USD 2.7384
EUR 2.8548
RUB 2.6619
Tbilisi
«The Daily Telegraph» : „იურიდიული თავდასხმები დონალდ ტრამპის წინააღმდეგ უნდა შეწყდეს: ამერიკაში კანონის უზენაესობის პრინციპი ირღვევა“
Date:  267

ბრიტანული გაზეთის „დეილი ტელეგრაფის“ (The Daily Telegraph) ექვსი ივნისის ნომერში გამოქვეყნებულია სტატია სათაურით „იურიდიული თავდასხმები დონალდ ტრამპის წინააღმდეგ უნდა შეწყდეს: ამერიკაში კანონის უზენაესობის პრინციპი ირღვევა“ (ავტორი - ნიუტ გინგრიჩი, აშშ-ის კონგრესის წარმომადგენელტა პალატის წევრი და მისი 50-ე ექს-სპიკერი).

გთავაზობთ პუბლიკაციას მცირე შემოკლებით:

თუ დონალდ ტრამპი ამჟამინდელ სასამართლოებს გადაიტანს და 2025 წლიდან ისევ პრეზიდენტობას გააგრძელებს, მან კანონის უზენაესობის აღდგენას და ამ პრინციპის კონსტიტუციურ განმტკიცებას მთავარი ყურადღება უნდა დაუთმოს.

რასაკვირველია, ალბათ, დონალდ ტრამპის უპირველესი სურვილი შურისძიება იქნება - თუ გავითვალისწინებთ გამოძიების ფედერალური ბიუროსა და ცენტრალური სადაზვერვო სააგენტოს უსინდისო დამოკიდებულებას, აგრეთვე პროკურორის უფლებამოსილების ბოროტად გამოყენებას იუსიტიციის სამინისტროსა და ჯორჯიისა და ნიუ-იორკის შტატების პროკურორების მხრიდან.

მაგრამ თუ რესპუბლიკელები დემოკრატი მოსამართლეებისა და პროკურორების დასჯას დაიწყებენ, ამით მხოლოდ დამანგრეველი ციკლი გაგრძელდება. ამერიკა საფრთხის წინაშე დადგება.

ამერიკის მამები თავის დროზე მწვავედ აცნობიერებდნენ ამ საფრთხეს. იმდროინდელი ბრიტანელი მოსამართლეები ბრიტანეთის მეფის აგენტებს წარმოადგენდნენ - იმის ნაცვლად, რომ მათ კანონი და სამართალი დაეცვათ, ისინი მეფე გეორგ მესამის ბრძანებებს ასრულებდნენ. აქედან გამომდინარე, სასამართლოს რეფორმის განხორციელება, დამოუკიდებლობის გამოცხადების შემდეგ, ამერიკელი რევოლუციონერების მეორე მთავარ მიზანს წარმოადგენდა.

რევოლუციის გამარჯვების შემდეგ, როცა კონსტიტუცია იქნა მიღებული, ზოგიერთებმა ჩათვალეს, რომ მასში მთავრობის მოქმედებისაგან მოქალაქეთა დაცვის გარანტიები საკმარისი არ იყო. ისინი ითხოვდნენ სპეციალური „უფლებების ბილის“ მიღებას, რომელშიც ჩამოთვლილი იქნებოდა მოქალაქეთა ყველა უფლებები და მთავრობის მოქმედების შეზღუდვები. იფიქრეთ ამ შეზღუდვებზე და ყურადღება მიაქციეთ ჯო ბაიდენის მთავრობის მოქმედებას, თუ როგორ ცდილობენ დემოკრატი ჩინოვნიკები და აშშ-ის სამართლებრივი სისტემის წარმომადგენლები დონალდ ტრამპის განადგურებას.

ყურადღება გაამახვილეთ იმ ფაქტზეც, „უფლებების ბილის“ ათი შესწორებიდან ხუთი კონკრეტულად მოსამართლეთა უფლებამოსილების შეზღუდვას ეხება. მათგან ბევრი რამ არის დარღვეული დონალდ ტრამპის მიმართ.

მეოთხე შესწორება  მოქალაქეებს უსაფუძვლო ჩხრეკებისა და ნივთების ამოღებისაგან იცავს და ითხოვს, რომ ორდერი მტკიცე საფუძველზე იქნას გაცემული. გავიხსენოთ, რომ არჩევნებში თითქოსდა რუსების ჩარევის შესახებ მთელი საგამოძიებო მოქმედება გამოძიების ფედერალური ბიუროს მიერ გაცემული ორდერებით იყო უკანონოდ ინსპირირებული.

