,
წმიდა ცეცხლის გარდამოსვლის საიდუმლოს იესო ქრისტეს აღდგომის ყოვლისმომცველი სასწაული განაპირობებს. ეს საოცარი და განუყოფელი მოვლენა მიეცა კაცობრიობას, როგორც ნიშანი და ბეჭედი მართლმადიდებელი სარწმუნოების ჭეშმარიტებისა.
როგორც ცნობილია, ქრისტეს საფლავზე ცეცხლის გარდამოსვლა აღესრულება ძველი სტილით - იულიანური კალენდრით, მართლმადიდებლური ეკლესიის მიერ დადგენილი ქრისტეს აღდგომის გამოთვლის წესის მიხედვით, და მხოლოდ მართლმადიდებელი ეპისკოპოსის ხელით.
ფრიად საინტერესოა ის ფაქტიც, რომ აღდგომის თარიღი დაადგინა 325 წელს ნიკეის პირველმა მსოფლიო საეკლესიო კრებამ. ეს თარიღი მოძრავია და განისაზღვრება შემდეგი ფაქტორებით:
ა) წმინდა აღდგომა იდღესასწაულება გაზაფხულის ბუნიობის შემდგომ;
ბ) მთვარის მოვანების, ანუ აღვსების შემდეგ;
გ) პირველსავე კვირა დღეს;
დ) ხოლო თუკი იგი ებრაელთა პასექს დაემთხვა, აღდგომის დღესასწაული გადაიწევს ერთი კვირით.
სწორედ, ამ პირობების დაცვით დიდ შაბათს უფლის საფლავზე გარდამოხდება წმინდა ნათელი, ღვთაებრივი ცეცხლი.
უფლის მიერ ქმნილი მზის სხივი სამყაროს უმნიშვნელოვანესი ელემენტია. ის აფრქვევს სითბოს, აწვდის ბუნებასა და ადამიანს სასიცოცხლო ძალებს. სადაც მზის ნათელია - სიცოცხლეც იქ არის. რაოდენ აღმატებულია უფლის ნათელი, რომელსაც ადამიანი მიჰყავს ჭეშმარიტების გზაზე - სულის ცხონებისაკენ.
„და უკუეთუ ვინმე იღუწიდესცა, არა გვირგვინოსან იქმნების, არა თუ სჯულიერად იღუაწოს", - ბრძანებს წმინდა წერილი (2 ტიმ. 2, 5).
„ვისაც მართალი სარწმუნოება არ უპყრია და მოღვაწეობს, იმ კაცის მსგავსია, რომელიც წყალს იღებს და გახვრეტილ ჭურჭელში ასხამს", - ამოწმებს ღირსი იოანე სინელი.
წმინდა წერილში არაერთგზის ვკითხულობთ სასწაულებრივი საღვთო ცეცხლის გარდამოსვლის შესახებ, რომელიც ძველ აღთქმაში მხოლოდ მართალი სარწმუნოების წიაღში მყოფ ებრაელთა შორის, ღვთის სათნომყოფელი ადამიანების ხელით აღესრულებოდა.
მაგალითისთვის მოვიყვანთ ამონარიდებს ძველი აღთქმიდან მცირე განმარტებებით: ღვთის ბრძანებით მოსემ ააგო მოძრავი ტაძარი, თავისი ძმა აარონი კი მღვდელმთავრად აკურთხა. „შევიდნენ მოსე და აარონი სადღესასწაულო კარავში, გამოვიდნენ და დალოცეს ერი. მაშინ გამოეცხადა მთელს ერს უფლის დიდება. გამოვიდა ცეცხლი უფლისაგან და შეჭამა სამსხვერპლოზე დაწყობილი აღსავლენი და ქონები. იხილა მთელმა ერმა, აღმოხდათ სიხარულის ხმა და პირქვე დაემხნენ" (ლევ. 9:23,24).
მეფე სოლომონ ბრძენმა აღაშენა იერუსალიმში ტაძარი და აღთქმის კიდობანი დადგა წმინდა წმიდათაში. ტაძრის კურთხევას უამრავი ადამიანი დაესწრო. საზეიმო მსახურების დროს დიდება ღვთისა, ნათელი ღრუბლის სახით, გამოვიდა და აღავსო ტაძარი. როცა კი სოლომონმა ლოცვა დაასრულა, ცეცხლი გადმოუშვა ზეციდან და შთანთქა აღსავლენი და მსხვერპლნი. როცა დაინახეს ისრაელიანებმა სახლზე გადმომავალი ცეცხლი და უფლის დიდება, პირქვე დაემხნენ ქვაფენილზე და თაყვანი სცეს, აქებდნენ უფალს და ამბობდნენ: „კეთილია იგი, რამეთუ უკუნისამდეა წყალობა მისი" (2 ნეშტთა, 7,13).
„ღვთის კაცმა" ილია თესბიტელმა ბაალის მსახურთა თვალწინ, რომელთა ლოცვა უშედეგო იყო, 12 დიდი ქვით ააგო სამსხვერპლო, ილოცა და შესწირა უფალს მსხვერპლი. „ზეციდან გარდამოხდა ცეცხლი და დაწვა მსხვერპლი". ჩამოვარდა უფლის ცეცხლი და შთანთქა აღსავლენი მსხვერპლი..." (3 მეფეთა 1, 38).
