აბაშიძის ქუჩის N21 - ისტორიული სახლია, რომელშიც ლეგენდარული მოცეკვავეები, პროფესორები, აკადემიკოსები, სახელმწიფო და საზოგადო მოღვაწეები ცხოვრობდნენ.
მოგონებების გარდა ამ ღირშესანიშნავი პიროვნებების შესახებ სახლზე დამონტაჟებული მემორიალური დაფებიც გვამცნობს.
ლეგენდები, ქართული ცეკვის რეფორმატორები - ილიკო სუხიშვილი, ნინო რამიშვილი, თენგიზ და ინგა სუხიშვილები.
დღეს კი, ეს სახლი მათი საქმის ღირსეულ გამგრძელებლებს, ქართული ბალეტის ხელმძღვანელებს და ქორეოგრაფებს, ოჯახის მესამე თაობას ნინო და ილიკო სუხიშვილებს ეკუთვნით.
სუხიშვილი-რამიშვილის ოჯახში ბუხრის გარშემო საინტერესო და ცნობილი ადამიანები იკრიბებოდნენ: მხატვრები, მუსიკოსები, მოცეკვავეები, მსახიობები - სოლიკო ვირსალაძე, სოფიკო ჭიაურელი, გურანდა გაბუნია, სესილია თაყაიშვილი. ამ სახლში ყოველთვის მეგობრული ატმოსფერო სუფევდა.
ილიკო სუხიშვილის და ნინო რამიშვილის გარდა, ისტორიულ სახლში ცხოვრობდნენ ცნობილი აკადემიკოსები, პროფესორები და საზოგადო მოღვაწეები:
კარლო გარდაფხაძე - 1961-1977 წლებში საქართველოს სსრ ტელევიზიისა და რადიომაუწყებლობის სახელმწიფო კომიტეტის თავმჯდომარე იყო. მისი ხელმძღვანელობის დროს აიგო მაუწყებლის დღევანდელი შენობა, საქართველოს ტელევიზია რეგიონში ერთ-ერთი პირველი გადავიდა ფერად მაუწყებლობაზე.
ამ სახლში ცხოვრობდნენ ასევე: რაფიელ დვალი - საქართველოს მეცნიერებათა აკადემიის აკადემიკოსი, ქართველი მეცნიერი მანქანათმშენებლობის დარგში.
ვიქტორ კუპრაძე - საქართველოს მეცნიერებათა აკადემიის ვიცე-პრეზიდენტი,ფიზიკა-მათემატიკის მეცნიერებათა დოქტორი, პროფესორი.
თენგიზ ბუაჩიძე - ქართველ ლიტერატურათმცოდნე, მწერალი, ფილოლოგიის მეცნიერებათა დოქტორი, პროფესორი.
დავით თავხელიძე - ინჟინერი, მეცნიერი, პედაგოგი.
ისიდორე დოლიძე - იურისტი, სამართლის ისტორიკოსი, საქართველოს უზენაესი სასამართლოს თავმჯდომარე და პროფესორი.
