დედაქალაქის მერიაში მუნიციპალიტეტის მთავრობის მორიგი სხდომა გაიმართა. დღის წესრიგით გათვალისწინებული საკითხების განხილვამდე, თბილისის მერმა, კახა კალაძემ რამდენიმე განცხადება გააკეთა.

თბილისში 150 მიუსაფარ ძაღლზე გათვლილი ახალი თავშესაფარი აშენდება

„თბილისის მუნიციპალიტეტის მერიის ქონების მართვის სააგენტოსა და შპს „სიბიდი დეველოპმენტს“ შორის ფორმდება ხელშეკრულება, რომლის თანახმად სავაჭრო ცენტრ “ისთ ფოინთის“ მიმდებარე ტერიტორიაზე, მიუსაფარი ძაღლების თავშესაფარი აშენდება. ორხევის დასახლებაში, ახვლედიანის მეორე ჩიხში მდებარე 9231 კვ.მ მიწის ნაკვეთზე აღნიშნული შპს „სიბიდი დეველოპმენტი“, დაახლოებით ორი წლის განმავლობაში 1.5 მლნ ლარის ინვესტიციას განახორციელებს. ხელშეკრულების თანახმად, მიწის ნაკვეთზე ძაღლებისთვის მოეწყობა ვოლიერები, საოპერაციო, საკარანტინე სივრცეები და სხვადასხვა დამხმარე შენობა-ნაგებობები, რაც აუცილებელია აღნიშნული სივრცის სრული ფუნქციონირებისთვის. კომპანია იღებს ვალდებულებას 150 მიუსაფარ ძაღლზე გათვლილი თავშესაფარი მოაწყოს. კომპანიას აღნიშნული მიწის ნაკვეთი, უსასყიდლოდ, 15 წლის ვადით გადაეცემა. პარალელურად, ჩვენ გამოვხატავთ სრულ მზადყოფნას როცა გარკვეული საკანონმდებლო ცვლილებები განხორციელდება, და, ვფიქრობ, გაზაფხულზე დასრულდება ეს ყველაფერი, მუნიციპალიტეტი მზადაა გადადგას ამ მიმართულებით კონკრეტული ნაბიჯები და დავიწყოთ ამ პრობლემის ერთად მოგვარება, იმიტომ, რომ მხოლოდ თბილისი ამ პრობლემას ვერ მოაგვარებს, ეს ყველაფერი მთელი ქვეყნის მასშტაბით უნდა მოხდეს“, - განაცხადა კალაძემ.

ჟვანიას მოედანზე საზოგადოებრივი ტრანსპორტისთვის დამატებით 2 საავტობუსო ზოლი გაკეთდება

„ეს მოედანი დედაქალაქის ერთ-ერთი მნიშვნელოვანი სატრანსპორტო კვანძია. მოედანზე დიზაინის დაგეგმილ ცვლილებებამდე არსებული 2 სამოძრაო ზოლი ემსახურებოდა როგორც საზოგადოებრივ, ასევე კერძო ტრანსპორტს, რაც ხშირად იწვევდა კვანძზე შეფერხებებს და ამცირებდა მის გამტარუნარიანობას.

მიმდინარე სამუშაოების შედეგად, საზოგადოებრივი ტრანსპორტისთვის მოედანზე დამატებით გამოიყოფა 2 განცალკევებული საავტობუსო ზოლი, ხოლო არსებული კუნძულები გამწვანდება და მათი ფართობი შეიცვლება 565-დან 396- კვ. მეტრამდე. გარდა ამისა, კეთილმოეწყობა საზოგადოებრივი ტრანსპორტის გაჩერებები და მოსაცდელები, რომელიც ემსახურება ამ მონაკვეთზე მოძრავ მიკროავტობუსებსა და ავტობუსებს 11 მარშრუტზე 60 000 მდე მგზავრობით“, - განაცხადა მერმა.

მისივე განმარტებით, აღნიშნული კვანძის დიზაინის ცვლილება კიდევ უფრო კომფორტულს, უსაფრთხოსა და მოსახერხებელს გახდის მოქალაქეთათვის გადაადგილებას ჟვანიას მოედანზე.

დიდი დიღმის მესამე მიკრორაიონში პარკი გაშენდება

„ჩვენს ქალაქს ისე არაფერი უხდება, როგორც მწვანე სივრცეები. ამ მიმართულებით არაერთი პროექტი გვაქვს განხორციელებული და ამას მომავალშიც გავაგრძელებთ. დიდი დიღმის მე-3 მიკრორაიონის N30 კორპუსის მიმდებარედ საკმაოდ ვრცელი ტერიტორიაა - დაახლოებით, 8 700 კვადრატული მეტრი ფართობია, რომელიც მიტოვებული და მოუწესრიგებელია. ირგვლივ სულ კორპუსებია და რეკრეაციული სივრცის მოწყობა ადგილობრივი მოსახლეობისთვის მნიშვნელოვანი იქნება“, - აღნიშნა კახა კალაძემ.

