,
„ჩრდილოეთ კორეის სახალხო არმიის ქვედანაყოფების რუსეთის კურსკის ოლქში გამოჩენის ფონზე, უკრაინელ ჯარისკაცებს შორის სხვადასხვა ხმები ვრცელდება, რაც მათ ფსიქიკაზე ზეწოლას ახდენს. როდის მოხდება პირველი მსხვილმასშტაბიანი შეტაკება, ჯერ არავინ იცის“, - ნათქვამია აშშ-ის გაზეთ „ვაშინგტონ პოსტში“ (The Washington Post) გამოქვეყნებულ სტატიაში სათაურით „უკრაინელი ჯარისკაცები ჩრდილოკორეელებთან შეტაკებას ელოდებიან“ (ავტორი - სიბონ ო’გრეიდი და სერგეი კოროლჩუკი).
გთავაზობთ პუბლიკაციას შემოკლებით:
უკრაინის არმიის ქვედანაყოფები, რომლებსაც რუსეთის კურსკის ოლქის სამხრეთი ნაწილი აქვთ ოკუპირებული, ჩრდილოეთ კორეის არმიის ნაწილებთან საომრად ემზადებიან. უკვე გაჟონა ცნობებმა, რომ მათ შორის პირველი საბრძოლო შეტაკებები უკვე მოხდა, რაც ომის ახალ, სახიფათო ფაზის დაწყებას მოასწავებს. მით უმეტეს, რომ სავარაუდოდ, აშშ-ის ახლადარჩეული პრეზიდენტი ჯერ (ალბათ, ინაუგურაციამდე - 20 იანვრამდე) რაიმე ქმედით ნაბიჯს არ გადადგამს უკრაინის მომავალთან მიმართებით.
ჩრდილოკორეელები კურსკში: დასავლეთის გამოწვევა
ბევრმა შეიძლება არ იცის, რომ უკრაინელებმა უკვე დაკარგეს კურსკის ოლქის იმ ტერიტორიის თითქმის ნახევარი, რომლის ოკუპირება მათ აგვისტოში განახორციელეს. ახლა როცა [აშშ-ის დაზვერვის მონაცემებით], კურსკის ოლქში უკვე სულ ცოტა 10 ათასი კორეელი ჯარისკაცი იმყოფება, სავარაუდოდ, უკრაინელთა მდგომარეობა კიდევ უფრო დამძიმდება. ვლადიმერ პუტინი თითქოსდა გულგრილად უყურებდა კურსკის ოლქის ოკუპაციას, მაგრამ სინამდვილეში, რასაკვირველია, ეს იყო მოჩვენებითი გულგრილობა და მისთვის უკრაინელთა იქ ყოფნა გამაღიზიანებელი იყო.
იური ფედორენკო, უკრაინის არმიის 92-ე ბრიგადის ბატალიონ „აქილევსის“ მეთაური, რომელიც ხარკოვის ოლქის ჩრდილო-აღმოსავლეთ სექტორშია დისლოცირებული, ამბობს, რომ ჩრდილოკორეელი სამხედრო ნაწილები არა მხოლოდ კურსკის, არამედ მეზობელ ბელგოროდის ოლქის ტერიტორიაზეც არიან თავმოყრილნი.
რუსეთი თითქმის სამი წლის განმავლობაში ახდენდა უკრაინის ტერიტორიაზე თავდასხმებს და დაბომბვებს ბელგოროდის ოლქიდან, განსაკუთრებით გაზაფხულზე მომხდარი უეცარი შეტევის სახით, რომელსაც ხარკოვის ალყაში მოქცევის მიზანი ჰქონდა. აგვისტოში უკრაინის ქვედანაყოფები ასევე შეეცადნენ კურსკის ოლქიდან ბელგოროდის ოლქში შეჭრას, მაგრამ ოპერაცია წარუმატებლად დასრულდა.
იური ფედორენკოს თქმით, ბელგოროდის ოლქში მყოფი ჩრდილოკორეელები, ალბათ, გამოყენებულები იქნებიან თავდაცვის მეორე ხაზის გაძლიერებისათვის, რაც შესაძლებლობას მისცემს რუსებს შეტევისათვის კარგად მოემზადნონ - „ეს ჩვენთვის მასირებულ საფრთხეს წარმოადგენს“.
„ჩრდილოკორეელი ჯარისკაცების ფროტზე ყოფნა დანარჩენი მსოფლიოსთვის აშკარა პოლიტიკური გამოწვევაა. და თუ მსოფლიო ამას შეეგუება, მაშინ ჩვენ ბერკეტი აღარ გვექნება იმისთვის, რომ ომი უკრაინის პირობებით დასრულდეს... ანუ ისეთ სიტუაციაში შეიძლება ჩავვარდეთ, რომ ომი შეიძლება კრემლის სასარგებლოდ დამთავრდეს, რაც უკრაინის სახელმწიფოს დაშლას მოასწავებს“, - ასკვნის უკრაინელი ოფიცერი.