მეექვსე შესწორების თანახმად, აშშ-ის მოქალაქეებს უფლება აქვთ სწრაფად იქნეს განხილული საქმე მიუკერძოებელი ნაფიც მსაჯულთა მიერ. დონალდ ტრამპის წინააღმდეგ ამას წინანდელი ფიქტიური ბრალდების შემთხვევაში საოლქო პროკურორმა ელვინ ბრეგმა ისეთი ბრალდება წაუყენა ექს-პრეზიდენტს, რომელსაც ვადა ჰქონდა გასული. ნუთუ ეს არის სწრაფი განხილვა? გარდა ამისა, ნაფიცი მსაჯულები სასამართლოს სხდომის დროს მიუკერძოებლები არ იყვნენ. მათი სუბიექტური დამოკიდებულება აშკარად ჩანდა. იმავე მეექვსე შესწორების ძალით, მოქალაქეებს უფლება აქვთ მოწმის ჩვენება თავიანთ სასარგებლოდ გამოიყენონ. მოსამართლე კი დონალდ ტრამპის ადოკატებს რეგულარულად უკრძალავდა იმ მოწმეეების გამოძახებას, რომლებიც ჩვენებას მის სასარგებლოდ  მისცემდნენ.

მერვე შესწორება მოსამართლეებს უკრძალავს, რომ მოქალაქეებს „გადაჭარბებული“ მოცულობის ჯარიმების გადახდა დააკისრონ. გავიხსენოთ დონალდ ტრამპის მიერ გირაოდ წინასწარ შეტანილი 454 მილიონი დოლარი, რომელიც არასწორად არის გამოთვლილი და არ ასახავდა მის ჭეშმარიტ ქონებრივ მდგომარეობას. მართალია, მოგვიანებით, ადვოკატების მრავალგზისი მოთხოვნით, თანხა შემცირდა, მაგრამ თვითონ ფაქტი იმაზე მეტყველებს, თუ რა გულგრილად ექცევიან მმართველი წრეები ადამიანთა უფლებების დაცვას.

დონალდ ტრამპმა, როცა იგი პრეზიდენტი გახდება, უნდა დაადასტუროს რომ „უფლებების ბილი“ ყველა ამერიკელს იცავს, მისი ქონებრივი მდგომარეობის განურჩევლად. პრეზიდენტმა უნდა გამოიძიოს კანონის უზენაესობის ყველა დარღვევა ყოველი მოქალაქის მიმართ და სამართლიანობა უნდა აღადგინოს. პრეზიდენტმა უნდა გამოაქვეყნოს ყველა დოკუმენტი და ცნობა, რომელიც ეხება ე.წ. „შეთქმულებებს“, დაწყებული 2015 წლიდან, რომლებიც გამოყენებული იყო დონალდ ტრამპის - როგორც ჯერ პრეზიდენტობის კანდიდატისა და შემდეგ როგორც პრეზიდენტის  - წინააღმდეგ, მისი განადგურების მიზნით.

დონალდ ტრამპის ადმინისტრაციამ კონგრესს უნდა შესთავაზოს თანამშრომლობა სასამართლო სისტემის რეფორმირებაში, რომ სამომავლოდ უფლებამოსილების ბოროტად გამოყენება აღარ იქნეს დაშვებული.

დონალდ ტრამპმა უნდა გადახედოს მთელ ამერიკულ სამართლებრივ სისტემას, [გააუქმოს, რაც გასაუქმებელია], არ არის გამორიცხული გამოძიების ფედერალური ბიუროს დემონტაჟის განხორციელებაც. უნდა დადგინდეს გამჭვირვალობისა და ანგარიშგების ახალი სტანდარტები მთლიანად იუსიტიციის სამინისტროსათვის.

დონალდ ტრამპის პრეზიდენტობისას მისი მიზანი უნდა იყოს კანონის უზენაესობისა და კონსტიტუციის ურყევობის პრინციპის ჭეშმარიტი განმტკიცება და არა კანონებით სარგებლობა პოლიტიკური ოპონენტების წინააღმდეგ [როგორც ამას ჯო ბაიდენი აკეთებს].

ამ პირობებზე იქნება დამოკიდებული, გადარჩება თუ არა ამერიკა. ეს უნდა გახდეს ამერიკის მომდევნო პრეზიდენტის დონალდ ტრამპის მოქმედების საკვანძო პრინციპი.

