17 თებერვლის შეჯამება უკრაინაში:
- დონეცკის რაიონში, ქალაქი ბახმუტი და მისი შემოგარენი ყველაზე აქტიურ საბრძოლო მოქმედების ზონად რჩება. რუსებმა მძიმე შეტევის შემდეგ ქალაქის სიახლოვეს, ჩრდილო-აღმოსავლეთით პარასკოვიივკას დიდი ნაწილის დაკავება შეძლეს. ბოლო 72 საათია დასახლებას არამხოლოდ "ვაგნერი" არამედ საჰაერო სადესანტო ძალები უტევენ და მიუხედავად დიდი დანაკარგისა და რამდენიმე უკუქცევისა, დასახლებაში შეღწევა დღეს წარმატებით განახორციელეს. საბრძოლო მოქმედებების ინტენსივობა ამ მიმართულებით კიდევ უფრო მომატებულია.
სიტუაცია უკეთესია ბახმუტის შიგნით. მის აღმოსავლეთ ნაწილში "ვაგნერთან" ერთად რუსული სპეცრაზმი მოქმედებს, თუმცა უკრაინელები მათ მოგერიებას და დიდი დანაკარგების მიყენებას ახერხებენ. ბახმუტის მიმართულებით აქტიურები არიან დონეცკელი სეპარატისტების ნარჩენებიც, თუმცა მათ შორის მსხვერპლი იმდენად მაღალია, რომ ერთ-ერთი ყველაზე ბრძოლისუნარიანი ერთეულიდან სრულიად გამოფიტულ დანაყოფად ჩამოქვეითდნენ. ეს კი რუსეთის გეგმაზომიერი პოლიტიკაა - ის ფრონტის ხაზზე სპეციალურად არჩეულ, ხშირად ეთნო-ტერიტორიული ნიშნით წარმოშობილ სამხედროებს აგზავნის.
ქალაქის შემოგარენში, დაღამებისთანავე აქტიურდებიან უკრაინული დანაყოფები და ღამის ხედვის აპარატებით შეიარაღებულები ახორციელებენ ლოკალურ კონტრთავდასხმებს რუსულ პოზიციებზე. მოქმედებენ უკრაინული დრონებიც.
პრაქტიკულად, ბოლო 48 საათში ბახმუტის ირგვლივ საბრძოლო მოქმედებებმა განსაკუთრებულად იმატა. რუსებმა მობილიზებული ნაწილებიც ჩართეს და არტილერიის ცეცხლის ქვეშ ღია სივრცეში შეტევაზე ტალღებადაც კი გადადიან. ეს კი მასირებულ სიკვდილზე ან ტყვედ ჩავარდნაზე მიუთითებს. ორივე მათგანი გაზრდილია. თუკი ომში მსხვერპლი ძირითადად არტილერიასა და ჯავშანსაწინააღმდეგო შეიარაღებაზე მოდიოდა ბოლო თვეებია თანდათან პროგრესირებს ახლო კონტაქტურ ბრძოლაში დაღუპულ სამხედროთა რიცხვი. მათი უმრავლესობა კი ბახმუტის, ავდიივკასა და მარიინკას მიმართულებაზე მოდის.
ბახმუტის მიმართულებით დასავლეთის გზა რუსების მიერ იბომბება, მაგრამ მასთან მიახლოებას ვეღარ ახერხებენ.
- რუსები ლუგანსკის რაიონშიც აქტიურობენ, თუმცა წარუმატებლად. ერთ-ერთი ყველაზე მნიშვნელოვანი წერტილი, რომლიდანაც უკრაინელები ოლქში მოქმედებენ ბილოჰორივკაა. მიუხედავად რუსების მცდელობისა დაიკავონ დასახლება ისინი ამას მესამე თვეა უშედეგოდ ცდილობენ. მსხვერპლი კი ამ მიმართულებითაც ძალიან მაღალი აქვთ. ერთ-ერთი ყველაზე აქტიურ ზონად რჩება ბილოჰორივკას მიმართულება, თუმცა ინფორმაციის თვალსაზრისით გაშუქება მინიმალურია.
- უკრაინელებმა ფრანგებისაგან Akeron MP ტანკსაწინააღმდეგო შეიარაღება მიიღეს. მას 5 კილომეტრის დაშორებით მყოფი ტანკის განადგურება შეუძლია. ის ქვეითთა საბრძოლო მანქანებზეც მაგრდება.
- რუსეთის დასავლეთის სამხედრო ოლქის ფინანსური დეპარტამენტის უფროსი მარია იანკინი ფანჯრიდან გადავარდა/გადააგდეს. იგი ადგილზე გარდაიცვალა. ბოლო ერთ წელიწადში მსგავსმა მოვლენებმა რუსეთში ჩვეულებრივი სახე მიიღო. შიდა დაპირისპირებასა და ანგარიშსწორებასთან ერთად სავარაუდოა, რომ რაღაცების დაფარვასაც ემსახურებოდეს ეს ყველაფერი.
