USD 2.7067
EUR 3.1230
RUB 3.3103
Тбилиси
ილია წულაია არ გამორიცხავს, რომ მუშახელის საზღვარგარეთიდან შემოყვანა გახდეს საჭირო
дата:  787

წყარო:https://bm.ge/

კომპანია „არქის“ დამფუძნებელი ილია წულაია, სხვა ბიზნესმენების მსგავსად, ქვეყანაში სამუშაო ძალის დეფიციტზე საუბრობს. ბიზნესმენი არ გამორიცხავს, რომ მაღალი ეკონომიკური ზრდის შენარჩუნების შემთხვევაში, შესაძლოა, მუშახელის საზღვარგარეთიდან შემოყვანის საჭიროება გაჩნდეს. ამის შესახებ მან BMGTV-ის გადაცემა „წერტილში“ ისაუბრა.

ილია წულაია იმ ბიზნესმენების კატეგორიაში არაა, ვინც სამუშაო ძალის დეფიციტს, ძირითადად, საქართველოდან გაზრდილ ემიგრაციას უკავშირებს. „არქის“ დამფუძნებლის აზრით, მუშახელის ნაკლებობა, როგორც გამოწვევა, მაღალი ეკონომიკური ზრდით აიხსნება.

„როგორც დამსაქმებელმა, შემიძლია გითხრათ, რომ კადრების ძალიან დიდი დეფიციტია; ხელფასები მომატებულია, მაგრამ ნებისმიერ სფეროში დიდი ნაკლებობაა. მუშახელზე მოთხოვნა ძალიან გაზრდილია. პირობითად, თუ ადრე 1 მლნ კვადრატული მეტრი შენდებოდა, ახლა 2 მლნ კვ/მ შენდება, ამიტომ გაჩნდა დეფიციტი. მე ვერ ვიტყვი, რომ ქვეყნიდან ხალხი გარბის... „არქი“ დეველოპერული კომპანიაა, მაგრამ პარტნიორი სამშენებლო კომპანიებისგან მსმენია, რომ წლების წინ, აღმოსავლეთ ევროპაში, მაგალითად, პოლონეთში სამუშაოდ წასული სპეციალისტები უკან დაბრუნდნენ; შეიძლება, მათ აქ იგივე დონის ან ოდნავ ნაკლები ხელფასი აქვთ, მაგრამ სამაგიეროდ, საკუთარ ქვეყანაში არიან და ნაკლები ხარჯი აქვთ. ბევრი ადამიანი უკან დაბრუნდა, მაგრამ ეს არ არის საკმარისი...

მოგეხსენებათ, სამი წლის წინ ერთ სულ მოსახლეზე მთლიანი შიდა პროდუქტი 4000 დოლარი იყო, ახლა თითქმის 8000 დოლარია. ეს სასიხარულო ფაქტია; როდესაც ასეთი მაღალი ეკონომიკური ზრდის ტემპია, ბუნებრივია, ყველა ქვეყანაში წარმოიქმნება კადრების დეფიციტი. ამას საბოლოო ჯამში, ბუნებრივი გაგრძელება უკვე მოჰყვეს და ალბათ მოჰყვება კიდეც.

ჩემი ვარაუდით, შედარებით ნაკლებადგანვითარებული ქვეყნებიდან, სადაც საქართველოსთან შედარებით დაბალია ხელფასები, ერთ სულ მოსახლეზე მშპ ნაკლებია, მაგრამ ჰყავთ სამუშაო ძალა, მთავრობა მუშახელის შემოყვანაზე გარკვეულ კვოტებს დაუშვებს ის სფეროებისთვის, სადაც კადრების დეფიციტია, რათა ეკონომიკური ზრდა არ შეფერხდეს“, - განაცხადა ილია წულაიამ და იქვე დასძინა, რომ „ბევრი ბიზნესი ამას ითხოვს“.

თემაზე საუბრისას „არქის“ დამფუძნებელმა ახლო აღმოსავლეთის ქვეყნების მაგალითი მოიყვანა, სადაც მაღალი ეკონომიკური ზრდის პერიოდში მუშახელის მიგრაცია მაღალი იყო.

ილია წულაიას მოლოდინი აქვს, რომ ეკონომიკურ ზრდის მაღალი ტემპი შენარჩუნდება, რაც სამუშაო ძალაზე მოთხოვნას კიდევ უფრო გაზრდის.

