,
თბილისის მერი კახა კალაძე, მოადგილე კახა გულედანთან ერთად, ბაქოს მერს ელდარ აზიზოვსა და განჯის მერს ნიაზი ბაირამოვს შეხვდა.
შეხვედრაზე საუბარი შეეხო საქართველოსა და აზერბაიჯანს შორის კეთილმეზობლურ ურთიერთობას, ასევე, თბილისსა და ბაქოს, როგორც დაძმობილებულ ქალაქებს შორის თანამშრომლობის გაღრმავებას.
„ჩემთვის დიდი პატივია, რომ მომეცა შესაძლებლობა, გიმასპინძლოთ თბილისში. როგორც მოგეხსენებათ, საქართველოსა და აზერბაიჯანს მრავალსაუკუნოვანი კეთილმეზობლური ურთიერთობა აკავშირებთ და ორივე ქვეყნის მთავრობა ყველაფერს აკეთებს, რათა ეს ურთიერთობები კიდევ უფრო გამყარდეს. ჩვენ ასევე გვაკავშირებს ურთიერთობები კულტურული მიმართულებით. ამ კუთხით არაერთი პროექტი ხორციელდება, რაც მისასალმებია. მოხარული ვარ, რომ საქართველოს მთავრობის ხელშეწყობით, თბილისში შენდება ჰეიდარ ალიევის სახელობის დრამის თეატრი. 2023 წელს კი, ქალაქ განჯაში გაიხსნა დიდი ქართველი პოეტის ნიკოლოზ ბარათაშვილის მემორიალური დაფა, რისთვისაც მინდა, მადლობა გადაგიხადოთ“, - განაცხადა კახა კალაძემ.
დედაქალაქის მერმა ბაქოელი და განჯელი კოლეგები მიმდინარე წლის ოქტომბერში დაგეგმილ „თბილისობის“ დღესასწაულზე მოიწვია.
თავის მხრივ, ბაქოს მერმა აღნიშნა, რომ აზერბაიჯანის პრეზიდენტ ილჰამ ალიევისთვის საქართველოსთან ურთიერთობა ძალიან მნიშვნელოვანია.
„თითოეული აზერბაიჯანელისთვის ქართველი ხალხი ძალიან მნიშვნელოვანია. მინდა, მადლობა გადავუხადო საქართველოს მთავრობას თქვენს ქვეყანაში მცხოვრები აზერბაიჯანელების მიმართ დამოკიდებულებისთვის. მსოფლიოში ყველა ქვეყანა გამოწვევების წინაშეა, ეს ეხება ჩვენს ქვეყნებსაც. ამიტომ, ძალიან მნიშვნელოვანია ქვეყნებსა და ქალაქებს შორის ურთიერთობების დამყარება. ნებისმიერ წარმატებას საფუძვლად უდევს ადამიანური ფაქტორი. მე ყოველთვის მახარებს თქვენთან შეხვედრა. მიხარია, რომ აქ ვარ“, - განაცხადა ელდარ აზიზოვმა.
ბაქოსა და განჯის მერები თბილისში ადგილობრივი ეკონომიკური განვითარების მე-14 ფორუმის ფარგლებში იმყოფებიან.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