ნიშნად იმისა, რომ უფალმა შეისმინა მართალი კაცის ლოცვა-ვედრება.
დღესაც, ისევე როგორც უწინ, ყოველწლიურად, დიდ შაბათს, ზეციდან გარდამომავალი ღვთაებრივი ცეცხლი სიხარულს ჰგვრის და განამტკიცებს მართლმადიდებელი ეკლესიის შვილებს, ქრისტეს იმ „მცირე სამწყსოს", რომელსაც სულიერი ძნელბედობის ჟამს უწევს ცხოვრება. ეს უდიდესი ღვთაებრივი ზეიმი ამხნევებს მართლმადიდებელ მრევლს, ვინაიდან კვლავ და კვლავ წარმოაჩენს მათი სარწმუნოების ჭეშმარიტებას.
ჩვენ კი, უფლის აღდგომის საზეიმო მსახურების მოწმენი, როგორც ქრისტეს საფლავთან მდგომნი, სიხარულით აღვსილნი, მართლმადიდებელი არაბებივით, შევღაღადებთ: „ერთია ჭეშმარიტება... და არ არის სხვა სარწმუნოება, გარდა მართლმადიდებელი სარწმუნოებისა".
ხოლო, ისინი, ვინც უარყოფენ ზეციურ ცეცხლს, ემსგავსებიან ქრისტეს მტრებს, რომლებმაც იხილეს უდიდესი სასწაული - ოთხი დღის მკვდარი ლაზარეს აღდგინება, და მოიწადინეს კვლავ მისი მოკვლა, რათა გაექარწყლებინათ ქრისტეს მიერ აღსრულებული სასწაული.
„რომელსა ასხენ ყურნი სმენად, ისმინენ!" (მარკ. 4, 9).
ბრიტანულ „დეილი ტელეგრაფში“ (The Daily Telegraph) გამოქვეყნებულია სტატია სათაურით „ტრამპმა პუტინისათვის დრო ისე გამოთვალა, რომ სანქციებით მაქსიმალურ შედეგს მიაღწიოს“ (ავტორი – კონ კოფლინი). პუბლიკაციაში განხილულია აშშ-ის პრეზიდენტის მიერ რუსეთის წინააღმდეგ მიმართული მეორადი სანქციების ათდღიანი ვადა და მოცემულია მათი სავარაუდო შედეგები.
გთავაზობთ სტატიას შემოკლებით:
დონალდ ტრამპმა, ალბათ, ყველაზე საუკეთესო და შესაფერისი დრო შეარჩია თავისი მეორადი ეკონომიკური სანქციების ახალი ვადის გამოცხადებისათვის, რომ რუსეთს ნავთობისა და გაზის გაყიდვით მიღებული შემოსავლები შეუმცირდეს და უკრაინაში ომი შეწყვიტოს.
დონალდ ტრამპს სამჯერ ეგონა, რომ ვლადიმერ პუტინი სამშვიდობო მოლაპარაკების აუცილებლობაში დაარწმუნა, მაგრამ სამჯერვე, როგორც კი სატელეფონო საუბარი მთავრდებოდა, რუსეთის არმია უკრაინული ქალაქების დასაბომბად რაკეტებსა და დრონებს უშვებდა.
აშშ-ის პრეზიდენტის მხრიდან იმის დაგვიანებული აღიარება, რომ „პუტინი მას თურმე ათამაშებდა და ომის გასაგრძელებლად დროს იგებდა“, იმას ნიშნავს, რომ როგორც იქნა, „ტრამპი აბობოქრდა“ და თავის რუს კოლეგას ათდღიანი ვადა დაუწესა ცეცხლის შესაწყვეტად. თუ კრემლი თეთრი სახლის მოთხოვნას არ დაეთანხმება, ძალაში შევა ახალი მომატებული საბაჟო ტარიფები იმ ქვეყნების მიმართ, რომლებიც რუსეთისაგან ნავთობს ყიდულობენ. სანქციის მიზანი და განხორციელების პროცედურა ასეთია: აშშ რუსული იაფი ნავთობისა და გაზის მოყვარული ქვეყნების – ინდოეთის, ჩინეთის (და ალბათ, თურქეთის და სხვების) მიერ წარმოებულ იმპორტირებულ პროდუქციაზე მომატებულ საბაჟო ტარიფებს დააწესებს. მათი ფასი იმდენად გაძვირდება, რომ ამერიკაში მყიდველი აღარ ეყოლება, ანუ ინდური და ჩინური კომპანიები დაზარალდებიან. ზარალის თავიდან ასაცილებლად იგივე ქვეყნები იძულებულნი გახდებიან, რომ რუსეთისაგან ნავთობისა და გაზის შესყიდვა შეწყვიტონ, რის შედეგადაც რუსეთს შემოსავლები შეუმცირდება, ანუ კრემლს აღარ ექნება თანხები უკრაინასთან ომის გასაგრძელებლად. რუსეთი ცეცხლს შეწყვეტს და სამშვიდობო მოლაპარაკებაზე დათანხმდება.
