,
დღეს რომ საუბრობდნენ სამარცხვინოდ, პაოლო იაშვილსა და ტიციან ტაბიძეს იხსენებდნენ და ამ ადამიანებს, ჩვენს საამაყო წინაპრებს, მართლა გმირებს, სამოქალაქო გმირებიც იყვნენ და შემოქმედებაშიც და ყველაფერში გმირები იყვნენ, ამათ უტოლებენ ბაია პატარაიასა და გიგა მაქარაშვილს, ეს ხომ სირცხვილია, ეს ხომ სახეში შეფურთხებაა ქართველი ხალხისთვის და ქართული ისტორიისთვის?! - ამის შესახებ პარტია „ქართული ოცნების“ თავმჯდომარემ, ირაკლი კობახიძემ გადაცემაში „იმედი LIVE” განაცხადა.
როგორც ირაკლი კობახიძემ აღნიშნა, პარლამენტში „ხალხის ძალის“ კანონპროექტების განხილვისას განვითარებული მოვლენებით ნათელი გახდა, რომ დღევანდელი „სამოქალაქო საზოგადოება“ თავს მოხვეული ტერმინია. მისი თქმით, ბუნებრივად ჩამოყალიბებულ სამოქალაქო საზოგადოებებში ჯანსაღი პროცესები მიმდინარეობს.
დღეს რომ უსტვენდნენ, პარლამენტში ვინც იყო შემოსული, მაღალი მატერიებით ხომ ლაპარაკობდნენ, ვითომ სამოქალაქო საზოგადოება? - ესეც თავს მოხვეული ტერმინია, პირდაპირ შემიძლია გითხრათ. სამოქალაქო საზოგადოება, სადაც ბუნებრივად ყალიბდება და არა ასე თავს მოხვეული მახინჯი მეთოდებით, იქ სამოქალაქო საზოგადოება იქმნება აბსოლუტურად ჯანსაღი პროცესის საფუძველზე. მაგალითად, მე-19 საუკუნე და მე-20 საუკუნის დასაწყისი რომ გავიხსენოთ: ილია ჭავჭავაძე, დიმიტრი ყიფიანი, იაკობ გოგებაშვილი, აკაკი წერეთელი - ესენი იყვნენ სამოქალაქო საზოგადოება“, - განაცხადა კობახიძემ.
მან ყურადღება გაამახვილა იმ ფაქტზე, რომ დღევანდელ სამოქალაქო სექტორს აქვს მცდელობა, ერთ სიბრტყეში მოაქციოს მე-20 საუკუნის მოღვაწეები და ამჟამად მოქმედი სამოქალაქო აქტივისტები. ირაკლი კობახიძის თქმით, ეს მიზანმიმართული კამპანიაა და იდენტობის წაშლის მცდელობას ემსახურება.
„სირცხვილი და სულში ჩაფურთხებაა ქართველებისთვის, როცა ერთ დონეზე აყენებ ტიციან ტაბიძეს, მართლა გმირს, თან შემოქმედს, გენიალურ ადამიანს და აქეთ ბაია პატარაიას, ეს არის ქართველი ხალხისთვის სულში ჩაფურთხება და ეს არ უნდა „გავატაროთ“ ჩვენ. ამას როგორც კი „გაატარებ“, შენი იდენტობა, რასაც ებრძვიან, იქ დამთავრდება. როგორც კი ტოლობის ნიშანს დაასმევინებ პაოლო იაშვილსა და გიგა მაქარაშვილს შორის, იქ დამთავრებულია შენი იდენტობა. ეს არის სირცხვილი, ეს უნდათ ზუსტად - შენი იდენტობის წაშლა - ეს არის მიზანმიმართული პროცესი და ამიტომ მიდის მთელი ეს კამპანია“, - განაცხადა ირაკლი კობახიძემ.
ირაკლი კობახიძის თქმით, "დღეს პარლამენტში იყო ეკლესიის მაგინებლების აქცია". როგორც კობახიძემ "იმედის ეთერში" თქვა, როდესაც ერთ დონეზე აყენებ ტიციან ტაბიძესა და ბაია პატარაიას, ეს ქართველი ხალხისთვის სულში ჩაფურთხებაა.
"მაგალითებზე როდესაც ვსაუბრობთ, მინდა რამდენიმე ციტატა წავიკითხო, კონკრეტული სახელებითა და გვარებით.
თამთა მიქელაძე: „ეკლესია საკუთარ გამდიდრებაზე ორიენტირებული ინსტიტუციაა“.
ნინია კაკაბაძე: „რა სინქრონულად სამარცხვინოები არიან ეს ჩვენი ხელისუფლება და ეკლესია“.
ბაია პატარაია: „ეკლესია და ილია მეორე მკვლელია“.
ლიკა ბასილაია-შავგულიძე: „ძალიან მიხარია, რომ ეს ბოროტების იმპერია ემხობა, წესიერი ხალხი, თუ ვინმე შემორჩა ეკლესიაში, უნდა წამოვიდეს წინ და ბნელები უნდა ჩაქვესკნელდენენ“.
გიორგი ბურჯანაძე: „კანონიერ ქურდებს რომ ჰქონდათ გავლენა ხელისუფლებაზე, პოლიციელებზე, ხომ გახსოვთ? იგივეა, როდესაც რელიგიური კონფესია ახდენს ხელისუფლებაზე ასე გავლენას და თავის ჭკუაზე ათამაშებს - სირცხვილია“.