„კორეული საფრთხე“ იმ ფონზეა წარმოქმნილი, როცა პრეზიდენტად დონალდ ტრამპის არჩევის შემდეგ, აშშ-ის დახმარება სათუო ხდება. ახალ „ძველ“ პრეზიდენტს კრიტიკული დამოკიდებულება აქვს უკრაინისათვის მილიარდობით დოლარის გამოყოფის მიმართ („ფული ამერიკას თვითონაც ძალიან ჭირდება“) და შეიძლება მისი მცდელობით ცეცხლი კრემლის პირობების გათვალისწინებით შეწყდეს.
ვოლოდიმირ ზელენსკიმ ბუდაპეშტში ოთხშაბათს გამართულ ევროკავშირის ლიდერთა სამიტზე ჩრდილოკორეული სამხედრო ქვედანაყოფების დისლოცირების ფაქტს „ევროპელთა გამოცდა“ უწოდა, დასავლეთის რეაქციის დასანახავად. „არ ვიცი, ჩვენს მეზობლად კიდევ რამდენი ჩრდილოკორეელი თუ ირანელი ჯარისკაცი დაბანაკდება... თუ კორეელთა რაოდენობა 100 ათასს მიაღწევს, რას გააკეთებენ ისინი ჩვენს ტერიტორიაზე შემოჭრის შემდეგ? რას იზამს ევროპა? რას იზამს აშშ? ბევრი რიტორიკაა, მაგრამ რეალურ ზომებს არავინ იღებს“.
კორეული გავლენა უკრაინელი მეომრის ფსიქიკაზე
დასამალი არაა, რომ კურსკის ოლქში კორეელი ჯარისკაცების ყოფნის ფაქტი უკრაინის არმიის სამხედრო მოსამსახურეებზე ფსიქიკურ გავლენას ახდენს, რაც მოსკოვ-ფხენიანის ახლებური პარტნიორობის ერთ-ერთი მიზანია. უკრაინელ ჯარისკაცებთან საუბრის დროს ირკვევა, რომ ისინი კურსკის ოლქში შექმნილი მდგომარეობით საკმაოდ არასახარბიელო განწყობაზე იმყოფებიან. რამდენიმე ჯარისკაცის თქმით, მათ დრონით ახლო მანძილიდან პირადად დაინახეს ჩრდილოკორეელები, მაგრამ სხვებმა აღნიშნეს, რომ რადგანაც კორეელები გარეგნულად ძალიან ჰგავნან ციმბირის ეთნიკურ მოსახლეობას, მაგალითად, ბურიატებს, შესაძლოა მნახველთა აღქმაში შეცდომა იქნა დაშვებული.
სხვათა შორის, როგორც ირკვევა, რუსები ჩრდილოკორეელთა ქვედანაყოფების რუსეთის ტერიტორიაზე, კერძოდ, კურსკის ოლქში გამოყენებას თავდაპირველად მართლაც ბურიატების ნიღბის ქვეშ გეგმავდნენ, მაგრამ შემდეგ უარი თქვეს. რუსების რადიოსაუბრების თანახმად, რომელთა გაშიფვრა უკრაინელებმა მოახერხეს, რუსები კორეელებს „ყვითლებს“ და „ჩვენს მოკავშირეებს“ უწოდებენ.
იური ფედორენკოს თქმით, ნებისმიერი ახალი მოტივირებული სამხედრო ძალა, მათი ეროვნულობის მიუხედავად, უკრაინის სახელმწიფოსათვის საფრთხეს წარმოადგენს. „თუ ჩვენ ვხედავთ ჯარისკაცს, რომელიც კარგად გამოიყურება, რომელსაც ხელში ავტომატი ან შასხანა უჭირავს უკრაინელი ჯარისკაცების მოსაკლავად, ჩვენ ამ დროს, რა თქმა უნდა, ყურადღებას არ მივაქცევთ მისი კანის ფერს და არ ეროვნულ კუთვნილებას. ჩვენთვის არ აქვს მნიშვნელობა, რუსია, კორეელი თუ ირანელი. ისინი ჩვენ გვებრძვიან და საკადრისს მიიღებენ“.
