,
2023 წლის 31 აგვისტო - 1 სექტემბრის შეჯამება უკრაინაში:
- უკრაინელები ლუგანსკი-ხარკივის ოლქების საზღვარზე რუსული არმიის აქტიურობის ჩასაშლელად, მათი მომარაგების ხაზების დაბომბვას ახორციელებენ. დაიბომბა სვატოვე - რუსული არმიის ლოჯისტიკური და სამეთაურო ცენტრი ჩრდილო-დასავლეთში. განადგურდა როგორც ნავთობმზიდები ისე სატვირთო მანქანები და სამხედრო პროდუქტები.
უკრაინელები აცხადებენ, რომ სვატოვეს მიმართულებიდან რუსული არმიის მხრიდან იერიშები და აქტივობა პრაქტიკულად მოგერიებულია. მეტიც, სვატოვედან 16 კილომეტრში უკრაინელებმა ნოვოეჰორივკასთან რამდენიმე ასეული მეტრით წინ წაწევაც კი მოახერხეს.
- იმ ფონზე რომ უკრაინელებს კუპიანსკის მიმართულებით დამატებითი ძალები ჰყავთ შეყვანილი - დვორიჩნესა და სინკივკაში - სიტუაცია უფრო მეტად კონტროლირებადი გახდა. მაგრამ ამ მიმართულებაზე სამხედრო აქტივობა ვერ შეწყდება და როგორც კრემინას ტყეში ახლაც გრძელდება შეტაკებები ისე იქნება ლიმან პერშის ტყეშიც, მანამ, სანამ რომელიმე მხარე ინიციატივისათვის დამატებით ძალას არ მოუყრის თავს. საბოლოო ჯამში კი, რუსებს ეიმედებოდათ რომ ზაპორიჟიას კვალობაზე უკრაინელები დაკარგავდნენ კუპიანსკს ან მდინარე ოსკილის აღმოსავლეთ ნაპირს, მაგრამ მათ ამ ამოცანის შესრულება ამ ეტაპზე ვერ შეძლეს. ერთადერთი რუსებმა რაც მოახერხეს იყო უკრაინელთა ჯარისა და ყურადღების ამ მიმართულებაზე გადანაწილება, რაც რუსეთის მხრიდან ერთ-ერთი ამოცანა გახლდათ.
- ზაპორიჟიაში, ნოვოპროკოპივკასთან, ვერბოვესა და კონათან შეტაკებები მიმდინარეობს. რუსებს საჰაერო სადესანტო ძალებიც კი მობილიზებული ჰყავთ. პრაქტიკულად თავდაცვის ზღუდის მიღმა გადასული უკრაინელების უკუგდება გახდა უპირველესი ამოცანა. ზოგადად ასეა, ზღუდეების გავლა ფრონტის ხაზის ამ მონაკვეთის ჩამოშლის მიზეზი შეიძლება გახდეს.
- დონეცკის ოლქში, კრამატორსკთან ორი უკრაინული შვეულმფრენი შეეჯახა ერთმანეთს. სულ ეკიპაჟის 6 წევრი დაიღუპა.
- აფეთქებების სერია გრძელდება რუსეთში: დრონები დაფრინავენ მოსკოვისა და ბრიანსკის ოლქებში. პრაქტიკულად, უკრაინელთა მიერ დრონების წარმოების გააქტიურებამ რუსეთი სერიოზული გამოწვევის წინაშე დააყენა. რუსეთის სიდიდე როგორც უპირატესობა კი არა პრობლემად იქცა - მთელი ცის დაცვა ვერ ხერხდება, ხოლო თუკი ვივარაუდებთ, რომ ზოგიერთი დრონი სულაც რუსეთის ტერიტორიიდან ფრინდება, იქ სიტუაციის კონტროლი კიდევ უფრო გაუჭირდება მოსკოვს.
- აფეთქებებია ყირიმშიც. სევასტოპოლის სანაპიროსა და საჰაერო სივრცის დაცვაზე ძალიან დიდი რაოდენობით რუსული რესურსები იხარჯება. პრაქტიკულად რუსული თავდაცვა სევასტოპოლისკენაა ფოკუსირებული. ამ ფონზე კი არამხოლოდ იქ, არამედ ყირიმის ნახევარკუნძულზე, სხვადასხვა მიმართულებით აქტიურობენ უკრაინული დრონები.
- საბრძოლო მოქმედებები გრძელდება ბახმუტის შემოგარენშიც. აქტიურობენ უკრაინელი სნაიპერებიც, რომლებიც უშუალოდ ქალაქის პერიფერიაში ცდილობენ რუსი სამხედროების განეიტრალებას.
მიყევით ბმულს - გიორგი კობერიძე
