,
ბრიტანული გაზეთი „დეილი ტელეგრაფი“ (The Daily Telegraph) სტატიაში სათაურით „რუსები ჰყვებიან, თუ როგორ პანიკურად გაიქცნენ უკრაინის არმიის შეტევის გამო: კრემლი სამარცხვინო მდგომარეობაშია, მის მორალურ სულს კიევმა დარტყმა მიაყენა“ (ავტორი - ჯეიმს კილნერი) ასახულია ის პანიკური მდგომარეობა, რომელშიც კურსკის ოლქში უკრაინის არმიის ქვედანაყოფების შეჭრამ გამოიწვია.
გთავაზობთ პუბლიკაციას შემოკლებით:
„რუსები, რომლებმაც საკუთარი სახლები მიატოვეს და თავს უშველეს უკრაინის ჯარების შემოტევის გამო, ჰყვებიან, თუ როგორ გახდნენ იძულებულნი გაქცეულიყვნენ, როცა ადგილობრივი ხელისუფლება დაემხო.
პანიკა და შიში სწრაფად გავრცელდა კურსკის ოლქის სამხრეთის რაიონებში, დაწყებული ექვსი აგვისტოდან, როცა კიევის რეგულარულმა ჯარებმა მეზობელი სახელმწიფოს საზღვარი გადალახეს და ქვეყნის ტერიტორიაზე შეიჭრნენ. რუსეთზე ამგვარი თავდასხმა მეორე მსოფლიო ომის შემდეგ არცერთ სახელმწიფოს არ გაუბედავს.
„ჩვენ არ გვესმის, რატომ არ ამბობს ჩვენი მთავრობა სიმართლეს“, - ამბობს ერთ-ერთი კურსკელი ქალი პროსამთავრობო გაზეთ „კომერსანტის“ ჟურნალისტთან საუბარში, - „ტელევიზორით სულ იმას ამბობენ, საგანგებო სიტუაცია გამოვაცხადეთო. რომელ საგანგებო სიტუაციაზეა ლაპარაკი, როცა უკრაინელებს ჩვენი ქალაქები ოკუპირებული აქვთ და ქუჩებში ამერიკული ტანკები დაგრიალებენ? ეს ხომ უკვე ნამდვილი ომია!“
უკრაინელმა სამხედროებმა, კვირას, 11 აპრილს, რამდენიმე ვიდეორგოლი გამოაქვეყნეს, რომლებიც ასახულია, თუ როგორ ხსნიან ქალაქებში - რილსკში და სუჯაში - რუსეთის სახელმწიფოს დროშებს სამთავრობო შენობებიდან და მიწაზე ყრიან. ამით უკრაინელები კრემლს დასცინიან და ამცირებენ.
უკრაინელი ჯარისკაცები შეიჭრნენ კურსკის ოლქის მესამე რაიონულ ცენტრშიც - ქალაქ ბელოვშიც, რაც ადგილობრივმა ხელმძღვანელმა უკვე აღიარა.
უკრაინის უშიშროების სამსახურის წარმომადგენლის ცნობით, შეტევაში, რომლის შედეგად რუსეთის ტერიტორიის 600 კვადრატული კილომტრი დაიკავეს, ათასობით სამხედრო მოსამსახურე მონაწილობს. „მიზანი ისაა, რომ მოწინააღმდეგის პოზიციები გაიფანტოს, მაქსიმალური ზიანი მივაყენოთ როგორც ცოცხალი ძალის, ასევე სამხედრო ტექნიკის თვალსაზრისით და რუსეთში დესტაბილიზაცია გამოვიწვიოთ“, - თქვა მან ანონიმურობის პირობის დაცვით.
ჩამოთვლილი სასაზღვრო ქალაქებიდან კურსკისაკენ ათობით ათასი რუსეთის მოქალაქე გაიქცა ავტომობილებით, ველოსიპედებით, მოტოციკლებით, მათ თან მხოლოდ სწრაფად აღებული ბარგი მიჰქონდათ. ბევრმა პირადი დოკუმენტების აღებაც კი ვერ მოასწრო.
ვიდეორგოლში, რომელზეც სუჯადან გამოქცეული საშუალო ასაკის მქონე ქალების ლაპარაკია ასახული, ბევრი ტირის გადატანილი საშინელების გამო და მკაცრად აკრიტიკებს ადგილობრივ ჩინოვნიკების მოქმედებას.
„ჩვენს მიწაზე ნატოს ტექნიკით შეიარაღებული უკრაინელები შემოიჭრნენ და რამდენიმე საათში მთელი ქალაქი ნანგრევებად აქციეს. ჩვენ დავკარგეთ კარ-მიდამო, დავკარგეთ სახლები. ცეცხლის ქვეშ გამოვიქეცით, ბევრმა დოკუმენტების აღებც კი ვერ მოასწრო“, - ამბობს ერთ-ერთი ქალი.
