USD 3.2040
EUR 3.8829
RUB 4.4320
თბილისი
გიორგი დარბაიძე - გერმანიაში მოღვაწე საოპერო მომღერალი
თარიღი : 06.01.2021 14:21  94
გერმანიაში 2009 წელს ჩამოვედი. კონსერვატორიის დასრულების შემდეგ მოწვევა მივიღე გერმანიის სააგენტოდან. მაშინ ეს იყო თვითრეალიზების საუკეთესო შანსი, რომელიც შეძლებისდაგვარად გამოვიყენე. 100-ზე მეტ საოპერო დადგმაში მივიღე მონაწილეობა, გუნდის, მცირე სოლო, საშუალო სოლო თუ მთავარი პარტიებით. გამოვყოფდი ავსტრიაში დადგმულ “დონ ჯოვანის”, სადაც ერთ-ერთი მთავარი როლი - ლეპორელო შევასრულე. ასევე, დაუვიწყარი იყო ჩემი პირველი მთავარი როლი მოცარტის “ჯადოსნურ ფლეიტაში”.
 
სპექტაკლების გარდა, დიდ სიამოვნებას მანიჭებს საკონცერტო გამოსვლები. ჩემი პრინციპი ასეთია, ერთი მსმენელისთვისაც ისე უნდა დაიხარჯო, როგორც სავსე დარბაზისთვის. მუსიკა და საოპერო ხელოვნების სამყარო ჩემი ცხოვრებისეული არჩევანია. გერმანიაში საკანონმდებლო დონეზე ზრუნავენ საოპერო თეატრის მომღერლების და ბალეტის მოცეკვავეების სამუშაო პირობების გასაუმჯობესებლად.
 
ასევე მათ იცავთ პროფკავშირების სისტემა. ჰანოვერის ოპერაში 2016 წლიდან ვარ პროფკავშირის (VDO) არჩეული ხელმძღვანელი. პანდემიის დროს, ამ ორგანიზაციის დახმარებით, სოციალურ საკითხებში, თეატრის თანამშრომლებისთვის 100%-იან სტატუსქვოს მივაღწიეთ. გერმანიაში ბევრი რამე გადავაფასე. დამჭირდა საკუთარი შესაძლებლობების მობილიზება და მეტი პროფესიონალიზმი; დროის რაციონალური გადანაწილება და დაგეგმარების მოქნილი სტრუქტურა; ადაპტაცია და ინტეგრაცია, თუმცა არა ინდივიდუალიზმის ხარჯზე. ეს პერიოდი ჩემთვის იყო უზომოდ საინტერესო. ევროპულმა წესრიგმა და რუტინამ, ამავე დროს უსაზღვრო სივრცემ, მომცა მეტი თავისუფლება, რომ მეპოვა საკუთარი თავი, ალბათ ეს იყო მთავარი... ქართული საოპერო სკოლა საკმაოდ მაღალი დონისაა. იქაური საგანმანათლებლო ბაზა მსოფლიო სტანდარტებს შეესაბამება.
 
თუმცა, ტრადიციულ მიდგომებთან ერთად, საჭიროა საქართველოში დაინერგოს ევროპული გამოცდილებაც. ყველა ქართველმა ახალგაზრდა მომღერალმა უნდა იცოდეს, რომ სწავლის პროცესში თითოეულ დღეს მნიშვნელობა აქვს. 2013-2016 წლებში, გერმანიის დასაქმების ცენტრალურ სააგენტოსთან (ZAV) ერთად, ქართველი მომღერლებისთვის განვახორციელეთ ორი პროექტი. მოსმენები საქართველოში შედგა და სწორედ ამ მოსმენების შედეგად ბევრი მომღერალი დღეს გერმანიის თეატრებში მოღვაწეობს. დღესაც ვაგრძელებ ჩვევად ქცეულ მისწრაფებას - რაც შეიძლება მეტი ქართველი ევროპის და განსაკუთრებით, გერმანიის საოპერო სცენაზე! - ეს ჩემი მიზანია და ასევე სოციალური პასუხისმგებლობა.
 
