,
ბრიტანული გაზეთ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპი მოქმედებს როგორც ბიზნესმენი და არა როგორც მთავარსარდალი“ (ავტორი - ჰემიშ ბრეტონ-გორდონი). პუბლიკაციის მიხედვით, დონალდ ტრამპი გადაწყვეტილებების მიღების დროს ერთმანეთში ურევს მთავარსარდლისა და ბიზნესმენის ფუნქციებს: იქ, სადაც მან მთავარსადლის ფუნქცია უნდა შეასრულოს, ბიზნესმენივით მოქმედებს, ხოლო სადაც ბიზნესმენივით უნდა მოიქცეს, მთავარსადალივით იქცევა.
გთავაზობთ სტატიას მცირე შემოკლებით:
უკრაინისათვის ამერიკული სადაზვერვო მონაცემების გადაცემის შეჩერება წარმოადგენს ყველაზე საშიშ ნაბიჯს, რომელიც კი დონალდ ტრამპს დღემდე გადაუდგამს. ეს ფაქტი აძლიერებს სოციალურ ქსელებში გამოთქმულ თვალსაზრისს, რომ ვლადიმერ პუტინს რაღაც გავლენა აქვს დონალდ ტრამპზე.
მარტივად გასაგებ ენაზე რომ ვთქვათ, ეს ნიშნავს იმას, რომ ვლადიმერ პუტინს შეუძლია სწრაფად აღადგინოს და გააძლიეროს თავისი უკვე საკმაოდ შეფერთხილი არმია, რომელიც აღარ იქნება ამერიკული კოსმოსური თანამგზავრების დაკვირვების ქვეშ და დაუბრკოლებლად შეუტიოს უკრაინის ტერიტორიაზე მდებარე სამიზნეებს, მშვიდობიანი მცხოვრებლების ჩათვლით.
დონალდ ტრამპს სურს, რომ რუსეთი რაც შეიძლება სწრაფად დაჯდეს მოლაპარაკების მაგიდასთან და რაღაც დათმოს სამშვიდობო ხელშეკრულების მისაღწევად. მაგრამ განა რუსეთის პრეზიდენტი რაიმე კომპრომისზე წავა, როცა ხედავს, რომ შანსები აშკარად მის სასარგებლოდ არსებობს? რუსეთს საკუთარი ძალები და სამოქალაქო მოსახლეობა დაცული ჰყავს, რუსულ რაკეტებსა და დრონებს კი, აშშ-ის თანამგზავრული დაზვერვის გამორთვის გამო, დაუბრკოლებლად შეუძლიათ სამიზნეების განადგურება.
იმდენად, რამდენადაც დანაკარგების მიხედვით რუსეთის არმია საშიშ ზღვარს უახლოვდება (ერთ მილიონს - დაჭრილ-დახოცილთა რაოდენობით, ათასობით ტანკებისა და თვითმფრინავების დაკარგვას), ყველაფერი, რაც ვლადიმერ პუტინს რჩება, ისაა, რომ მას შეუძლია მოუმზადებელ და გაუწრთვნელი ახალ ქვედანაყოფები უკრაინის ხორცსაკეპში გაგზავნოს. ამის გამო ომი შეიძლება საკმაოდ ხანგრძლივად გაგრძელდეს. ეს იმას ნიშნავს, რომ დონალდ ტრამპისა და ჯეიმს ვენსის ძალისხმევით ვლადიმერ პუტინის პოზიციები განმტკიცდა.
სამწუხაროდ, დონალდ ტრამპი სამხედრო პირი არ არის, იგი ბიზნესმენია, მაგრამ პრეზიდენტი საქმიანი გადაწყვეტილებების პროცესს სამხედრო კონტექსტით იყენებს. ეს არის პოტენციურად დამღუპველი მეთოდი. ანალოგიური წესით მან დაუყონებლივ შემცირა „იუესაიდის“ ბიუჯეტი, შეაჩერა განმნაღმავი პროექტები ერაყში და ავღანეთში, რასაც სამომავლოდ მრავალი სიცოცხლე შეეწირება. ამერიკელი ვეტერანები და სამხედრო მოსამსახურეები აღშფოთებულები არიან იმ ბიზნესმენთ მოქმედებით, რომლებიც გენერლების მსგავსად მოქმედებენ. დონალდ ტრამპისა და მისი თანაგუნდელების მიერ მიღებული თითოეული გადაწყვეტილების უკან ადმიანთა სიცოცხლე დგას.
უკრაინაში სამართლიანი მშვიდობის დამყარების ძალისხმევა ევროპამ უნდა აიღოს ხელში. მოცემული მომენტისათვის უფრო უკეთესი იქნებოდა, თუ დონალდ ტრამპი და ჯეიმს ვენსი მოლაპარაკებებს გამოეთიშებიან, რადგან ვლადიმერ პუტინი სწორედ მათი წაქეზებით იღებს თავისუფალი მოქმედების უფლებას. დაე, კირ სტარმერმა და ემანუელ მაკრონიმ აიღონ ინიციატივა.
იმედი გვაქვს, რომ დონალდ ტრამპს შესაძლებლობა ექნება ამერიკისათვის „ძველი დიდების დაბრუნებაზე“ იზრუნოს და არა დაკავებული იყოს იმ სამხედრო საქმეებით, რომლებიც მისი შესაძლებლობის კომპეტენციის მიღმა იმყოფებიან. ეს უკრაინელთა სიცოცხლის გადარჩენის გზა იქნებოდა.
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