ამ დროს ლაპარაკში ჩაერია იქვე მდგომი მამაკაცი, რომელმაც რუსი სამხედროები რუსეთის ტერიტორიის დაცვის უუნარობაში დაადანაშაულა: „ევაკუაცია ისეთი ქაოსური იყო, რომ ადამიანები ქვედა საცვლებით და მაისურებით გარბოდნენ, ბავშვები კი ჩვრებში გახვეულები მიჰყავდათ. ერთ-ერთ სოფლის მოსახლეობა, როცა უკრაინელები მათ სოფელში შეიჭრნენ, იძულებულები გახდნენ მდინარე გადაეცურათ
მიუხედავად იმისა, რომ კრემლმა თავის პროპაგანდისტებს უბრძანა, შეემცირებინათ უკრაინის თავდასხმის მნიშვნელობა, ადამიანების შოკი და დაბნეულობა პროსამთავრობო მასმედიაშიც კი გაიჟონა. „ადგილობრივი მოსახლეობა ბედის ანაბარად იყო მიტოვებული. სატელეფონო ზარებს არავინ არ პასუხობდა. გზები დამსხვრეულ-აფეთქებული ავტომანქანებით იყო მოფენილი, დრონების თავდასხმის გამო. რა უნდა ექნათ მოხუცებსა და ინვალიდებს, რომლებსაც გადაადგილება არ შეეძლოთ? ქალაქებში აკლიათ სურსათი და სასმელი წყალი, არანაირი კომუნიკაცია და ინფრასტრუქტურა არ მუშაობს“, - ამბობს ერთ-ერთი მამაკაცი.
„მე მრცხვენია რუსეთის არმიის გამო, რომელიც კორუმპირებულია და სამშობლოს დაცვაზე არ ფიქრობს. მე მეგონა, რომ უკრაინელებს დავამარცხებდით, მაგრამ გამოდის, რომ ისინი გვამარცხებენ... ვინ ადგენს ასეთ გეგმებს? იქნებ ჯობდა, რომ ჩვენი ჯარისკაცები 2022 წლის თებერვალ-მარტში კიევისაკენ კი არ გაგვეგზავნა, არამედ აქ დარჩენილიყვნენ და მოსახლეობა საიმდოდ დაეცვათ“, - ამბობს ერთ-ერთი ქალი.
უკრაინის არმიის თავდასხმამ კურსკის ოლქზე შოკური ტალღა გამოიწვია მთელ რუსეთში და ღრმად შეაღწია რუსეთის მმართველ სისტემაში. კრემლტა დაახლოებული პირების თქმით, ამ ფაქტმა „დიდი დარტყმა მიაყენა ვლადიმერ პუტინის რეპუტაციას და რუსეთის არმიის სარდლობას“. ასეთი განწყობების გაჩენა კრემლი შეშფოთებულია, რომელიც ჩვეულებრივ, მკაცრ პროპაგანდისტულ კამპანიას ეწევა, რათა მოსახლეობის კარგი განწყობა და ომის მიმართ მხარდაჭერა შეინარჩუნოს
როგორც იუწყებოდნენ, კურსკის ოლქში შეჭრა ჯარისთვის თვითონ ვოლოდიმირ ზელენსკის უბრძანებია, რაც სულ მალე თვითონაც დაადასტურა: „აგრესორზე ასეთი ზეწოლა აუცილებელია, მან უნდა იგრძნოს მთელი საშინელება“. ასეთმა პოზიციამ უკრაინელებს მნიშვნელოვნი მორალური ბიძგი მისცა.
უკრაინაში ადამიანები რუსეთის სამარცხვინო მდგომარეობაში ყოფნას ზეიმობენ და თავიანთ ჯარისკაცებს ქება-დიდებას უძღვნიან: „დაე, რუსებმა გაიგონ, როგორია საკუთარი წამლის გემო:.
„ამერიკული ავიაგამანადგურებლების F-16-ების მიღება და კურსკის ოლქში ძლევამოსილი შეჭრა მოსახლეობას სიხარულისა და პოზიტიური საუბრის საფუზველს აძლევს“, - უთხრა „დეილი ტელეგრაფის“ კორესპონდენტს კიევში ერთ-ერთმა წყარომ, - ადამიანებს იმედი გაუჩნდათ“.
წყარო: https://www.telegraph.co.uk/world-news/2024/08/11/fleeing-russians-tell-of-panic-and-terror-ukraine-invasion/
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