მსოფლიოში არ მეგულება ისეთი ქართველი, რომელიც არ ოცნებობს, ჰქონდეს საქართველოსთან რაიმე სახის კავშირი. ჩემს ოცნებას თუ ახდენა უწერია, ვისურვებდი, საქართველოში დაგვენერგა ის თეატრალური მოდელი, რომელიც მე გერმანიაში სიღრმისეულად შევისწავლე. საქართველოს ამის პოტენციალი ნამდვილად აქვს. ამ რეფორმით ჩვენ მივიღებთ გამართულ სახელოვნებო, საგანმანათლებლო ინფრასტრუქტურას და უამრავ დასაქმებულ ხელოვანს. რაც მთავარია, საყოველთაო კულტურულ საზოგადოებას. მწამს, რომ განათლება და კულტურა წარმატებული სახელმწიფოს საფუძველია. ქართველები ნიჭიერი ხალხი ვართ, განსაკუთრებით ჩვენი ახალგაზრდობა. მიზნის მისაღწევად ერთი ნაბიჯით მეტი გვჭირდება, ვიდრე ამას ჩვენი ქართული მენტალიტეტი გვკარნახობს. წარმატებისთვის კი საჭიროა შრომისმოყვარეობა და სწრაფვა სრულყოფილებისკენ, როგორც გერმანიაში იტყვიან “მთლიანი შეფუთვა” და არა რომელიმე ცალკე დეტალი. ნებისმიერ სფეროში მიხარია ჩემი თანამემამულეების წარმატება. გამოცდილების გაცვლა და ინვესტირება სამშობლოში უნდა იყოს ჩვენი შინაგანი ვალდებულება. ჩემი მოტივაციაც ხომ წარმატებული საქართველოა.
 
ბიზნესი
"ასკანელი"-ს დამფუძნებელმა მონაკოს სამთავროს პრინცს ქართული ქვევრის ღვინოები წარუდგინა

მონტე-კარლოს ღვინის სასახლეში ქართული ღვინის პოპულარიზაციის მიზნით ორგანიზებულ პრეზენტაცია-დეგუსტაციაზე კომპანია "ასკანელი"-ს დამფუძნებელმა, გოჩა ჩხაიძემ მონაკოს სამთავროს პრინც ალბერტ II ქართული ქვევრის ღვინოები წარუდგინა.

კომპანიის პრესსამსახურის ინფორმაციით, პრეზენტაცია - დეგუსტაციას საქართველოს პრეზიდენტი სალომე ზურაბიშვილი ესწრებოდა.

”ვფიქრობ, ქართული მეღვინეობის ისტორიაში საინტერესო პროცესი დაიწყო. სიამაყით მინდა აღვნიშნო, რომ კომპანია “ასკანელი” არის ორგანიზატორი და ინიციატორი ქართული ქვევრის ღვინის დეგუსტაციის მონაკოში და მონტე-კარლოში, რომელსაც საქართველოს პრეზიდენტთან ერთად მონაკოს სამთავროს პრინცი ალბერტ II დაესწრო. ეს მნიშვნელოვანი მხარდაჭერაა ქართული ღვინის პოპულარიზაციისთვის. დღეს ჩვენ სიამაყით წარვადგინეთ ქართული ქვევრის ღვინო მეღვინეობის სექტორში დომინანტ საფრანგეთსა და მონაკოში, 7 ქართული კომპანიის 12 სხვადასხვა სახეობის ქვევრის ღვინო, რომელიც "ბრმა დეგუსტაციის" მეთოდით შეირჩა.

დეგუსტაციაზე შეკრებილმა ღვინის ცნობილმა საერთაშორისო ექსპერტებმა და მსოფლიოს სხვადასხვა კუთხიდან ჩამოსულმა ავტორიტეტულმა მეღვინეებმა ქართული ქვევრის ღვინოები დააგემოვნეს და მაღალი შეფასება მისცეს. მათ კიდევ ერთხელ გაუსვეს ხაზი ქართული ღვინის პერსპექტივას და ღვინის დაყენების უნიკალურ ქართულ ტრადიციულ მეთოდებს”,- განაცხადა გოჩა ჩხაიძემ.

კომპანია "ასკანელი"-ს ინფორმაციით, პრეზენტაციაზე 7 ქართული კომპანიის 12 სხვადასხვა სახეობის ღვინო იყო წარმოდგენილი.

"ასკანელი"-ს ცნობით, მონაკოს ღვინის სასახლეში (Monaco WINE PALACE ) ქართული ღვინის პოპულარიზაციის მიზნით ორგანიზებულ პრეზენტაცია-დეგუსტაციას ანსაბლი “რუსთავი” ქართული ხალხური სიმღერებით აფორმებდა.

