- უკვე მეორე დღეა რუსული წყაროები იტყობინებიან, რომ უკრაინელებმა მდინარე დნეპრი ანტონოვის ხიდთან გადალახეს და ფორპოსტის შექმნას ცდილობენ აღმოსავლეთ სანაპიროზე. თუკი ეს დადასტურდა, ცხადია საუბარი არ გვაქვს დიდ სამხედრო დანაყოფზე, არამედ სპეციალურ ნაწილებზე, რომელთაც კახოვკას კაშხლის აფეთქებამდეც ჰქონდათ ასეთი პოზიციის მოწყობის მცდელობა დნეპრის ერთ-ერთ კუნძულზე. მაგრამ ახლა სიტუაცია შეცვლილია - მდინარე ამ მიმართულებით უბრუნდება ნორმალურ მაჩვენებელს, რუსული არმიის დიდი ნაწილი ზაპორიჟიაშია გადასროლილი, ხოლო ადგილზე მყოფი რუსი სამხედროები დემორალიზებულები არიან. ამის მიზეზი მარტო გუშინდელი ამბები ცხადია არ არის, არამედ ის, რომ კახოვკას კაშხლის აფეთქების შემდეგ მათი თანამებრძოლები წყალმა ისე დაახრჩო არც არავის გაუფრთხილებია, ხოლო დანაღმული ველები მდინარემ დატბორა და ნაღები კი გადაადგილა (პრაქტიკულად თავდაცვის ხაზი დასუსტებული აქვთ რუსებს).
თუკი უკრაინელები ანტონოვის ხიდის მიმართულებით მართლაც შექმნიან ერთგვარ საყრდენ პუნქტს, ეს აპრიორი არ მოასწავებს, რომ ძირითადი დარტყმა სწორედ ამ მიმართულებით განვითარდება, მაგრამ შექმნის საშუალებას, რამდენიმე მსგავსი ოპერაციის შემდეგ გამოვლინდეს ყველაზე სუსტი მონაკვეთი სანაპირო ზოლზე და სწორედ იქ განხორციელდეს ძირითადი დაწოლა.
- ბახმუტის ირგვლივ უკრაინელთა წინსვლას მიმდინარეობს. ქალაქის სამხრეთით კლიშჩიივკას დასავლეთით ტყის აბსოლუტური უმრავლესობა გაწმენდილია, რაც ნიშნავს, რომ უკრაინული დანაყოფები დასახლების გარემოცვას იწყებენ. უკრაინელები მხოლოდ დღეს ბახმუტის ირგვლივ 600 მეტრიდან 1 კილომეტრამდე წინსვლაზე საუბრობენ.
უკრაინელები დინამიურად მიიწევენ წინ ბახმუტის ჩრდილოეთითაც. ამ მიმართულებით მათ ძალიან ცოტაღა აშორებთ მდინარე ბახმუტკასა და დასახლება ბლაჰოდატნემდე (ამ სახელით ბევრი დასახლებაა უკრაინაში), რომლის მეორე მხარესაც რკინიგზის სადგური "სილი" მდებარეობს. შეგახსენებთ, რომ "სილი" ქალაქი სოლედარის ნაწილია, რომლის ასაღებადაც ექვსი თვე, ასობით ტექნიკა და ათასობით ცოცხალი ძალა გაიღეს რუსებმა. გეტყვით, რომ სოლედარისა და მისი გარემოცვის შტურმში "ვაგნერის" გარდა გრუ-ს სპეცრაზმიც კი მონაწილეობდა, რეგულარებთან ერთად.
- ლუგანსკში დღეს სამეთაურო შტაბი უკრაინული სარაკეტო დარტყმის შემდეგ განადგურებულ იქნა. სავარაუდოდ, კვლავ გამოყენებულ იქნა ფრთოსანი რაკეტა Storm Shadow.
- ზაპორიჟიას ქალაქ ბერდიანსკში რუსები არასრულწლოვნებზე ნადირობენ. მათ უკვე მოკლედ ორი ახალგაზრდა, რომელთაც პარტიზანულ აქტივობაში სდებდნენ ბრალს. ერთ-ერთმა 16 წლის ახალგაზრდა გმირმა ორი რუსი სამხედრო მოკლა სანამ მას მოკლავდნენ.
- კახოვკას კაშხლის ტერიტორია ძირითადად მთლიანად გამოშრა. ცალკეულ მონაკვეთებში მიწა ისეთ მდგომარეობაშია არათუ ლამი, არამედ სისველეც კი აღარ შეინიშნება. პრაქტიკულად გაჩნდა მყარი მიწა, რომელიც მანამდე სულ წყალს ჰქონდა დაფარული.
- ინტენსიური ორმხრივი იერიშები მიმდინარეობს ქალაქი დონეცკის შემოგარენში. უკრაინელებმა ქალაქში რუსულ საოკუპაციო ძალების შტაბზე მიიტანეს საარტილერიო დარტყმა. თავის მხრივ რუსები გააფთრებულად უტევენ ქალაქ მარიინკას, დონეცკის სამხრეთ-დასავლეთით. მეორეს მხრივ, უკრაინელები ცდილობენ არამხოლოდ 2022 წლის 24 თებერვლამდე პოზიციებზე გასვლას, არამედ 2014 წელს დაკარგულ მიწებზე გასვლას. ამჯერად შეტაკებები პერვომაისკისა და სტრატეგიულად მნიშვნელოვან პისკის შორის ტერიტორიაზე მიმდინარეობს. რუსები არტილერიას არ ზოგავენ უკრაინელთა შესაჩერებლად.
- გამალებული დარტყმები მიმდინარეობს რუსულ საარტილერიო პოზიციებზე. პრაქტიკულად კონტრბატარეულ ბრძოლაში უკრაინელები ჯაბნიან რუსებს. ანუ, რუსული არტილერია საიდანაც ისვრის იმ ადგილის აღმოჩენა უსწრაფესად ხდება და საპასუხო დაბომბვა ხორციელდება ამ მიმართულებით, რომელიც ზედმიწევნით ზუსტია.
- რუსებმა კვლავ სცადეს კონტრშეტევაზე გადასვლა კრემინას ტყის მიმართულებით, მდინარე ჩრდილოეთის დონეცის სიახლოვეს, ლუგანსკის ოლქში, მაგრამ დიდი დანაკარგებით დაიხიეს უკან.
- ბრიტანული დაზვერვა უკრაინელთა დინამიურ წინსვლაზე მიუთითებს. ნელი, მაგრამ ორგანიზებული პროცესია რუსული პოზიციების ჩამოშლა ისე, რომ ძალის მხოლოდ მინიმუმი აქვთ ჩართული უკრაინელებს.
- საინტერესო შეფასება წავიკითხე დასავლელ მკვლევართა მიერ: პუტინი იმდენად ჩაფრენილია ძალაუფლებას, რომ სადაც ტერორისტ-ბუნტისტებს დაუზავდა, ადრე თუ გვიან უკრაინელებსაც ჩააბარებს ყველაფერს და დაუზავდება, რადგან მშიშარა და ძალაუფლების მოყვარულიაო. პუტინი რომ მშიშარაა ეს ახალი ამბავი არ არის (მისი ბიოგრაფიიდან ბევრი ისტორიაა ამ თემაზე), მაგრამ დაზავებამდე მივა საქმე თუ "კეთილ ნებამდე", ან რა მოხდება რუსეთში - ამას დრო გვიჩვენებს და აუჩქარებლად უნდა დავაკვირდეთ.
