- საბრძოლო მოქმედებები ინტენსიურად მიმდინარეობს ორიხივი-ტოკმაკის მონაკვეთზე, რობოტინეს მიმართულებით. პრაქტიკულად, თუკი თავდაცვის ძირითად ზღუდეს არ ჩავთვლით რუსული წინააღმდეგობის უმთავრეს კერად რჩება აღნიშნული დასახლება. მისი გათავისუფლება კრიტიკულად მნიშვნელოვანია, რადგან რობოტინეს სექტორი ყველაზე შემაღლებული ტერიტორიაა მთელს მონაკვეთზე.

გუშინდლიდან მიმდინარეობს დასახლების შემოვლის მცდეობა. მაგრამ ამ მიმართულებითაც წინააღმდეგობა მნიშვნელოვანია. უკრაინელებმა შეძლეს და ყველა ის მონაკვეთი გაათავისუფლეს, სადაც ივნისის განმავლობაში რამდენიმე "ლეოპარდ 2" ტანკი დაკარგეს. ამასთან, ყოველდღიურად რამდენიმე ასეული მეტრით მოძრაობს ფრონტის ხაზი და ე.წ. ნაცრისფერი ზონისა და No Man's Land-ის (ტერიტორია, რომელსაც არავინ არ აკონტროლებს) მოცულობა იზრდება. მაგრამ მიუხედავად იმისა, რომ რუსები ზოგიერთი მონაკვეთიდან საკმაოდ სიღრმეში მიიწევენ, უკრაინელები სწრაფად ვერ ითვისებენ ამ ტერიტორიას, რადგან მისი მნიშვნელოვანი ნაწილი ჯერ კიდევ დანაღმულია. განაღმვითი მუშაობა კი მიმდინარეობს.

ორი მნიშვნელოვანი უპირატესობა აქვს უკრაინას:

1. კონტრ-ბატარეულ ბრძოლაში ხელშესახები წარმატება - რუსული არტილერია საიდანაც ისვრის იმ მონაკვეთების დადგენა და მოწინააღმდეგის ამ პოზიციის განადგურება;
2. შორეული დანაღმვითი სამუშაოების გაწევის შესაძლებლობა - არტილერიიდან ისვრიან ნაღმებს მოწინააღმდეგის ზურგში. შესაბამისად, როდესაც მომარაგების ხაზზე რუსული ლოჯისტიკა ან დამხმარე ნაწილები გადაადგილდებიან ხვდებიან იმ დანაღმულ მონაკვეთზე, რომელსაც თავად აკონტროლებენ, მაგრამ უკრაინელებს დისტანციურად აქვთ დანაღმული.

ამასთან, ბოლო 48 საათია უკრაინელები ცდილობენ რობოტინეს ირგვლივაც გაშალონ შეტევა და გააფართოონ მონაკვეთი, რათა რუსებს სხვადასხვა პოზიციის ერთიანი დაცვა და გაშლა მოუწიოთ.

რობოტინეს გარდა უკრაინელები ინტენსიურად უტევენ კოპანის სიახლოვეს. დღეს, ამავე მონაკვეთზე რუსული შვეულმფრენი იქნა ჩამოგდებული. მოგახსენებთ, რომ სწორედ შვეულმფრენების ეფექტური გამოყენებით რუსები ახერხებენ უკრაინელთათვის დიდი დარტყმის მიყენებას. შესაბამისად, თითოეული მათგანის ჩამოგდება კრიტიკული მნიშვნელობისაა.

- ზაპორიჟიას ოლქში, ინტენსიურად იბომბება რუსული პოზიციები ვასილივკასთან, მდინარე დნეპრის მომიჯნავედ. ზოგადად, რუსები უკრაინელთა დარტყმას სწორედ ამ ქალაქზე ელიან.

- ბრძოლა ანტონოვის ხიდის აღმოსავლეთ ნაპირთან გრძელდება. რუსების ყველა მცდელობა გაენეიტრალებინათ უკრაინული დესანტი და ფორპოსტი დაჩების მიმართულებით - წარუმატებლად დასრულდა. უკრაინელებმა შეძლეს და შეინარჩუნეს მონაკვეთი. მიუხედავად ამისა, აშკარაა აქ საბრძოლო მოქმედებების ინტენსივობა ასე მარტივად არ შენელდება. ერთ-ერთი არჩევანი, რაც რუსებს კონტრიერიშის გარდა აქვთ ესაა ოლეშკისა და მდინარე კონკას შორის ხიდის აფეთქებისა. თუმცა მდინარე კონკა უფრო ადვილი გადასალახია ვიდრე დნეპრი.

- რუსებმა ქალაქი სუმი დაბომბეს. ირანული წარმოშობის რუსული დრონი ზედ დაეცა საცხოვრებელ სახლს. არის მსხვერპლი. ომი თითქმის 500 დღეა მიმდინარეობს და ამ ხნის განმავლობაში უწყვეტად ვხედავთ რომ რუსული ტაქტიკა რჩება იმად, რაც იყო ომის პირველივე დღეს - განადგურდეს მშვიდობიანი მოსახლეობა, დაშინდეს ის და მთავრობას სთხოვოს დანებება. რუსეთი ფიქრობს, რომ დაშინებითა და ტერორით უკრაინელთა ბრძოლის ნება გატყდება.

- დღეს პრეზიდენტი ზელენსკის ინტერვიუ გავრცელდა CNN-თან. მან აღნიშნა, რომ უკრაინა მხოლოდ მაშინ ჩათვლის ომს გამარჯვებულად, როდესაც ისინი ყირიმს დაიბრუნებენ. ამასთან, მან აღნიშნა, რომ აშშ-ს ცენტრალური სადაზვერვო სააგენტოს უფროსთან აქტიური კონტაქტი აქვს. რეალურად, დაზვერვის მხრივ უკრაინამ იმაზე მეტი იცის, ვიდრე რუსეთმა, რადგან პრაქტიკულად უკრაინული და ამერიკული დაზვერვა ერთად მუშაობს და ტექნოლოგიური უპირატესობაც მათ მხარესაა, ხოლო რუსეთის შემთხვევაში დაზვერვამ პოლიტიკური დატვირთვა მიიღო, ანუ პოლიტიკურ ფილტრში ტარდება მიღებული ინფორმაცია.

მიყევით ბმულს - გიორგი კობერიძე