„კადრების შემოყვანა საზღვარგარეთიდან ნებისმიერი ქვეყნისთვის პოზიტიურია. ეს ნიშნავს იმას, რომ ადგილობრივი მუშახელი ვერ აკმაყოფილებს მოთხოვნას და დამატება სჭირდება. არ ვიცი, რეგიონებში რა ხდება, მაგრამ თბილისში, ის, რომ ხალხს დასაქმება უნდა და ვერ შოულობს სამსახურს, ცოტა რთული წარმოსადგენია“, - აღნიშნა ილია წულაიამ.

аналитика
კრემლს ომის შეწყვეტის მზაობა ჯერ კიდევ არ აქვს და რუსეთის ეკონომიკის შეწირვასაც არ ერიდება - გიორგი კობერიძე
დღევანდელი რუსული ბეჭდური პრესა ივლისის თვეში ეკონომიკური ვითარების დამძიმებაზე საუბრობს - რაც რუსეთის დახურული სისტემის პირობებში საკმაოდ იშვიათი მოვლენაა. გაზეთები აღნიშნავენ, რომ: საშუალოდ 12%-ით მოხდა რუსეთში კომუნალურები გადასახადების ზრდა. გაძვირდა პურის ფასიც, არადა ხორბლის ფასი გაიაფდა. მშენებლობის ბიზნესი დაეცა და ქარხნები იხურება.
 
მიზეზი? მუშახელის კატასტროფული დეფიციტი ბაზარზე, რასაც ადამიანური რესურსების კლების ხარჯზე ემატება მოთხოვნის ბუნებრივი შემცირება - რუსების ნაწილი ფრონტზე კვდება, ნაწილი კი ქვეყნიდან გარბის. დარჩენილი კვალიფიციური მუშახელი კი სამხედრო ინდუსტრიაშია მობილიზებული. იაფ ხორბალს რუსეთი თავის მოკავშირეებს საბითუმო ფასებში ყიდის, ხოლო ბაზარზე შემოსავლის შესანარჩუნებლად კრემლთან დაახლოებული პურის მსხვილი მეწარმეები მის ფასს ზრდიან.
 
ამას კი ემატება სანქციები. დღეს ევროპის მხრიდან სანქციების მე-18 პაკეტი დამტკიცდა, რომელიც რუსეთის ნავთობისა და გაზის ინდუსტრიას ურტყამს. 47.6 დოლარი - ესაა ის თანხა, რომელზე ძვირადაც ნავთობს არ შეიძენს ევროკავშირი და ბრიტანეთი რუსეთისაგან, რომელსაც გათვლა 60 დოლარზე ჰქონდა. კრემლს რომ მყარი მოგება ჰქონდეს 70 დოლარად უნდა ჰყიდდეს ბარელს. სანქციების მიხედვით ნორდ სტრიმების გაზსადენები აღარ ამუშავდება. ამას ემატება რუსულ ჩრდილოვან ფლოტზე დევნაც, რომელიც სხვა ქვეყნების დროშის ქვეშ მცურავი ხომალდების დახმარებით ცდილობდა რუსული ნავთობის ევროპაში გაყიდვას და სანქციების გვერდის ავლას.
 
ამ ფონზე მნიშვნელოვანია ისიც, რომ რუსეთში ტოტალიტარული მმართველობა კიდევ უფრო უჭერს მოსახლეობას: ქვეყანაში 5500 აკრძალული საიტი, მუსიკა, საინფორმაციო საშუალება, კოდური სიტყვა, ფილმი და გამოთქმაა, რისი მოძიებაცა და ნახვაც არ შეიძლება, მათ შორის არც VPN-ის გამოყენებით. თუ ნახავ ჯერ დაგაჯარიმებენ, შემდეგ ჯერზე კი პასუხისგებაში მისცემენ შენს თავს.
 
მზარდი ინფლაციისა და ძირითადი რესურსების სამხედრო წარმოებასა თუ ფრონტზე მობილიზების ფონზე ეკონომიკური პერსპექტივა კარგად არ გამოიყურება. არსებობს ვარაუდი, რომ გვიანი შემოდგომიდან რუსეთი კიდევ უფრო მეტი ბანკნოტების დაბეჭდვას აპირებს.
 