თბილისის მერმა მოადგილეს, ანდრია ბასილაიას დაავალა, რომ აღნიშნულ სივრცეში პარკის მოსაწყობად პროექტი შემუშავდეს.

„ამ ადგილიდან, დაახლოებით, 300 მეტრში მდებარეობს N192 საჯარო სკოლა და ორი მუნიციპალური საბავშვო ბაღი. თუ ეს სივრცე მოეწყობა, იგი იქცევა მოსახლეობის თავშეყრის ძირითად ადგილად, რადგან მსგავსი ფართობის პარკი მე-3 მიკრორაიონში არ არსებობს. ვავალებ ჩემს მოადგილეს, ანდრია ბასილაიას, შემუშავდეს პროექტი, ეს სივრცე ყველანაირად მოწესრიგდეს და პარკი გაშენდეს“, - განაცხადა დედაქალაქის მერმა.

ვგეგმავთ ცვლილებები შევიტანოთ გმირთა მოედანზე საგზაო მოძრაობის ორგანიზებაში

„ვგეგმავთ ცვლილებები შევიტანოთ გმირთა მოედანზე საგზაო მოძრაობის ორგანიზებაში. ერთ-ერთ პრობლემური კვანძია, სადაც ძალიან ბევრი ავტომობილი იყრის თავს და უბრალოდ გადაადგილება შეუძლებელია, განსაკუთრებით, პიკის საათებში. დაგეგმილია სატრანსპორტო ნაკადების მოწესრიგება, გამტარუნარიანობა და უსაფრთხოების გაზრდა მინიმალური ინფრასტრუქტურული ჩარევებით. მოგეხსენებათ, გმირთა მოედანი ქალაქის ერთ-ერთი უმთავრესი კვანძია, სადაც საზოგადოებრივი და კერძო ავტოტრანსპორტის დიდი რაოდენობა იყრის თავს. ამ კვანძის ამჟამინდელი გეგმარებით რამდენიმე მიმართულების კვეთა ხდება დარეგულირების გარეშე, რაც გადადგილების თვალსაზრისით ძალიან დიდ შეფერხებებს ქმნის, ჭაბუა ამირეჯიბის გზატკეცილიდან ასევე, კოსტავას ქუჩისა და თამარ მეფის გამზირიდან, რაც ართულებს ნაკადების შეუფერხებელ გადაადგილებას. წრიულზე ნაკადები ერთად იყრის თავს და ე.წ. ძაბრი ჩნდება, რაც გამტარუნარიანობის თვალსაზრისით პრობლემას წარმოადგენს. კვანძზე შუქნიშნის ობიექტის მოწყობით, არსებული ნაკადების დაყოფა მოხდება, რაც გამტარუნარიანობას გააუმჯობესებს. დაგეგმილი ცვლილებები დადებითად აისახება, როგორც კერძო ავტომობილების, ისე საზოგადოებრივი ტრანსპორტის გადაადგილებაზე. დაგეგმილ ცვლილებებზე უკვე მომზადდა სიმულაციური მოდელირება, რაც ნათლად მიუთითებს შერჩეული გადაწყვეტილების ეფექტურობაზე. ამ სამუშაოებს უახლოეს დღეებში დავიწყებთ და ძალიან მალე ვეცდებით, რომ მოხდეს მათი დასრულება,“ -განაცხადა კალაძემ.

აღდგომის ღამეს მეტრო მგზავრებს გახანგრძლივებული დროით, უფასოდ მოემსახურება

აღდგომის ღამეს, მოქალაქეთა შეუფერხებლად გადაადგილების მიზნით, მეტრო 04:00 საათამდე იმუშავებს.

როგორც თბილისის მერმა, კახა კალაძემ დღეს დედაქალაქის მთავრობის სხდომაზე განაცხადა, ამავე ღამეს, 23:00 საათიდან, დამატებითი დროის განმავლობაში, მეტრო მგზავრებს უფასოდ მოემსახურება.

გარდა ამისა, კახა კალაძის განცხადებით, 16 და 17 აპრილს დაწესდება ავტობუსის დროებითი მარშრუტები, რომლებიც 08:00 საათიდან 20:00 საათამდე იმოძრავებენ მუხათგვერდის, ვაშლიჯვრის, კუკიის, ახალი კუკიის, მახათას, საბურთალოს, ღრმაღელის, ველისა და ვარკეთილის სასაფლაოების მიმართულებით.

„აღნიშნულ მარშრუტებზე მოძრავი ავტობუსები მგზავრებს მოემსახურება უფასოდ. ავტობუსები იმოძრავებენ მეტროსადგურებიდან - „მარჯანიშვილი“, „დიდუბე“, „დელისი“, „სარაჯიშვილი“, „ვარკეთილი“, ასევე, სადგურის მოედნიდან, ბესარიონ ჭიჭინაძის ქუჩიდან და ვარკეთილის III მასივიდან, კერძოდ, შუამთისა და აბაშვილის ქუჩების გადაკვეთიდან“, - განაცხადა დედაქალაქის მერმა.