- პრო-უკრაინულმა ძალებმა უკრაინის საზღვრის სიახლოვეს დაკავებული დასახლება კოზინკას ირგვლივ სანგრების გათხრა და ფორტიფიკაციების მოწყობა დაიწყეს. აშკარად განიხილება ტერიტორიის ხანგრძლივი დროით შენარჩუნების სცენარი.
- რუსული შვეულმფრენი ჩამოაგდეს ბელგოროდის ოლქში; აშკარაა პრო-უკრაინული ძალები კარგად არიან შეიარაღებული.
- პრო-უკრაინულმა ძალებმა იარაღის მცირე საწყობები დაიკავეს პოლიციის შენობებსა და კომისარიატებთან.
- არის ჰიპოთეზა, რომ პრო-უკრაინული ძალები მიიწევენ გრაივორონის ჩრდილო-აღმოსავლეთით ტაქტიკური ბირთვული იარაღის საწყობებისაკენ. რეალურად ეს ვერსია საეჭვო და ნაკლებ დასაჯერებელია, მაგრამ ფსიქოლოგიურ ზეწოლას კი ნამდვილად მოახდენს.
- კრემლმა ოფიციალურად გამოაცხადა კონტრ-ტერორისტული ოპერაციის დაწყება ბელგოროდის ოლქში პრო-უკრაინული ძალების წინააღმდეგ.
- სროლების ხმა ისმოდა ორლოვკაშიც, რომელიც გრაივორონიდან აღმოსავლეთით მდებარეობს, დაახლოებით 40 კილომეტრში, მაგრამ უკრაინის საზღვრიდან 14-ში. შესაძლოა იქ ადგილობრივ მძინარე ქსელთან გვქონდეს საქმე, ან რუსმა პარტიზანებმა განახორციელეს რაიმეზე თავდასხმა ან სულაც მიმდინარე პროცესებისაგან დამოუკიდებლად ხდებოდეს რაიმე. ზოგადად, მძინარე ქსელისა და ინფორმატორების არსებობა რუსეთის ტერიტორიაზე ლოგიკურია, მაგრამ რამდენად გვაქვს საქმე ამ შემთხვევაში არაა ცნობილი.
- შეტაკებები იყო საზღვრის გასწვრივ დრონოვკაშიც. ის მოცემული შეტაკებების ზონიდან ჩრდილო-დასავლეთით, 17 კილომეტრში მდებარეობს. აქ რუსულ პოზიციებს არტილერიამ გაუხსნა ინტენსიური ცეცხლი. თუმცა რუსები ამბობენ, რომ უკრაინელები მძიმე ტექნიკით საზღვრის გასწვრივ არიან განლაგებული და რუსულ პოზიციებს ისე ბომბავენ.
- კვლავ იბომბება შებეკინო - დიდი რუსული ქალაქი ბელგოროდიდან 25 კილომეტრში. ქალაქი თითქმის მთლიანად სამხედრო ზონადაა ქცეული.
ამ ყველაფრის ფონზე კი შეიძლება თამამად ითქვას:
ომი გადავიდა რუსეთის ტერიტორიაზე. ამასთან, პრო-უკრაინული ძალების მხრიდან ფორტიფიკაციების მოწყობა მნიშვნელოვანია - უკანდახევის შემთხვევაში მშვიდობიანად რომ მოახერხონ უკრაინის ტერიტორიაზე გადასვლა. ასევე მნიშვნელოვანია საარტილერიო ფარი, რაც მათი უკუსვლის შემთხვევაში უკრაინელებს შეუძლიათ რომ მისცენ.
მცირე და მობილური დანაყოფები რადგან მოქმედებენ რუსეთის ტერიტორიაზე ეს მნიშვნელოვანი უპირატესობაა პრო-უკრაინული შემტევი ნაწილებისათვის. ისინი სწრაფად მანევრირებენ და ადვილად შეუძლიათ წინსვლაც და უკანდახევაც.
