USD 2.7050
EUR 3.0872
RUB 3.3681
Tbilisi
«The New York Times» (აშშ): „ბაიდენმა უფლება მისცა უკრაინის არმიას რუსეთს ამერიკული შორი მოქმედების რაკეტებით დაარტყას: რა მოჰყვება აშშ-ის პრეზიდენტის გადაწყვეტილებას?“
Date:  377

აშშ-ის ჯერ კიდევ მოქმედმა პრეზიდენტმა („კოჭლმა იხვმა“) ჯო ბაიდენმა, თავისი უფლებამოსილების ამოწურვამდე ორი თვით ადრე, ნება დართო უკრაინის არმიას გამოიყენოს ამერიკული შორი რადიუსის მქონე რაკეტები რუსეთის ზურგში მდებარე სამხედრო-სამრეწველო ობიექტების დასაბომბად, - ნათქვამია გაზეთ „ნიუ-იორკ თაიმსის“ (The New York Times) 17 ნოემბრის ნომერში გამოქვეყნებულ სტატიაში სათაურით „ბაიდენმა უფლება მისცა უკრაინის არმიას, რომ რუსეთს ამერიკული შორი მოქმედების რაკეტებით დაარტყას“ (ავტორები - ადამ ენთუსი, ერიკ შმიტი და ჯულიან ბარნსი).

„რაკეტები, როგორც ჩანს, თავდაპირველად გამოყენებული იქნება რუსეთის კურსკის ოლქში თავმოყრილი რუსული და ჩრდილოკორეული სამხედრო ქვედანაყოფების წინააღმდეგ, რათა დაცული იყოს იქ მყოფი უკრაინის არმიის სამხედრო-საოკუპაციო ნაწილები რუსულ-კორეული ერთობლივი შეტევისაგან“, - აღნიშნულია პუბლიკაციაში.

ჯო ბაიდენის მიერ მიღებული გადაწყვეტილება აშშ-ის პოლიტიკაში განხორციელებულ სერიოზულ ცვლილებად შეიძლება შეფასდეს. პრეზიდენტის ამ ნაბიჯმა მისი მრჩევლების ორად გაყოფა გამოიწვია - მომხრეებად და მოწინააღმდეგებად და ეს ხდება იმ დროს, როცა „კოჭლ იხვს“ მხოლოდ ორიოდე თვის პოლიტიკური ნებაღა აქვს შერჩენილი ახალი პრეზიდენტის დონალდ ტრამპის უფლებამოსილების ძალაში შესვლამდე. დემოკრატი პრეზიდენტის მოქმედება ხელს უწყობს ომის ესკალაციას, რესპუბლიკელ ლიდერს კი, როგორც ცნობილია, ომის დეესკალაცია აქვს გადაწყვეტილი: სამხედრო მოქმედების შეწყვეტა და დახმარების შემცირება.

თეთრი სახლის ჩინოვნიკების ერთი ნაწილის თქმით, ATACMS-ების (შორი მოქმედების საარმიო ტაქტიკური სარაკეტო კომპლექსის) გამოყენებაზე ნებართვა უკრაინელებს მიეცა რუსეთის მოულოდნელი გადაწყვეტილების პასუხად - ისარგებლოს ჩრდილოეთკორეელი სამხედრო ქვედანაყოფებით კურსკის ოლქში შეტევისათვის.

საერთოდ, ჯო ბაიდენმა ამერიკული იარაღის რუსეთის ტერიტორიაზე განლაგებული ობიექტების მიმართ გამოყენების საკითხში შეზღუდვების შესუსტება ჯერ კიდევ მაისიდან დაიწყო, რუსეთის არმიის ხარკოვზე შეტევის დროს, როცა მან მაღალმობილური საარტილერიო-სარაკეტო სისტემის HIMARS-ების გამოყენების ნება მისცა..

როგორც პრეზიდენტის გადაწყვეტილების მომხრე ჩინოვნიკები თვლიან, რა თქმა უნდა, ეს ნაბიჯი კარდინალურად ვერ შეცვლის საომარ მოქმედებათა აქტიურობას, თუმცა, მათი თქმით, კურსის შეცვლის ერთ-ერთი მიზანია გაეგზავნოთ ჩრდილოეთ კორეელებს სიგნალი, რომ პირველ რიგში სწორედ მათი ქვედანაყოფები განადგურდება სარაკეტო დარტყმებით. შესაბამისად, მათ თავი უნდა შეიკავონ რუსეთში დამატებითი ძალების გაგზავნაზე.