უკრაინის არმიის პერსპექტივა კურსკის ოლქში
გასულ თვეში უკრაინის ქვედანაყოფებმა კურსკის ოლქში დაკავებული ტერიტორიის თითქმის ნახევარი დაკარგეს. 36 წლის ვალენტინ ლევადა და 41 წლის ანდრეი ვავილოვი, რომლებიც უკრაინის არმიის 82-ე ბრიგადის უპილოტო საფრენი აპარატების (დრონების) ქვედანაყოფში ოპერატორებად მუშაობენ, კურსკის ოლქში, რომლის საზღვარი პრაქტიკულად გაუმაგრებელი იყო, აგვისტოში შევიდნენ და მათ მოულოდნელი ოპერაციის შედეგად ბევრი რუსი ახალბედა ჯარისკაცი ტყვეებად აიყვანეს. მაგრამ როცა ისინი როტაციის შედეგად უკრაინის ტერიტორიაზე დაბრუნდნენ, სინანულით ადევნებდნენ თვალს, თუ როგორ მცირდებოდა სეტემბერში იმ ტერიტორიის ფართობი, რომელიც მათ აგვისტოში დაიკავეს.
ვალენტინ ლევადასა და ანდრეი ვავილოვის თქმით, უკრაინისათვის ყველაზე ცუდი ისაა, რომ ჩრდილოკორეელები კურსკის ფრონტზე რუს ჯარისკაცებს გამოათავისუფლებენ დონბასის ფრონტზე გასაგზავნად. „ვფიქრობ, რომ კორეელების ტყვედ ან მძევლებად აყვანა რთული იქნება“.
ამასთან, როგოც კიდევ ერთი უკრაინელი ჯარისკაცი ალექსანდრე ამბობს, რუსული სამხედრო ნაწილების მდგომარეობა კურსკის ფრონტზე არასახარბიელოა. ისინი თავიანთ მიწაზე სურსათისა და სამხედრო აღჭურვილობის დეფიციტს განიცდიან. მაგალითად, ლიუბიმოვკასთან უკრაინულმა დრონებმა ათობით რუსული სატვირთო ავტომანქანა გაანადგურეს, რომლებიც ცდილობდნენ იარაღი და საკვები მიეტანათ. „მათთვის ლიუბიმოვკის გზა სიკვდილის გზად იქცა“, - ამბობს ალექსანდრე.
რასაკვირველია, უკრაინელი სამხედროები კურსკის ოლქში რუსებს ზიანს აყენებენ, მაგრამ დასამალი არაა, რომ თვით უკრაინელებიც ზარალდებიან, მაღალია დანაკარგების რაოდენობა. უკრაინის ქალაქ სუმის საავადმყოფო სავსეა ბოლო დღეებში ევაკუირებული დაჭრილ-დასახიჩრებული ჯარისკაცებით, რომლებსაც კიდურები შეხვეული აქვთ. მათი თქმით კუსკის ოლქში ჯოჯოხეთური ბრძოლები მიმდინარეობს.
39 წლის პაველი ჰყვება, რომ მის ქვედანაყოფში ორი მეთაური დაიღუპა. „რუსების არტილერია და დრონები შეუჩერებლად გვბომბავდნენ. რაც ჩვენს თავზე ხდებოდა, ამის გადმოცემა სიტყვებით შეუძლებელია. ასეთ სიტუაციას შენს მტერსაც კი ვერ უსურვებ. ზედიზედ ორი მეთაური დაგვეღუპა“.
მშენებლობა - ყველაზე კარგი პერიოდი ცხოვრებაში
სუმის საავადმყოფოში ბევრი დაჭრილი ჯარისკაცი იმავდროულად კონტუზირებული იყო. საკვირველია, თუ როგორ გადარჩნენ ისინი ჯოჯოხეთურ ვითარებაში. ერთი შედარებით მსუბუქად დაჭრილი 27 წლის მეომარი, სახელად ტარასი, უფალს მადლობას უხდიდა, რომ ცოცხალი გადარჩა - მან საევაკუაციო ავტომანქანაში დროულად ჩაჯდომა მოახერხა.
კითხვაზე, თუ რით იყვნენ ჯარისკაცები მობილიზაციამდე დაკავებულები, მამაკაცებმა თქვეს, რომ მშენებლობაზე მუშაობდნენ, საცხოვრებელ სახლებს აშენებდნენ.
ტარასმა კითხვას სულ ბოლოს უპასუხა: „მე ძალიან კარგი სამსახური მქონდა, მშენებლობაზე ელექტროშემდუღებელი ვიყავი“, - თქვა მან და მზერა საავადმყოფოს პალატის სარკმელს მიაპყრო, სადაც მაღალი შენობები მოჩანდა, - „ახლა ვხვდები, რომ ეს ჩემი ცხოვრების მშვენიერი პერიოდი იყო“.
წყარო: https://www.washingtonpost.com/world/2024/11/08/ukraine-north-korea-kursk-soldiers/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
