შეხვედრა იმ კომპანიებთან გაიმართა, რომლებთანაც საავტომობილო გზების დეპარტამენტს ამ ეტაპზე გაფორმებული აქვს ხელშეკრულებები გზების მშენებლობის, რეაბილიტაციისა და მოვლა-შენახვის მიმართულებით.
შეხვედრაში მონაწილეობდნენ მინისტრის მოადგილეები - ვახუშტი ბაგრატიონი, გიორგი კობერიძე, ილია ბეგიაშვილი და მზია გიორგობიანი; ასევე, საავტომობილო გზების დეპარტამენტის თავმჯდომარე ლევან დარახველიძე და მისი მოადგილეები.
მინისტრმა მონაწილეებს გააცნო სამინისტროს სტრატეგიული ხედვა, რომელიც მიზნად ისახავს სამშენებლო პროცესების ხარისხის გაუმჯობესებას, კონტრაქტების მართვის მოქნილობის ზრდას და შესრულების ვადების ეფექტიან კონტროლს.
კომპანიების წარმომადგენლებმა, შეხვედრაზე გააჟღერეს სექტორში არსებული ძირითადი გამოწვევები, ურთიერთთანამშრომლობისთვის აუცილებელი ის საკითხები, რაც კრიტიკულია ქართული სამშენებლო სექტორის განვითარებისთვის
მინისტრმა აღნიშნა, რომ სამინისტრო დაინტერესებულია ძლიერი ადგილობრივი სამშენებლო სექტორის ჩამოყალიბებით და მზად არის მაქსიმალური კომუნიკაციისთვის, რათა არსებული პრობლემები ერთობლივად გადაწყდეს.