ამერიკელ ჩინოვნიკთა მეორე ნაწილი შიშობს, რომ რუსეთის ტერიტორიის ღრმა ზურგში (330 კილომეტრამდე) მდებარე სამხედრო ობიექტების მიმართ განხორციელებული დარტყმა პრეზიდენტ ვლადიმერ პუტინს ბიძგს მისცემს საპასუხოდ უფრო დამაგრეველი იარაღი გამოიყენოს კიევის წინააღმდეგ, აგრეთვე შესაბამისი პასუხი გასცეს აშშ-ს (და მის მოკავშირეებს) ასეთი გადაწყვეტილების მიღების გამო.

პრეზიდენტის მომხრე ჩინოვნიკები თვლიან, რომ მოწინააღმდეგე ჩინოვნიკთა შიშები ზედმეტად გაბერილი და გადაჭარბებულია.

კიევში იმედი აქვთ, რომ რაკეტების გამოყენება მათ ტერიტორიის გაცვლაში დაეხმარება: თუ სამომავლოდ სამშვიდობო მოლაპარაკება დაიწყება, მაშინ კურსკის ოლქიდან გამოსვლის საფასურად უკრაინამ შეიძლება დონბასიდან და საერთოდ, უკრაინის მიწებიდან რუსეთის ჯარების გასვლა მოითხოვოს.

თუ რუსული და ჩრდილოკორეული ნაწილების გაერთიანებული შეტევა კურსკის ოლქში უკრაინის ჯარების წინააღმდეგ წარმატებული იქნება, მაშინ კიევს არაფერი არ რჩება ხელში ტერიტორიული კოზირის სახით, მიწების გაცვლის მიზნით. შესაბამისად, უკრაინის სარდლობა ყველანაირად ცდილობს კურსკის ოლქის ოკუპაციის შენარჩუნებას.

ჯო ბაიდენის წინაშე ასეთივე დილემა იდგა ერთი წლის წინ, როცა დაზვერვამ მას შეატყობინა - ჩრდილოეთ კორეა რუსეთს შორის რადიუსის მქონე ბალისტიკურ რაკეტებს აწვდიდო. იმ ხანებში ჯო ბაიდენი დათანხმდა უკრაინისათვის მიეწოდებინა რამდენიმე ასეული ერთეული შორსმოქმედი რაკეტა ATACMS, მაგრამ რუსების მიერ ოკუპირებულ (ანუ საკუთარ) ტერიტორიაზე გამოსაყენებლად, ვთქვათ, ყირიმში და დონბასში. თავის მხრივ, უკრაინას თავისი რაკეტები Storm Shadow-ის ტიპის რაკეტები დიდმა ბრიტანეთმაც მიაწოდა, ხოლო საფრანგეთმა - SCALP-ები.

რასაკვირველია, უკრაინამ მიწოდებული იარაღი ბევრჯერ გამოიყენა მტრის წინააღმდეგ და რუსეთს დარტყმა მიაყენა როგორც ყირიმის ნახევარკუნძულზე, ასევე შავი ზღვის ფლოტის გემების განადგურების სახით. საბოლოო ჯამში ამჟამად ცნობილი არ არის, თუ რამდენი რაკეტა დარჩა უკრაინის არმიის არსენალებში კურსკის ოლქის სამხრეთ ნაწილში დისლოცირებული რუსული და ჩრდილოკორეული ქვედანაყოფებისათვის დარტყმების მისაყენებლად.

წყარო: https://www.nytimes.com/

 

analytics
The Daily Telegraph - ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს

ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.

გთავაზობთ სტატიას შემოკლებით:

დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.

დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.

აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.

კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.

უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?

როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.

რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.

ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან)  ამასწინანდელი საჰაერო შეტაკების გამო.

არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.

იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.

ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.

თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.

See all
Survey
ვინ გაიმარჯვებს რუსეთ - უკრაინის ომში?
Vote
By the way