სრულად
გამოკითხვა
თქვენი აზრით, არის თუ არა დღეს ქვეყანაში პოლიტიკური კრიზისი?
ხმის მიცემა
სხვათა შორის

ილია ჭავჭავაძე: "როცა პრუსიამ წაართვა საფრანგეთს ელზასი და ლოტარინგია და პარლამენტში ჩამოვარდა საუბარი მასზედ, თუ რაგვარი მმართველობა მივცეთო ამ ახლად დაჭერილს ქვეყნებს, ბისმარკმა აი, რა სთქვა: ,,ჩვენი საქმე ელზასსა და ლოტარინგიაში თვითმმართველობის განძლიერება უნდა იყოსო. ადგილობრივნი საზოგადოების კრებანი უნდა დავაწყოთო ადგილობრივის მმართველობისთვისაო. ამ კრებათაგან უფრო უკეთ გვეცოდინება იმ ქვეყნების საჭიროება, ვიდრე პრუსიის მოხელეთაგანა. ადგილობრივთა მცხოვრებთაგან ამორჩეულნი და დაყენებულნი მოხელენი ჩვენთვის არავითარს შიშს არ მოასწავებენ. ჩვენგან დანიშნული მოხელე კი მათთვის უცხო კაცი იქნება და ერთი ურიგო რამ ქცევა უცხო კაცისა უკმაყოფილებას ჩამოაგდებს და ეგ მთავრობის განზრახვასა და სურვილს არ ეთანხმება. მე უფრო ისა მგონია, რომ მათგან ამორჩეულნი მოხელენი უფრო ცოტას გვავნებენ, ვიდრე ჩვენივე პრუსიის მოხელენი”. თუ იმისთანა კაცი, როგორც ბისმარკი, რომელიც თავისუფლების დიდი მომხრე მაინდამაინც არ არის, ისე იღვწოდა თვითმმართველობისათვის, მერე იმ ქვეყნების შესახებ, რომელთაც გერმანიის მორჩილება არამც თუ უნდოდათ, არამედ ეთაკილებოდათ, თუ ამისთანა რკინის გულისა და მარჯვენის კაცი, როგორც ბისმარკი, სხვა გზით ვერ ახერხებდა ურჩის ხალხის გულის მოგებას, თუ არ თვითმმართველობის მინიჭებითა, სხვას რაღა ეთქმის."

დედამიწაზე არსებული ცოცხალი არსებებიდან მხოლოდ ადამიანს და კოალას აქვთ თითის ანაბეჭდი

ინდოელი დიასახლისები მსოფლიო ოქროს მარაგის 11% ფლობენ. ეს უფრო მეტია, ვიდრე აშშ-ს, სავალუტო ფონდის, შვეიცარიის და გერმანიის მფლობელობაში არსებული ოქრო, ერთად აღებული.

დადგენილია, რომ სასოფლო-სამეურნეო კულტურათა მოსავლიანობის განმსაზღვრელ კომპლექსურ პირობათა შორის, ერთ-ერთი თესლის ხარისხია. მაღალხარისხოვანი ჯიშიანი თესლი ერთ-ერთი მნიშვნელოვანი ფაქტორია მოსავლიანობის გასადიდებლად, რაც აგრეთვე დასაბუთებულია ხალხური სიბრძნით "რასაც დასთეს, იმას მოიმკი". - ქართული გენეტიკისა და სელექცია–მეთესლეობის სკოლის ერთ-ერთი ფუძემდებელი, მეცნიერებათა დოქტორი, აკადემიკოსი პეტრე ნასყიდაშვილი

ებოლა, SARS-ი, ცოფი, MERS-ი, დიდი ალბათობით ახალი კორონავირუსი COVID-19-იც, ყველა ამ ვირუსული დაავადების გავრცელება ღამურას უკავშირდება.

ყველაზე დიდი ეპიდემია კაცობრიობის ისტორიაში იყო ე.წ. "ესპანკა" (H1N1), რომელსაც 1918-1919 წლებში მიახლოებით 100 მილიონი ადამიანის სიცოცხლე შეეწირა, ანუ დედამიწის მოსახლეობის 5,3 %.

იცით თუ არა, რომ მონაკოს ნაციონალური ორკესტრი უფრო დიდია, ვიდრე ქვეყნის არმია.