,
ეკონომიკისა და მდგრადი განვითარების მინისტრის მოადგილე ირაკლი ნადარეიშვილი გამოეხმაურა ცალკეული ოპოზიციური ძალების მხრიდან გავრცელებულ ინფორმაციას, თითქოს „იგლ ჰილსის“ პროექტებში უძრავ ქონება ძირითადად უცხო ქვეყნების მოქალაქეებისთვისაა განკუთვნილი და მათ ყიდვას საქართველოს მოქალაქეები ვერ შეძლებენ.
„ეს აბსურდია, რადგან წარმოუდგენელია მოცემულობა, როდესაც ქვეყანაში ხდება უძრავი ქონების პროექტის განვითარება და იქ ყიდვის შესაძლებლობა ადგილობრივ მოსახლეობას არ აქვს. რა თქმა უნდა, სამიზნე აუდიტორია ამ პროექტებისა არის და იქნებიან საქართველოს მოქალაქეები,“ - აღნიშნა ირაკლი ნადარეიშვილმა.
მინისტრის მოადგილის ინფორმაციით, „იგლ ჰილსის“ პროექტებში უძრავი ქონების ღირებულება საქართველოში არსებული ვითარების შესაბამისი იქნება. „ეს ასახული იქნება პროექტების საფასო პოლიტიკაში, რადგან უბრალოდ შეუძლებელია, რომ პროექტის ფასები ამოვარდნილი იყოს იმ კომერციული საწყისებიდან, რაც საქართველოში ჯდება მშენებლობა და სხვა. ამავე დროს, ვიცით „იგლ ჰილსის“ ის პროექტები, რომლებიც სხვადასხვა ქვეყანაში განვითარდა. ამდენად, მსგავსი რისკი უბრალოდ წარმოუდგენელია,“ - აღნიშნა ირაკლი ნადარეიშვილმა.
მინისტრის მოადგილის თქმით, კომპანიის გაყიდვების ოფისი თბილისში, რუსთაველის გამზირზე, ყველაზე წარმოსაჩენ ადგილას მდებარეობს, სადაც უძრავი ქონების ყიდვა საქართველოს მოქალაქეებისთვის იქნება ხელმისაწვდომი. მისი ინფორმაციით, გარკვეული პერიოდის განმავლობაში დაიწყება აქტიური კამპანია და წინასწარი გაყიდვებიც.
„ძალიან მალე ჩამოიმსხვრევა ის მითი, რომ აქ არის სპეციალური საფასო პოლიტიკა. იყო საუბრები, რომ თითქოს კონტრაქტში წერია მსგავსი რამ - საერთოდ წარმოუდგენელია, როგორ შეიძლება კონტრაქტში ეწეროს ნაციონალობის მიხედვით რანჟირება და კვოტების გამოყოფა. ეს ღიმილის მომგვრელია,“ - აღნიშნა ირაკლი ნადარეიშვილმა.
პრეზიდენტმა ვლადიმირ პუტინმა განაცხადა, რომ 2025 წელს რუსეთის ეკონომიკური ზრდის ტემპი 1%-მდე შენელდა.
მთავრობის სხდომაზე გამოსვლისას მან აღნიშნა, რომ ეს მაჩვენებელი საგრძნობლად ჩამორჩება წინა წლების დინამიკას. კერძოდ, 2023 წელს 4.1%-იანი და 2024 წელს 4.3%-იანი ზრდა დაფიქსირდა, რაც სამხედრო ხარჯების ზრდის ეფექტით იყო განპირობებული.
პრეზიდენტის თქმით, ეკონომიკური აქტივობის ასეთი შენელება მთავრობისთვის მოსალოდნელი იყო და ის დიდწილად ინფლაციის წინააღმდეგ მიმართულმა ხელოვნურმა ზომებმა განაპირობა. ამ შემთხვევაში, პუტინი ცენტრალური ბანკის მიერ განსაზღვრულ რეფინანსირების განაკვეთზე მიუთითებს, რომელიც 16%-იან ნიშნულზეა.
პუტინმა ხაზი გაუსვა, რომ ცენტრალური ბანკის მიზანმიმართულმა პოლიტიკამ შედეგი გამოიღო და ინფლაცია, რომელიც 2024 წელს 9.5%-ს შეადგენდა, წელს 5.6%-მდე შემცირდა. მისივე პროგნოზით, 2026 წლის ბოლოსთვის ეს მაჩვენებელი 5%-იან ნიშნულამდე დაიწევს.
ეკონომიკური ზრდის შენელების მიუხედავად, კრემლი ამტკიცებს, რომ სახელმწიფო ბიუჯეტი სრულად ფარავს სოციალურ ვალდებულებებსა და სამხედრო საჭიროებებს, მიუხედავად იმისა, რომ რეკორდულად მზარდი ბიუჯეტის დეფიციტი სხვა რეალობაზე მიუთითებს.
ექსპერტთა ნაწილი მიიჩნევს, რომ რუსეთის ეკონომიკურ სტაგნაციას სამუშაო ძალის დეფიციტი, მაღალი საპროცენტო განაკვეთები და დასავლური სანქციების კუმულაციური ეფექტი იწვევს, რომლის სრულ მასშტაბებს უფრო მეტად 2026-27 წლებში ვიხილავთ.
ცნობისთვის, 2026 წლისთვის რუსეთის მთავრობა მშპ-ის 1%-1.3%-იან ზრდას პროგნოზირებს, თუმცა საერთაშორისო სავალუტო ფონდი უფრო პესიმისტურ, 0.8%-იან ზრდის მაჩვენებელს ვარაუდობს.
წყარო: https://bm.ge/
