასთან დაკავშირებით თუ რატომ შეიძლება ეწინააღმდეგებოდეს ევროპულ ღირებულებებს გამჭვირვალობის შესახებ კანონი.
„ჩვენც შეშფოთებული, აღშფოთებული ვართ იმ ფაქტებით, რომ მთელი ამ ხნის განმავლობაში მიმდინარეობს სიცრუის კამპანია. შემიძლია პირდაპირ პარალელები გავავლო იგივე სააკაშვილის ჯანმრთელობის მდგომარეობასთან დაკავშირებით, თუ რა სიცრუისა და ბოროტების კამპანია მიმდინარეობდა ქვეყნის წინააღმდეგ. დღესაც იგივეა. ეს არის ჩვეულებრივი ცრუ კამპანია იმიტომ, რომ ვერანაირი არგუმენტი ვერ წარმოადგინეს რატომ შეიძლება გამჭვირვალობა იყოს ცუდი ან რატომ შეიძლება ეწინააღმდეგებოდეს ევროპულ ღირებულებებს, ევროპულ მომავალს. დამერწმუნეთ ჩვენ ვართ ის გუნდი, რომელიც ყველაფერს გააკეთებს ევროინტეგრაციის გზაზე.
ჩვენთვის არსებობს პრინციპები, რომელთა გადახვევასაც არ ვაპირებთ და ეს არის ქვეყნის ინტერესი, მისი ხვალინდელი დღე. არავის მივცემთ იმის შესაძლებლობას, რომ იგივე მდგომარეობა იყოს ქვეყანაში, რაც სამწუხაროდ, ხდება დღეს უკრაინაში. გამოვლილი გვაქვს ეს ყველაფერი და ვიცით, რამხელა უბედურების მომტანია ომი. არ გვინდა, რომ სხვა ქვეყნის ინტერესების გამო ამ ყველაფერს ჩვენი ქვეყანა შეეწიროს, მისი ინტერესები იყოს ფეხქვეშ გათელილი.
ჩვენ ვართ კარგი მეგობარი ქვეყანა, პარტნიორებიც. ეს მხოლოდ სიტყვებით არ შემოიფარგლება. დღესაც მზად ვართ, მეგობრობისთვის, თანამშრომლობისთვის, პარტნიორობისთვის. მაგრამ ეს უნდა იყოს ორმხრივი“,- განაცხადა კახა კალაძემ.
გარდა ამისა, კახა კალაძე გამოეხმაურა მოსალოდნელ სანქციებსაც და აღნიშნა, რომ ეს არის „ჩვეულებრივი მუქარა და შანტაჟი“.
„გაიხსენეთ რა განცხადებები კეთდებოდა კანდიდატის სტატუსთან დაკავშირებით, პირდაპირ პარალელს ავლებდნენ, რომ თუ [მიხეილ] სააკაშვილი, კრიმინალი, რომელიც დამნაშავეა კონკრეტულ საქმეებში არ იქნებოდა გამოშვებული, ქვეყანა ვერ მიიღებდა კანდიდატის სტატუსს. ხალხი ხვდება ყველაფერს თუ რისთვის ხდება აღნიშნული განცხადებების გაკეთება, რატომ იყენებენ იგივე მოლაპარაკებების გახსნას, ვიზალიბერალიზაციას, კანდიდატის სტატუსს ქვეყნის წინააღმდეგ. იმიტომ, რომ მათ უნდათ ხელისუფლება შეცვალონ. უნდათ, თავიანთი აგენტურა მოიყვანონ ხელისუფლებაში და ქვეყანა ჩააყენონ უმძიმეს საომარ მდგომარეობაში. ეს მათი სურვილია და ჩვენ სულელები ხომ არ ვართ?! გვიყვარს ჩვენი ქვეყანა, ჩვენი სამშობლო. ვფიქრობ გამოიძებნება ბევრი ისეთი ადამიანი, ვინც შეაფასებს რეალურ მდგომარეობას, თუნდაც აღნიშნულ კანონს. თუ საფრანგეთისათვის, ამერიკისთვის, ისრაელისთვის, კანადისთვის მისაღებია აღნიშნული კანონი, თუ ევროკავშირშია დაინიცირებული, როგორ შეიძლება ეს ჩვენთვის იყოს პრობლემა და ეწინააღმდეგებოდეს ევროპულ ღირებულებებს. გამოდის, რომ მაშინ სხვა რაღაცაშია საქმე და სხვა ინტერესებია. ვიცით რა ინტერესებია ეს და რისკენაც არის მიმართული. არ გვინდა ეს ყველაფერი და გვინდა მშვიდობა ამ ქვეყანაში“,- აღნიშნა კალაძემ.
