18 წლის ეკოაქტივისტმა გრეტა ტუნბერგმა, გლაზგოში კლიმატური პროტესტები დააანონსა. მისი თქმით, საზოგადოების ძალისხმევის გარეშე კლიმატური სამიტი COP26 შედეგს ვერ გამოიღებს.

„დრო იწურება. COP26-ის მსგავსი კონფერენციები ვერაფერს შეცვლის, თუ გარედან ძლიერი საზოგადოებრივი ზეწოლა არ მოხდება. შემოუერთდით კლიმატურ პროტესტს პარასკევს და კლიმატურ მარშს შაბათს, რათა თქვენი ხმა გაიგონ. ერთად ძლიერები ვართ!“ − წერს ახალგაზრდა აქტივისტი Twitter-ის ოფიციალურ გვერდზე.

მანამდე, გრეტამ განაცხადა, რომ გაერო-ს კლიმატის სამიტს ესწრებიან პოლიტიკოსები, რომლებსაც თავი ისე უჭირავთ, თითქოს ეკოლოგიური პრობლემები მართლა აინტერესებდეთ, სინამდვილეში კი ამ საკითხს სერიოზულად არ ეკიდებიან.

ლიდერებმა მიოლაპარაკეს, რომ პლანეტის მასშტაბით მწვანე საფარის მასობრივი განადგურების წინააღმდეგ საერთო ჯამში ისინი 19.2 მილიარდ აშშ დოლარს გამოყოფენ.