კონგრესში ზოგიერთი დეპუტატი უფრო რადიკალურად არის განწყობილი, რომლებიც 500%-იან სანქციების დაწესებას მოითხოვენ.
უეჭველია, რომ დონალდ ტრამპი სერიოზულად არის განწყობილი. თუ გავითვალისწინებთ იმ ფაქტს, რომ მან იძულებული გახადა იაპონია და ევროკავშირი სავაჭრო ხელშეკრულებების დადებისას აშშ-ის მოთხოვნებზე დათანხმებულიყვნენ, განა თეთრი სახლი კრემლის წინაშე უკან დაიხევს?
როგორც კი ინდოეთი და ჩინეთი მტკივნუულ დარტყმას იგრძნობენ ამერიკასაგან, ისინი იძულებულნი გახდებიან რუსეთისაგან ნავთობ-გაზის შესყიდვა შეამცირონ (ან საერთოდ შეწყვიტონ). ამით დაინგრევა ვლადიმერ პუტინის გენერალური გეგმა რუსეთის იმპერიული ძლიერების აღდგენის შესახებ.
რუსეთი უკრაინის ფრონტზე წარუმატებლობას განიცდის. მართალია, კრემლმა დრონებითა და რაკეტებით უკრაინული ქალაქების დაბომბვა გააძლიერა, მაგრამ ფაქტია, რომ მაისში დაწყებულ შეტევას რუსეთის არმიისათვის რაიმე მნიშვნელოვანი წარმატება არ მოუტანია. ვლადიმერ პუტინი ბოლო დროს მუდმივად ცდილობს რომელიმე მსხვილი უკრაინული ქალაქის დაპყრობას, მაგრამ უშედეგოდ – პოკროვსკს და კონსტანტინოვკას ისევ უკრაინელები აკონტროლებენ. უკრაინელები მამაცურად იბრძვიან, რუსები უამრავ ჯარისკაცს კარგავს – კრემლის ზარალმა უკვე მილიონს მიაღწია დაღუპულებისა და დაჭრილების სახით. ეს ნიშნავს ყოველდღიურად 1080 რუსი მებრძოლის დაღუპვა-დასახიჩრებას.
ასევე ნაკლებად სავარაუდოა, რომ რუსეთი ათასკილომეტრიან ფრონტის ხაზზე რაიმე წარმატებას მიაღწევს მას შემდეგ, რაც დონალდ ტრამპი უკრაინას მეტ იარაღს მიაწვდის. უკრაინელებს თუ იარაღი საკმარისი რაოდენობით ექნებათ, ისინი რუსებს უკან დაახევინებენ და საეჭვოა პუტინმა ის ტერიტორია შეინარჩუნოს, რაც ბოლო დროს დაიპყრო. კრემლს ირანის იმედიც აღარ ექნება, რადგან თეირანი მნიშვნელოვნად არის დასუსტებული ისრაელთან (და აშშ-სთან) ამასწინანდელი საჰაერო შეტაკების გამო.
არის იმის ნიშნებიც, რომ თვითონ ვლადიმერ პუტინს მისსავე გარემოცვაში ბევრი არ ეთანხმება, რასაც მოსკოვში მიმდინარე საკადრო წმენდა მოწმობს. ზოგიერთი მაღალჩინოსანი ჩინოვნიკი სიცოცხლეს თვითმკვლელობით ამთავრებს, ცნობილი ოლიგარქები კი ქვეყნიდან გაქცევის დროს იქნენ დაკავებულები. ზოგიერთი მაღალჩინოსანი ოფიცერი, რომლებსაც ყოფილ თავდაცვის მინისტრთან სერგეი შოიგუსთან ახლო ურთიერთობა ჰქონდათ, დაპატიმრებულები იქნენ კორუფციის ბრალდებით.
იმ სიძნელეების მასშტაბს, რასაც ვლადიმერ პუტინი შეეჯახა ომის გამო, მოწმობს ის ფაქტი, რომ იგი იძულებული გახდა გასულ კვირას ყოველწლიური სამხედრო-საზღვაო აღლუმის ჩატარება გაეუქმებინა – უკრაინაში განცდილი დიდი დანაკარგების გამო.
ამრიგად, დონალდ ტრამპის გადაწყვეტილება ვადების შემცირების თაობაზე დროულია – ის იმ დროს იქნა მიღებული, როცა ვლადიმერ პუტინს, ყოყოჩობის მიუხედავად, ე.წ. „სპეციალური სამხედრო ოპერაციის“ გაგრძელების ვარიანტები უმთავრდება.
თუ რუსეთის პრეზიდენტი გამოფხიზლდება და მიხვდება, რომ მას უკრაინაში ომის მოგების შანსი არ აქვს, მას სხვა არჩევანი არ ექნება იმის გარდა, რომ დონალდ ტრამპის მოთხოვნას დათანხმდეს – ცეცხლი შეწყვიტოს და სამშვიდობო მოლაპარაკება დაიწყოს.