აშშ-ს ვიცე-პრეზიდენტი კამალა ჰარისი სალომე ზურაბიშვილს წერილს უგზავნის.
„პრეზიდენტი ბაიდენი და მე დიდი შეშფოთებით ვადევნებთ თვალს საქართველოში განვითარებულ მოვლენებს. პარლამენტის მიერ „უცხოელი აგენტების შესახებ“ კანონპროექტის მიღებამ შეიძლება საფრთხე შეუქმნას საქართველოს დემოკრატიას და ძირი გამოუთხაროს საქართველოს ურთიერთობას შეერთებულ შტატებსა და ევროპასთან", - ნათქვამია წერილში.
„სუფრა - ასე ჰქვია ქართულ მოლხენა-დროსტარებას, რომელიც სტუმართმოყვარეობისა და მხიარულების განსახიერებას წარმოადგენს. რომელი კერძებს მიირთმევენ ქართველები სტუმრებთან ერთად? ჩვენი კორესპონდენტი შეეცადა ქართული სუფრის დიდებულება ეჩვენებინა და დარწმუნდებით, რომ ეს მართლაც კარგად გამოუვიდა“, - ასე იწყება გერმანულ გაზეთ „ფრანკფურტერ ალგემაინე ცაითუნგში“ (Frankfurter Allgemeine Zeitung) გამოქვეყნებული სტატია სათაურით „ქართული სამზარეულოს მრავალფეროვნება“ (ავტორი - მაიკე ფონ გალენი).
გთავაზობთ პუბლიკაციას შემოკლებით:
„როცა მივედით, მაგიდა უკვე გაშლილი დაგვხვდა: თეფშებზე დაწყობილი ყველით და ლორით, ნიგვზის ფარშიანი ბადრიჯნით, მხალეულობით, მწვანილით, კიტრით და პომიდორით... მათ შორის ჩადგმულია გრაფინები მოცხარის წვენით და ტარხუნის ლიმონათის ბოთლებით. ოფიციანტი წითელ ღვინოს ბოკალებში ასხამს. გარეთ თბილისური საღამოა, რესტორან „რიგის“ დარბაზში გაშლილ გრძელ მაგიდაზე კი ქართული სუფრა - ქართული ქეიფი იწყება.
ისინი, რომლებიც ქართულ სამზარეულოს არ იცნობენ, მადააღძრულები სწრაფად მიირთმევენ სიმინდის ფქვილისაგან გამომცხვარ თბილ მჭადებს, სალათებს და ყველს. მაგრამ ვინც იცის, ის ნელ-ნელა ჭამს და მთავარს ელოდება...
ქართველი ქალბატონი თიკო ტუსკაძე, რომელიც ლონდონში ცხოვრობს, მაგრამ ახლა სამშობლოში იმყოფება, ჩვენი გიდის როლს ასრულებს და ქართულ სუფრას გვაცნობს როგორც „გემრიელი საჭმელების უსასრულო რიგს“. იგი კულინარული წიგნის ავტორია და გვიხსნის, თუ რომელი საჭმელი როგორ მივირთვათ.
