ეს კვირები კვლავ გახშირდა პროპაგანდა რუსული არმიის გამარჯვებისა და უკრაინის არმიის ჩამოშლის შესახებ, რაც ცხადია სიცრუეა. ამ რუკაზე კარგად ჩანს თუ რა შეიცვალა 6 თვის განმავლობაში ფრონტის ხაზზე დონეცკის ოლქში.
რაც შეეხება კონკრეტულ მდგომარეობას ივნის-ივლისის თვეში:
1. რეკორდული სიცხეებია უკრაინაში. ამაზე რუსებიც ჩივიან და უკრაინელებიც. რუსულ არმიაში ჰიგიენის სერიოზული პრობლემაა, რაც პოტენციურად ავადმყოფობების გავრცელების რისკს ზრდის.
2. უკრაინელები როსტოვის ოლქში აქტიურად ბომბავენ ნავთობტერმინალებს. ბოლო თვეებში უკრაინიდან 1000 კილომეტრის რადიუსში რუსეთის ტერიტორიაზე დაბომბვების შედეგად რუსულ ლოჯისტიკაში სერიოზული პრობლემები გაჩნდა. ამიტომაა, რომ ჯერაც ვერ ვიხილეთ რუსეთი საზაფხულო მასშტაბური ოპერაცია. უკრაინელები დროს კარგად იგებენ და ემზადებიან პოტენციური კონტრშეტევისათვის. სად და როდის ეს უცნობია. წინა წლის ინფორმაციის გაჟონვის გაკვეთილი ამ მხრივ ნასწავლია.
3. ცოცხალი ძალის დეფიციტის გამო რუსებმა კონტაქტორების ძიება ახალი მასშტაბით განაახლეს და გაზრდილ თანხებს ჰპირდებიან. მოსკოვის ოლქში ყველაზე დიდია ანაზღაურება, ციმბირის პროვინციებში - ყველაზე ცოტა. ბრიტანული დაზვერვა ომის დაწყებიდან დღემდე რუსების რიგებში ბოლო სამ თვეში რეკორდულ დანაკარგებზე მიუთითებს.
4. დონეცკის ოლქში ყველაზე აქტიური საბრძოლო მოქმედებები ნიუ-იორკთან მიმდინარეობს. რუსებს ამ ქალაქის აღება არამხოლოდ ჰორლივკას სიახლოვისა და სტრატეგიული მნიშვნელობის, არამედ უშუალოდ სახელის გამო უნდათ. ნიუ-იორკი აღნიშნულ დასახლებას 2014 წლის რუსული აგრესიის შემდეგ ეწოდა.
5. დონეცკის ოლქის შედარებით დიდი ისეთი ქალაქი, როგორიცაა მირნოჰრადია რუსული საჰაერო იერიშების სამიზნე გახდა. პრაქტიკულად, რუსეთის მოკლევადიანი მიზანია დონეცკის ოლქი სრულად უცხოვრებელი გახადოს. იერიშები მშვიდობიან მოსახლეობასა და საავადმყოფოზე იყო მიტანილი.
6. ხარკოვის ოლქში ქალაქი ხარკოვის მიმართულებით რუსული იერიში ბოლო ერთი თვეა სრულ ჩიხშია შესული. რუსებმა ვერც ვოჩანსკის აღება მოახერხეს და ვერც ინიციატივის დაბრუნებას ახერხებენ. პირიქით, უკრაინელები ფლობენ ლოკალურ ინიციატივას ამ მიმართულებაზე.
7. ხარკოვის ოლქის ქალაქ კუპიანსკს რუსები საჰაერო დარტყმებით კვლავ ბომბავენ. 2022 წლის კონტრშეტევის შემდეგ უკრაინელებმა კუპიანსკი გაათავისუფლეს და პრინციპში ლუგანსკის ოლქის კონტროლი რუსებს პრობლემურად უქციეს. ამიტომაა, რომ რუსები მაქსიმალურად ცდილობენ კუპიანსკამდე მიღწევას და მდინარე ოსკილზე ანუ ბუნებრივ ბარიერზე ფრონტის ხაზის გავლებას.
8. უკრაინის სამხედრო დაზვერვის ხელმძღვანელი, კირილო ბუდანოვი, არ გამორიცხავს რუსეთმა კიდევ ერთი მიმართულება გახსნას უკრაინის წინააღმდეგ. ამჯერადაც ბელარუსიდან. რეალისტურად ამის შანსი ძალიან მცირეა, მაგრამ იმ ფონზე, რომ ათასობით სამხედრო ხარკოვის ოლქის ოპერაციას კიდევ ერთხელ შესწირა რუსეთმა, არაა გამორიცხული ბელარუსიდან კიდევ იყოს მოქმედების მცდელობა.
9. რუსეთის მხრიდან დივერსია ნატოს წინააღმდეგ გრძელდება - გაირკვა რომ რუსულ უშიშროებას გერმანიის სამხედრო წარმოების, რაინმეტალის უფროსის მოკვლა სურდა. თუმცა წარუმატებლად. ამასთან, რუსების მცდელობა მოეხდინათ საბოტაჟი ნატოს სამხედრო ინფრასტრუქტურაზე ახლა მეტი ყურადღებით კონტროლდება.
10. ნატოს სამიტზე უკრაინის გვერდით დგომა და დახმარება კიდევ ერთხელ გამოცხადდა. უკრაინას დამატებით გადაეცემა Patriot-ის ჰაერსაწინააღმდეგო სისტემები. წელსვე გამოჩნდება პირველი F16-ბი.