წყარო: https://www.telegraph.co.uk/us/comment/2024/06/05/donald-trump-trial-conviction-us-election-judicial-system/

 

analytics
«The Washington Post» (აშშ): „ომისადმი შიშის გამო, საქართველო რუსეთისაკენ დაბრუნებას ირჩევს“

ამერიკული გაზეთი „ვაშინგტონ პოსტი“ (The Washington Post) აქვეყნებს სტატიას სათაურით „ომისადმი შიშის გამო, საქართველო რუსეთისაკენ დაბრუნებას ირჩევს“ (ავტორი - მარია ილიუშინა), რომელშიც განხილულია არჩევნებისშემდგომი სიტუაცია საქართველოში.

გთავაზობთ პუბლიკაციას შემოკლებით:

(...) ქართველთა უმრავლესობა - გამოკითხვების მიხედვით, 80%-ზე მეტი - მხარს უჭერს ქვეყნის ევროპულ ორიენტაციას და მოსკოვის მიმართ მაინცდამაინც განსაკუთრებულ სიყვარულს არ ამჟღავნებს, ოპოზიცია კი ცდილობს ხმის მიცემის შედეგები წარმოადგინოს როგორც არჩევანი ევროკავშირსა და რუსეთს შორის.

მაგრამ იმის გათვალისწინებით, რომ ორ ქვეყანას შორის 2008 წლის აგვისტორში მომხდარი ხანმოკლე ომის შედეგად საქართველოს ტერიტორიის 20% დე-ფაქტოდ რუსეთის კონტროლის ქვეშ იმყოფება, მოსკოვის სამხერო ძლიერების ჩრდილი სულ უფრო შესამჩნევი ხდება. შესაბამისად, „ქართულმა ოცნებამ“ ამომრჩევლებს უფრო რადიკალური დილემა შესთავაზა: არჩევანი მშვიდობასა და ომს შორის.

მმართველი პარტიის „რუსეთის მხარეს შებრუნება“ შედარებით ახალ მოვლენას წარმოადგენს. 2012 წელს, როცა „ქართული ოცნება“ ხელისუფლებაში მოვიდა, მნიშვნელოვან საგარეოპოლიტიკურ წარმატებას მიაღწია - სწრაფად დაუახლოვდა ევროკავშირს მასში გაწევრიანების სურვილით, მაგრამ რუსეთ-უკრაინის ომის დაწყების კვალობაზე პარტიამ რუსეთის ორბიტისაკენ გადაუხვია. მთავრობამ ევროპა და ადგილობრივი ოპოზიცია წარმოადგინა „ომის გლობალური პარტიად“, რომელსაც სურს საქართველო მოსკოვთან ომში ჩაითრიოს და კრემლთან დაპირისპირების ინსტრუმენტად გამოიყენოს

ამჟამად „ქართული ოცნება““ ოფიციალურად პრორუსულ პარტიას არ წარმოადგენს, მაგრამ ხშირად მისი პრაქტიკული მოქმედება საერთო პრორუსულ ჩარჩოებში ჯდება. 

ევროპული გზიდან გადახვევის პოლიტიკის ცენტრში მოჩანს „ქართული ოცნების“ დამაარსებელი ბიძინა ივანიშვილი - მილიარდერი, ყოფილი პრემიერ-მინისტრი, რომელიც ბოლო ათწლეულში წავიდა ქართული პოლიტიკიდან, მაგრამ იმავდროულად გავლენიან ადამიანად რჩებოდა. ბიძინა ივანიშვილი რუსეთში ყოფნის დროს გამდიდრდა, 1990-იან წლებში და როგორც მისი კრიტიკოსები ამბობენ,  მისი რიტორიკა და პოლიტიკური მრწამსი რუსეთის ლიდერის პოზიციას უთავსდება.

რუსეთის არმიის უკრაინაში შეჭრის დაწყებიდან პურველ ეტაპზე საქართველომ უკრაინას მხარი დაუჭირა. თბილისში დღესაც ბევრი უკრაინული დროშა ფრიალებს, მაგრამ მთავრობა თავს იკავებს რუსეთის გადაჭარბებული კრიტიკისაგან და ერიდება ანტირუსული სანქციების რეალიზებას.

„ჩვენ, როგორც ქვეყნის მმართველმა პარტიამ, მთავრობამ, ყველაფერი გავაკეთეთ უკრაინისა და უკრაინელი ხალხის მხარდასაჭერად“, - განაცხადა „ვაშინგტონ პოსტთან“ საუბარში „ქართული ოცნების“ თავმჯდომარის მოადგილემ არჩილ თალაკვაძემ, მაგრამ, მისი თქმით, დასავლეთის ოფიციალურმა პირებმა რუსეთ-უკრაინის ომში საქართველოს ჩათრევა მოისურვეს: „ჩვენ ჩავთვალეთ, რომ ასეთი პოლიტიკა საქართველოსათვის ძალზე სარისკო და გაუმართლებელი იქნებოდა“.