ზოგიერთმა უკვე საკმაო რაოდენობის სალათა მიირთვა, რომ მაგიდაზე ახალი კერძები მოაქვთ - მოხრაკულ-მოთუშული სოკო, ხაჭაპური, ხორცით მომზადებული კერძები... საჭმლით სავსე თეფშები სულ უფრო მრავლდება და მაგიდაზე თავისუფალი სივრცე მცირდება, თუმცა ახალ-ახალი ნუგბარისათვის ადგილი მოიძებნება.
„სტუმართმოყვარეობა - ქართული კულტურის განუყოფელ ნაწილს წარმოადგენს, რაც კარგად არის გამოხატული ქართულ სუფრაში, როცა მაგიდას ეროვნულ სამზარეულოს კერზები ამშვენებს“, - განმარტავს მაკა თარაშვილი. რა თქმა უნდა, იგი ახალბედა სუფრის წევრებისაგან განსხვავებით, შეცდომებს არ უშვებს და ყველაფერს ერთად არ მიირთმევს. მან კარგად იცის, რა როდის უნდა მიირთვას და უცხოელ სტუმრებს ჭამის საიდუმლოებას ასწავლის: როდის დგება მწვადის, „ჩაქაფულის და საჭმელების მიღების დრო...
ქართული ტრადიციის თანახმად, სუფრაზე იმდენი საჭმელი უნდა იყოს, რომ სტუმრების წასვლის შემდეგაც საკმაო რაოდენობით უნდა დარჩეს: „სუფრა, რომელზეც არაფერი აღარ რჩება, საქართველოში არ არსებობს“, - ამბობს მაკა თარაშვილი, - მასპინძლები იფიქრებენ, რომ სტუმრები მშივრები დარჩნენ. ამიტომ ყველაფერი უამრავია“.
რესტორანი „ქეთო და კოტე“ ძველი თბილისის უბანში, შემაღლებულ ადგილზე მდებარეობს. დარბაზში მყუდრო გარემოა შექმნილი. მაგიდები ყოველთვის მდიდრულადაა გაშლილი - ტრადიციული კერძები თანამედროვე სტილითაა გაფორმებული. თავდაპირველად თვენ მოგართმევენ ცივ და ვეგეტარიანულ კერძებს, ბოსტნეულს, შემდეგ გამომცხავარს, ცომეულს, ბოლოს კი ხორცით მომზადებულ საჭმელებს.
ქართული სუფრის ტრადიციაა თამადა, ანუ დროსტარების ხელმძღვანელი. იგი სუფრის თავში ზის და სადღეგრძელოებს ამბობს. რესტორან „შატო მუხრანში“, სადაც ჩვენ ვიყავით (თბილისიდან ერთი საათის სავალზე), მეღვინე პატრიკ ჰონეფმა ჩვენი სტუმრობის სადიდებელი სადღეგრძელო წარმოსთქვა. გერმანელი მეღვინე უკვე მრავალი წელია საქართველოში ცხოვრობს, ოჯახიც აქ ჰყავს. პატრიკი მადლობას გვიხდის სტუმრობისათვის, რომ გერმანელი ტურისტები საქართველოთი დაინტერესდნენ და კავკასიურ ქვეყანას ეწვივნენ.
მასპინძელი გვიხსნის, რომ სუფრის თამადა ყურადღებით ისმენს სტუმრების საუბარს სადღეგრძელოებისათვის იმპულსის მისაცემად. იგი დისკუსიას ზომიერ მიმართულებას აძლევს და განწყობას ამაღლებს. ამიტომაც თამადა ისეთი პიროვნებაა, რომელიც ცნობილია თავისი კეთილი ხასიათით, გონებამახვილობით და ინტელექტით.
თუ როგორ მზადდება კლასიკური ქართული კერძები, ამას თქვენ თბილისიდან საკმაოდ მოშორებით, კახეთში გაიგებთ, სადაც ღვინის კომპანია „შუმის“ რესტორანი მდებარეობს. აქ სტუმარი საკუთარი თვალით ხედავს, თუ როგორ ცხვება ქართული თონის პური, როგორ კეთდება ხინკალი, რომელიც ქართული სამზარეულოს ერთ-ერთ დიდებულ და გემრიელ კერძს წარმოადგენს.