მუშახელის დეფიციტის ფონზე ინდური პრესა საუბრობდა პოტენციურ გეგმაზე, რომლის მიხედვითაც რუსეთი წლის ბოლომდე მილიონი ინდოელი მუშახელის რეკრუტირებას აპირებს, თუმცა ამ ამბავმა რუსეთში დადებითი რეაქცია არ გამოიწვია, რის გამოც რუსეთის შრომის მინისტრმა აღნიშნული ინფორმაცია უარყო. მიუხედავად ამისა, მარტო წელს რუსეთში 71,817 ინდოეთის მოქალაქეზე გაიცა ოფიციალური სამუშაო ნებართვა. ეს რაც ლეგალურად ჩანს, და რაც არა ის კიდევ სხვაა. ინდოელების გარდა რუსეთში დიდი რაოდენობით არიან შუა აზიელები და ჩინელები.
 
ამ ვითარებაში ფრონტზე რუსეთის ვითარება არასახარბიელოა. დონეცკის მონაკვეთზე მომარაგების გზას უკვე ეწოდა "სიკვდილის ხაზი", სადაც უკრაინული დრონები ყველაფერს ბომბავენ რაც კი გადაადგილდება. მიუხედავად ამისა, რუსეთი არ წყვეტს ცოცხალი ძალის მობილიზებას და დონეცკის ოლქის დასავლეთ ნაწილში, პოკროვსკის სექტორზე დაწოლას. რუსეთის მხრიდან ყველა გათვლა ისეთი იყო, რომ პოკროვკი ჯერ 2024 წლის ბოლომდე უნდა აეღოთ, შემდეგ 2025 წლის მარტამდე, ახალი თარიღი 2025 წლის 9 მაისი იყო, შემდეგ კი ამ სექტორზე დაწყებული შეტევის ერთი წლის თავი, ანუ ივლისი. მაგრამ ერთი წლის თავზე რუსები ჯერ კიდევ არ არიან ქალაქის ფარგლებში შესულები. ზოგადად პოკროვკისაკენ გაჭრას რუსები 2024 წლის თებერვლიდან ცდილობენ, ავდიივკას დაცემის შემდეგ.
 
დასავლური მედია ამბობს, რომ რუსული ზაფხულის შეტევის მხოლოდ პირველი ფაზა ვიხილეთ ჯერ და რომ მეორე ფაზა ჯერ კიდევ წინააო. ისინი 150 ათას დამატებით რუს, კორეელ და სხვა ქვეყნებიდან დაქირავებულ სამხედროებზე საუბრობენ და ახალი მიმართულებით გაჭრას არ გამორიცხავენ, ან ძველ სექტორებზე მათ გადანაწილებასა და უკრაინულ პოზიციებზე დაწოლის გაძლიერებას.
 
კრემლი ტრამპის მიერ მიცემულ 50 დღიან ვადას მაქსიმალური შეტევისათვის გამოიყენებს და ამაში უცნაური არაფერია. მთავარია რამხელა იქნება მსხვერპლი და გამოფიტვა. როგორც ამერიკის სახელმწიფო მდივანმა აღნიშნა, მხოლოდ წელს რუსეთს 100 ათასი მოკლული ჰყავს. მან ხაზი გაუსვა ფაქტს, რომ საუბარია მოკლულ სამხედროებზე და არა დაჭრილებზე, დაშავებულებზე ან ტყვეებზე. რუსეთი წლებია იმით პოზიციონირებს, რომ თითქოს ბოლო სამხედრომდე და ბოლო საკვებამდე შეუძლია იომოს. ასეთი რამ არცერთ სახელმწიფოს არ შეუძლია, მაგრამ კრემლს რომ ომის შეწყვეტის მზაობა ჯერ კიდევ არ აქვს და რუსეთის ეკონომიკის შეწირვასაც არ ერიდება - ეს უკვე ვნახეთ. და ისიც ნათელია, რომ ახლა ომს სერიოზული გამოფიტვის სახე აქვს მიღებული, რის გამოც დამატებითი მოთამაშეებისა და სახელმწიფოების ირიბი ჩართვა კიდევ უფრო მზარდია.
 
პუტინმა ისიც კარგად იცის, რომ ომის შეწყვეტა სხვა მიზეზითაცაა საშიში - ამდენი სამხედროსა და ციხეებიდან გამოსული, თუ მობილიზებული კრიმინალის რესოციალიზაცია ძალიან რთული იქნება, მით უფრო გართულებული ეკონომიკური ვითარებიდან გამომდინარე. თუმცა ყველაფერს აქვს თავისი ზედა ზღვარი - ეკონომიკის გამძლეობასაც, მსხვერპლის რაოდენობასაც და გამარჯვების რწმენასაც.
 
более
голосование
ვინ გაიმარჯვებს რუსეთ - უკრაინის ომში?
голосование
Кстати