„ქართულმა ოცნებამ“ წინასაარჩევნო კამპანიის დროს აქტიურად ისარგებლა უკრაინის ომით და ამომრჩევლებს პლაკატების სერია შესთავაზა, რომლებზე გამოსახულია ერთი მხრივ, ომით დანგრეული უკრაინის ქალაქები და სოფლები, მეორე მხრივ - აღმშენებლობის პროცესში მყოფი საქართველო. ასეთმა პროპაგანდამ თავისი გამოძახილი ჰპოვა რუსეთთან ომგადატანილ საქართველოს მოსახლეობაში, განსაკუთრებით სოფლებში, ოკუპირებულ რეგიონებთან ახლოს, მხარეთა დამაშორიშორებელ ე.წ. სადემარკაციო ხაზის გასწვრივ.

როგორ ავიცილოთ თავიდან ომი

ქართველებს კარგად ახსოვთ 2008 წლის აგვისტოს ომი. ჭორვილისაკენ - ბიძინა ივანიშვილის მშობლიური სოფლისაკენ მიმავალი გზა, რომელიც კავკასიის ქედის სამხრეთ კალთებზე მდებარეობს, სწორედ რუსეთის მიერ ოკუპირებული რეგიონის - სამხრეთ ოსეთთან ახლოს გადის, სულ რაღაც ორიოდე კილომეტრში, სადემარკაციო ხაზთან.

ჭორვილაში ბიძინა ივანიშვილს თითქმის ეროვნულ გმირად თვლიან - მდიდარ ადამიანად, რომელიც თანასოფლელებს ყოველმხრივ ეხმარებოდა - სახლებისა თუ გზების მშენებლობაში, ჯანდაცვასა თუ კომუნალური გადასახადების გადახდაში, სანამ მან სახელმწიფო თანამდებობა - ქვეყნის პრემიერ-მინისტრის პოსტი არ დაიკავა.

„მე ომის მოწინააღმდეგ ვარ. დარწმუნებული ვარ, რომ „ქართული ოცნება“ მსვიდობას შეინარჩუნებს. არ გვსურს, რომ რომელიმე ქვეყანა საქართველოს მტერი იყოს და არც ის გვინდა, რომ საქართველოს იყოს სხვა ქვეყნის მტერი“, - ამბობს გიორგი გურძენიძე, სკოლის დირექტორი, რომელსაც ახსოვს, თუ როგორ ხმაურით დაფრინავდნენ სოფლის თავზე, ცაში რუსული თვითმფრინავები 2008 წელს.

„ქართული ოცნება“ აქტიურად უჭერს მხარს ბიძინა ივანიშვილის პოლიტიკური კურსის ორ ძირითად მომენტს - მშვიდობას ნეიტრალიტეტის გზით და ქართული ტრადიციული ფასეულობების დაცვას. „ქართული ოცნების“ მტკიცებით, მისი სტრატეგიული მიზანი არ შეცვლილა - ევროინტეგრაცია ძალაში რჩება, რომლის რეალიზებას 2030 წლისათვის არის დაგეგმილი: საქართველო ევროკავშირის წევრი გახდება „ღირსეულად“ და ტრადიციული ეროვნული ფასეულობების დაცვით.

„რა თქმა უნდა, მსურს ევროკავშირის წევრი ვიყოთ, მაგრამ ჩვენ ჩვენი წინაპრების ღირსებაც და მემკვიდრეობაც უნდა დავიცვათ. ქალი ქალი უნდა იყოს, კაცი კი - კაცი“, - ამბობს ჭორვილელი მამია მაჭავარიანი.

ქართველთა ღირსება კი დაცული იქნება ორი კანონით, რომლებმაც, პრაქტიკულად, ევროკავშირში საქართველოს პოტენციური წევრობის პროცესი შეაჩერეს - იმიტომ, რომ მათი დებულებები ევროპული ბლოკის სტანდარტებს ეწინააღმდეგება. ეს კანონებია „ოჯახური ფასეულობებისა და არასრულწლოვანების დაცვის, ასევე უცხოური გავლენის გამჭვირვალობის შესახებ, რომლებიც, როგორც ოპოზიცია აცხადებს, რუსული სამართლებრივი აქტების ასლებს წარმოადგენენ.

ევროპა შორეული ხდება?!

საქართველოს დედაქალაქის მცხოვრებთა ნაწილი შეშფოთებულია, რომ ქვეყნის შანსი ევროკავშირის წევრობაზე მცირდება. „არჩევნებში „ქართული ოცნების“ გამარჯვება სხვა არაფერია, თუ არა ხელისუფლების უზურპაცია“, - ამბობს 38 წლის გიორგი, რომელიც გვარს არ ასახელებს, ვაითუ დევნა დაუწყონ, - „ჩვენ ევროკავშირთან ინტეგრაცია უნდა გავაღრმავოთ. რუსეთთან დაახლოებას კი არცერთი ნორმალური ქვეყანა არ ცდილობს. პრორუსუსლი ორიენტაცია თვითმკვლელობას ნიშნავს, რადგან მოსკოვი არანაირი შეთანხმების პირობებს არ იცავს“.

ოპოზიცია მწვავედ აკრიტიკებს „ქართული ოცნების“ ომის წინააღმდეგ მიმართულ კურსს და მას პროპაგანდისტულს უწოდებს, ზოგიერთები კი თვლიან, რომ მმართველ პარტიის მხრიდან ამგვარი ლოზუნგების წარმოჩენა ხელისუფლებაში დარჩენასა და ერთპარტიული მმართველი სისტემის შენარჩუნებას ემსახურება.

პარტია „საქართველოსათვის“ ლიდერის გიორგი გახარიას განცხადებით, ბიძინა ივანიშვილისა და „ქართული ოცნების“ პოლიტიკაში მომხდარი ცვლილებები - პრორუსული გადახრები - იმითაა გამოწვეული, რომ ევროკავშირში გაწევრიანება ხელისუფლების როტაციას ნიშნავს: „მისი მთავარია მიზანია ხელისუფლების შენარჩუნება. იგი ხედავს, რომ ევროპული დემოკრატია ხელისუფლების არჩევნების გზით შეცვლას ითვალისწინებს“.

მაგრამ არჩევნების შედეგების წინააღმდეგ მიმდინარე საპროტესტო აქციები ისეთივე ძლიერი და ფართო არ არის, როგორიც გაზაფხულზე მიმდინარეობდა ზემოთ ხსენებული კანონების მიღების დროს. ეს ნიშნავს, რომ ოპოზიცია გამოფიტულია. მათ ვერც დასავლეთი ვერ უწევს სათანადო დახმარებას. ბრიუსელს შეუძლია გარკვეული ზეწოლა მოახდინოს „ქართულ ოცნებაზე“, მაგრამ ევროპელი ჩინოვნიკების რეაქცია აწონილ-დაწონილია: დამკვირვებლებმა ნამდვილად დააფიქსირეს დარღვევები, მაგრამ მათ თავი შეიკავეს იმის განცხადებაზე, რომ არჩევნები გაყალბდა და ხმები მოპარულია.

არჩევნებში მომხდარი ყველა დარღვევის დეტალურად გამოკვლევა დროს მოითხოვს - კვირეებს და შეიძლება თვეებსაც, თანაც საკმაოდ რთულია მათი დამტკიცება-დადასტურება. „ჩვენ ახლა ისეთ სიტუაციასთან გვაქვს საქმე, როცა დასავლეთს არ სურს ხისტი ნაბიჯები გადადგას საკმარისი მტკიცებულებების გარეშე, ოპოზიციას კი საკმარისი მტკიცებულებები არ აქვს“, - ამბობს ჯონ დიპირო საერთაშორისო რესპუბლიკური ინსტიტუტიდან.

ბიძინა ივანიშვილი აშკარად იმაზე დებს თავის ფსონს, რომ ევროპა საქართველოსადმი ინტერესს დაკარგავს. ჯერ კიდევ ზაფხულში იგი აცხადებდა, რომ აშშ-ის საპრეზიდენტო არჩევნებში დონალდ ტრამპის გამარჯვება რუსეთ-უკრაინის ომს დაასრულებს. „ჩვენ მაქსიმუმ ერთი წელი გვაქვს, რომ ეს ყველაფერი მოვითმინოთ, შემდეგ კი [დასავლეთის] გლობალური და რეგიონული ინტერესები შეიცვლება, მათთან ერთად კი შეიცვლება ინტერესები საქართველოს მიმართაც“, - ამბობდა ბიძინა ივანიშვილი, - ომის დასრულებასთან ერთად კი ყველა გაუგებრობა ევროპასთან და ამერიკასთან გაქრება“.

წყარო: https://www.washingtonpost.com/world/2024/11/21/georgia-russia-elections-influence/

 

See all
Survey
ვინ გაიმარჯვებს რუსეთ - უკრაინის ომში?
Vote
By the way